Yarmiyaah 35
yaramiyaah raikaabiyon ko aazmaata hai
1jab yahooyaqeem bin yoosiyaah abhee yahoodaah ka baadshaah tha to rabb mujh say hamkalaam hua, 2“raikaabee khaandaan kay paas ja kar unhen rabb kay ghar kay sahen kay kisee kamray men aanay kee daavat day. jab vah aaen to unhen mai pila day.”
3chunaanchay main yaazaniyaah bin yaramiyaah bin habassiniyaah kay paas gaya aur usay us kay bhaaiyon aur tamaam beton yaanee raikaabiyon kay pooray gharaanay samet 4rabb kay ghar men laaya. ham hanaan kay beton kay kamray men baith gaay. hanaan mard-ay-khuda yijdaliyaah ka beta tha. yah kamra buzurgon kay kamray say mulhiq aur rabb kay ghar kay darbaan maasiyaah bin salloom kay kamray kay oopar tha. 5vahaan main nay mai kay jaam aur piyaalay raikaabee aadmiyon ko pesh karkay un say kaha, “aaen, kuchh mai pee len.”
6lekin unhon nay inkaar karkay kaha, “ham mai naheen peetay, kyoonki hamaaray baap yoondab bin raikaab nay hamen aur hamaaree aulaad ko mai peenay say mana kiya hai. 7us nay hamen yah hidaayat bhee dee, ‘na makaan taameer karna, na beej bona aur na angoor ka baagh lagaana. yah cheezen kabhee bhee tumhaaree milkiyat men shaamil na hon, kyoonki laazim hai ki tum hamesha khaimon men zindagee guzaaro. phir tum lambay arsay tak us mulk men rahogay jis men tum mehamaan ho.’ 8chunaanchay ham apnay baap yoondab bin raikaab kee in tamaam hidaayaat kay taabay rahetay hain. na ham aur na hamaaree beeviyaan ya bachchay kabhee mai peetay hain. 9ham apnee rihaaish kay liyay makaan naheen banaatay, aur na angoor kay baagh, na khet ya faslen hamaaree milkiyat men hotee hain. 10is kay bajaay ham aaj tak khaimon men rahetay hain. jo bhee hidaayat hamaaray baap yoondab nay hamen dee us par ham pooray utray hain. 11ham sirf aarizee taur par shaher men thaheray huay hain. kyoonki jab shaah-ay-baabal nabookadnazzar is mulk men ghus aaya to ham bolay, ‘aaen, ham yarooshalam shaher men jaaen taaki baabal aur shaam kee faujon say bach jaaen.’ ham sirf isee liyay yarooshalam men thaheray huay hain.”
12tab rabb ka kalaam mujh par naazil hua, 13“rabb-ul-afwaaj jo israaeel ka khuda hai farmaata hai ki yahoodaah aur yarooshalam kay baashindon kay paas ja kar kah, ‘tum meree tarbiyat kyoon qabool naheen kartay? tum meree kyoon naheen suntay? 14yoondab bin raikaab par ghaur karo. us nay apnee aulaad ko mai peenay say mana kiya, is liyay us ka gharaana aaj tak mai naheen peeta. yah log apnay baap kee hidaayaat kay taabay rahetay hain. is kay muqaablay men tum log kya kar rahay ho? go main baar baar tum say hamkalaam hua to bhee tum nay meree naheen sunee.
15baar baar main apnay nabiyon ko tumhaaray paas bhejta raha taaki meray khaadim tumhen aagaah kartay rahen ki har ek apnee buree raah tark karkay vaapas aaay! apna chaal-chalan durust karo aur ajnabee maaboodon kee pairvee karkay un kee khidmat mat karo! phir tum us mulk men rahogay jo main nay tumhen aur tumhaaray baapdaada ko bakhsh diya tha. lekin tum nay na tavajjuh dee, na meree sunee. 16yoondab bin raikaab kee aulaad apnay baap kee hidaayaat par pooree utree hai, lekin is qaum nay meree naheen sunee.’
17is liyay rabb jo lashkaron ka aur israaeel ka khuda hai farmaata hai, ‘suno! main yahoodaah par aur yarooshalam kay har baashinday par vah tamaam aafat naazil karoonga jis ka elaan main nay kiya hai. go main un say hamkalaam hua to bhee unhon nay na sunee. main nay unhen bulaaya, lekin unhon nay javaab na diya’.”
18lekin raikaabiyon say yaramiyaah nay kaha, “rabb-ul-afwaaj jo israaeel ka khuda hai farmaata hai, ‘tum apnay baap yoondab kay hukm par pooray utar kar us kee har hidaayat aur har hukm par amal kartay ho.’ 19is liyay rabb-ul-afwaaj jo israaeel ka khuda hai farmaata hai, ‘yoondab bin raikaab kee aulaad men say hamesha koee na koee hoga jo meray huzoor khidmat karega’.”