Yarmiyaah 36
rabb kay ghar men yaramiyaah kee kitaab kee tilaavat
1yahoodaah kay baadshaah yahooyaqeem bin yoosiyaah kee hukoomat kay chauthay saal men rabb ka kalaam yaramiyaah par naazil hua, 2“toomaar lay kar us men israaeel, yahoodaah aur baaqee tamaam qaumon kay baaray men vah tamaam paighaamaat qalamband kar jo main nay yoosiyaah kee hukoomat say lay kar aaj tak tujh par naazil kiay hain. 3shaayad yahoodaah kay gharaanay men har ek apnee buree raah say baaz a kar vaapas aaay agar us aafat kee pooree khabar un tak pahunchay jo main is qaum par naazil karnay ko hoon. phir main un kee bedeenee aur gunaah ko muaaf karoonga.”
4chunaanchay yaramiyaah nay baarook bin nairiyaah ko bula kar us say vah tamaam paighaamaat toomaar men likhvaaay jo rabb nay us par naazil kiay thay. 5phir yaramiyaah nay baarook say kaha, “mujhay nazarband kiya gaya hai, is liyay main rabb kay ghar men naheen ja sakta. 6lekin aap to ja saktay hain. rozay kay din yah toomaar apnay saath lay kar rabb kay ghar men jaaen. haazireen kay saamnay rabb kee un tamaam baaton ko padh kar sunaaen jo main nay aap say likhvaaee hain. sab ko toomaar kee baaten sunaaen, unhen bhee jo yahoodaah kee deegar aabaadiyon say yahaan pahunchay hain. 7shaayad vah iltija karen ki rabb un par rahem karay. shaayad har ek apnee buree raah say baaz a kar vaapas aaay. kyoonki jo ghazab is qaum par naazil honay vaala hai aur jis ka elaan rabb kar chuka hai vah bahut sakht hai.”
8baarook bin nairiyaah nay aisa hee kiya. yaramiyaah nabee kee hidaayat kay mutaabiq us nay rabb kay ghar men toomaar men darj rabb kay kalaam kee tilaavat kee. 9us vaqt log roza rakhay huay thay, kyoonki baadshaah yahooyaqeem bin yoosiyaah kee hukoomat kay paanchven saal aur navven maheene [a] navambar ta disambar. men elaan kiya gaya tha ki yarooshalam kay baashinday aur yahoodaah kay deegar shaheron say aaay huay tamaam log rabb kay huzoor roza rakhen. 10jab baarook nay toomaar kee tilaavat kee to tamaam log haazir thay. us vaqt vah rabb kay ghar men shaahee muharrir jamariyaah bin saafan kay kamray men baitha tha. yah kamra rabb kay ghar kay oopar vaalay sahen men tha, aur sahen ka naya darvaaza vahaan say door naheen tha.
11toomaar men darj rabb kay tamaam paighaamaat sun kar jamariyaah bin saafan ka beta meekaayaah 12shaahee mahel men meeramunshee kay daftar men chala gaya. vahaan tamaam sarkaaree afsar baithay thay yaanee ileesma meeramunshee, dilaayaah bin samaayaah, ilnaatan bin akbor, jamariyaah bin saafan, sidaqiyaah bin hananiyaah aur baaqee tamaam mulaazim. 13meekaayaah nay unhen sab kuchh sunaaya jo baarook nay toomaar kee tilaavat karkay pesh kiya tha. 14tab tamaam buzurgon nay yahoodee bin nataniyaah bin salamiyaah bin kooshee ko baarook kay paas bhej kar usay ittila dee, “jis toomaar kee tilaavat aap nay logon kay saamnay kee usay lay kar hamaaray paas aaen.” chunaanchay baarook bin nairiyaah haath men toomaar ko thaamay huay un kay paas aaya.
15afsaron nay kaha, “zara baith kar hamaaray liyay bhee toomaar kee tilaavat karen.” chunaanchay baarook nay unhen sab kuchh padh kar suna diya. 16yaramiyaah kee tamaam peshgoiyaan suntay hee vah ghabra gaay aur dar kay maaray ek doosray ko dekhnay lagay. phir unhon nay baarook say kaha, “laazim hai ki ham baadshaah ko in tamaam baaton say aagaah karen. 17hamen zara bataaen, aap nay yah tamaam baaten kis tarah qalamband keen? kya yaramiyaah nay sab kuchh zabaanee aap ko pesh kiya?” 18baarook nay javaab diya, “jee, vah mujhay yah tamaam baaten sunaata gaya, aur main sab kuchh siyaahee say is toomaar men darj karta gaya.”
19yah sun kar afsaron nay baarook say kaha, “ab chalay jaaen, aap aur yaramiyaah donon chhup jaaen! kisee ko bhee pata na chalay ki aap kahaan hain.”
yahooyaqeem toomaar ko jala deta hai
20afsaron nay toomaar ko shaahee meeramunshee ileesma kay daftar men mahfooz rakh diya, phir darbaar men daakhil ho kar baadshaah ko sab kuchh bata diya. 21baadshaah nay yahoodee ko toomaar lay aanay ka hukm diya. yahoodee, ileesma meeramunshee kay daftar say toomaar ko lay kar baadshaah aur tamaam afsaron kee maujoodgee men us kee tilaavat karnay laga.
22choonki navaan maheenaa [b] taqreeban disambar. tha is liyay baadshaah mahel kay us hissay men baitha tha jo sardiyon kay mausam kay liyay banaaya gaya tha. us kay saamnay padee angeethee men aag jal rahee thee. 23jab bhee yahoodee teen ya chaar kaalam padhnay say faarigh hua to baadshaah nay munshee kee chhuree lay kar unhen toomaar say kaat liya aur aag men phaink diya. yahoodee padhta aur baadshaah kaatta gaya. aakhirkaar poora toomaar raakh ho gaya tha.
24go baadshaah aur us kay tamaam mulaazimon nay yah tamaam baaten suneen to bhee na vah ghabraaay, na unhon nay pareshaan ho kar apnay kapday phaaday. 25aur go ilnaatan, dilaayaah aur jamariyaah nay baadshaah say minnat kee ki vah toomaar ko na jalaaay to bhee us nay un kee na maanee 26balki baad men yarahemiel shaahzaada, siraayaah bin azreeel aur salamiyaah bin abdiel ko bheja taaki vah baarook munshee aur yaramiyaah nabee ko giriftaar karen. lekin rabb nay unhen chhupaaay rakha tha.
allaah ka kalaam dubaara qalamband kiya jaata hai
27baadshaah kay toomaar ko jalaanay kay baad rabb yaramiyaah say dubaara hamkalaam hua,
28“naya toomaar lay kar us men vahee tamaam paighaamaat qalamband kar jo us toomaar men darj thay jisay shaah-ay-yahoodaah nay jala diya tha. 29saath saath yahooyaqeem kay baaray men elaan kar ki rabb farmaata hai, ‘too nay toomaar ko jala kar yaramiyaah say shikaayat kee ki too nay is kitaab men kyoon likha hai ki shaah-ay-baabal zaroor a kar is mulk ko tabaah karega, aur is men na insaan, na haivaan rahega?’ 30chunaanchay yahoodaah kay baadshaah kay baaray men rabb ka faisla sun!
aainda us kay khaandaan ka koee bhee fard daaood kay takht par naheen baithega. yahooyaqeem kee laash baahar phainkee jaaegee, aur vahaan vah khulay maidaan men padee rahegee. koee bhee usay din kee taptee garmee ya raat kee shadeed sardee say bachaaay naheen rakhega. 31main usay us kay bachchon aur mulaazimon samet un kee bedeenee ka munaasib ajr doonga. kyoonki main un par aur yarooshalam aur yahoodaah kay baashindon par vah tamaam aafat naazil karoonga jis ka elaan main kar chuka hoon. afsos, unhon nay meree naheen sunee.”
32chunaanchay yaramiyaah nay naya toomaar lay kar usay baarook bin nairiyaah ko day diya. phir us nay baarook munshee say vah tamaam paighaamaat dubaara likhvaaay jo us toomaar men darj thay jisay shaah-ay-yahoodaah yahooyaqeem nay jala diya tha. un kay ilaava mazeed bahut say paighaamaat ka izaafa hua.