Yarmiyaah 34

sidaqiyaah baabal kee qaid men mar jaaegaa

¹rabb us vaqt yaramiyaah say hamkalaam hua jab shaah-ay-baabal nabookadnazzar apnee pooree fauj lay kar yarooshalam aur yahoodaah kay tamaam shaheron par hamla kar raha tha. us kay saath duniya kay un tamaam mamaalik aur qaumon kee faujen theen jinhen us nay apnay taabay kar liya tha.

²“rabb jo israaeel ka khuda hai farmaata hai ki yahoodaah kay baadshaah sidaqiyaah kay paas ja kar usay bata, rabb farmaata hai ki main is shaher yarooshalam ko shaah-ay-baabal kay havaalay karnay ko hoon, aur vah isay nazar-ay-aatish kar dega. ³too bhee us kay haath say naheen bachega balki zaroor pakda jaaega. tujhay us kay havaalay kiya jaaega, aur too shaah-ay-baabal ko apnee aankhon say dekhega, vah teray roo-ba-roo tujh say baat karega. phir tujhay baabal jaana padega. ⁴lekin ai sidaqiyaah baadshaah, rabb ka yah farmaan bhee sun! rabb teray baaray men farmaata hai ki too talvaar say naheen ⁵balki tabaee maut marega, aur log usee tarah teree taazeem men lakdee ka bada dher bana kar aag lagaaengay jis tarah teray baapdaada kay liyay kartay aaay hain. vah tujh par bhee maatam karengay aur kahengay, ‘haay, meray aaqa’!” yah rabb ka farmaan hai.

⁶yaramiyaah nabee nay sidaqiyaah baadshaah ko yarooshalam men yah paighaam sunaaya. ⁷us vaqt baabal kee fauj yarooshalam, lakees aur azeeqa say lad rahee thee. yahoodaah kay tamaam qil’aaband shaheron men say yahee teen ab tak qaaim rahay thay.

ghulaamon kay saath bevafaaee

⁸rabb ka kalaam ek baar phir yaramiyaah par naazil hua. us vaqt sidaqiyaah baadshaah nay yarooshalam kay baashindon kay saath ahd baandha tha ki ham apnay hamvatan ghulaamon ko aazaad kar dengay. ⁹har ek nay apnay hamvatan ghulaamon aur laundiyon ko aazaad karnay ka vaada kiya tha, kyoonki sab muttafiq huay thay ki ham apnay hamvatanon ko ghulaamee men naheen rakhengay. ¹⁰tamaam buzurg aur baaqee tamaam log yah karnay par raazee huay thay. yah ahd karnay par unhon nay apnay ghulaamon ko vaaqaee aazaad kar diya tha. ¹¹lekin baad men vah apna iraada badal kar apnay aazaad kiay huay ghulaamon ko vaapas laaay aur unhen dubaara apnay ghulaam bana liya tha. ¹²tab rabb ka kalaam yaramiyaah par naazil hua.

¹³“rabb jo israaeel ka khuda hai farmaata hai, ‘jab main tumhaaray baapdaada ko misr kee ghulaamee say nikaal laaya to main nay un say ahd baandha. us kee ek shart yah thee ¹⁴ki jab kisee hamvatan nay apnay aap ko bech kar chhah saal tak teree khidmat kee hai to laazim hai ki saatven saal too usay aazaad kar day. yah shart tum sab par saadiq aatee hai. lekin afsos, tumhaaray baapdaada nay na meree sunee, na meree baat par dhyaan diya. ¹⁵ab tum nay pachhta kar vah kuchh kiya jo mujhay pasand tha. har ek nay elaan kiya ki ham apnay hamvatan ghulaamon ko aazaad kar dengay. tum us ghar men aaay jis par meray naam ka thappa laga hai aur ahd baandh kar meray huzoor us vaaday kee tasdeeq kee. ¹⁶lekin ab tum nay apna iraada badal kar meray naam kee behuramtee kee hai. apnay ghulaamon aur laundiyon ko aazaad kar denay kay baad har ek unhen apnay paas vaapas laaya hai. pahelay tum nay unhen bataaya ki jahaan jee chaaho chalay jaao, aur ab tum nay unhen dubaara ghulaam bannay par majboor kiya hai.’

¹⁷chunaanchay suno jo kuchh rabb farmaata hai! ‘tum nay meree naheen sunee, kyoonki tum nay apnay hamvatan ghulaamon ko aazaad naheen chhoda. is liyay ab rabb tumhen talvaar, muhalak beemaariyon aur kaal kay liyay aazaad chhod dega. tumhen dekh kar duniya kay tamaam mamaalik kay rongtay khaday ho jaaengay.’ yah rabb ka farmaan hai. ^18-19 ‘dekho, yahoodaah aur yarooshalam kay buzurgon, darbaariyon, imaamon aur avaam nay meray saath ahd baandha. is kee tasdeeq karnay kay liyay vah ek bachhday ko do hisson men taqseem karkay un kay darmiyaan say guzar gaay. to bhee unhon nay ahd tod kar us kee sharaait pooree na keen. chunaanchay main honay doonga ki vah us bachhday kee maanind ho jaaen jis kay do hisson men say vah guzar gaay hain. ²⁰main unhen un kay dushmanon kay havaalay kar doonga, un hee kay havaalay jo unhen jaan say maarnay kay darpai hain. un kee laashen parindon aur janglee jaanvaron kee khuraak ban jaaengee.

²¹main yahoodaah kay baadshaah sidaqiyaah aur us kay afsaron ko un kay dushman kay havaalay kar doonga, un hee kay havaalay jo unhen jaan say maarnay par tulay huay hain. vah yaqeenan shaah-ay-baabal nabookadnazzar kee fauj kay qabzay men a jaaengay. kyoonki go faujee is vaqt peechhay hat gaay hain, ²²lekin meray hukm par vah vaapas a kar yarooshalam par hamla karengay. aur is martaba vah us par qabza karkay usay nazar-ay-aatish kar dengay. main yahoodaah kay shaheron ko bhee yoon khaak men mila doonga ki koee un men naheen rah sakega’.” yah rabb ka farmaan hai.