Yarmiyaah 33

yarooshalam men dubaara khushee hogee

¹yaramiyaah ab tak shaahee muhaafizon kay sahen men giriftaar tha ki rabb ek baar phir us say hamkalaam hua, ²“jo sab kuchh khalaq karta, tashkeel deta aur qaaim rakhta hai us ka naam rabb hai. yahee rabb farmaata hai, ³mujhay pukaar to main tujhay javaab men aisee azeem aur naaqaabil-ay-fahem baaten bayaan karoonga jo too naheen jaanta.

⁴kyoonki rabb jo israaeel ka khuda hai farmaata hai ki tum nay is shaher kay makaanon balki chand ek shaahee makaanon ko bhee dha diya hai taaki un kay pattharon aur lakdee say faseel ko mazboot karo aur shaher ko dushman kay pushton aur talvaar say bachaaay rakho. ⁵go tum baabal kee fauj say ladna chaahatay ho, lekin shaher kay ghar israaeeliyon kee laashon say bhar jaaengay. kyoonki un hee par main apna ghazab naazil karoonga. yarooshalam kee tamaam bedeenee kay baais main nay apna munh us say chhupa liya hai.

⁶lekin baad men main usay shifa day kar tandurustee bakhshoonga, main us kay baashindon ko sehat ata karoonga aur un par derpa salaamatee aur vafaadaaree ka izhaar karoonga. ⁷kyoonki main yahoodaah aur israaeel ko bahaal karkay unhen vaisay taameer karoonga jaisay pahelay thay. ⁸main unhen un kee tamaam bedeenee say paak-saaf karkay un kee tamaam sarkashee aur tamaam gunaahon ko muaaf kar doonga. ⁹tab yarooshalam pooree duniya men meray liyay musarrat, shuharat, taareef aur jalaal ka baais banega. duniya kay tamaam mamaalik meree us par meharbaanee dekh kar mut’assir ho jaaengay. vah ghabra kar kaamp uthengay jab unhen pata chalega ki main nay yarooshalam ko kitnee barkat aur sukoon muhayya kiya hai.

¹⁰tum kahetay ho, ‘hamaara shaher veeraan-o-sunsaan hai. us men na insaan, na haivaan rahetay hain.’ lekin rabb farmaata hai ki yarooshalam aur yahoodaah kay deegar shaheron kee jo galiyaan is vaqt veeraan aur insaan-o-haivaan say khaalee hain, ¹¹un men dubaara khushee-o-shaadmaanee, doolhay dulhan kee aavaaz aur rabb kay ghar men shukrguzaaree kee qurbaaniyaan pahunchaanay vaalon kay geet sunaaee dengay. us vaqt vah gaaengay, ‘rab-ul-afwaaj ka shukr karo, kyoonki rabb bhala hai, aur us kee shafqat abdee hai.’ kyoonki main is mulk ko pahelay kee tarah bahaal kar doonga. yah rabb ka farmaan hai.

¹²rabb-ul-afwaaj farmaata hai ki filahaal yah maqaam veeraan aur insaan-o-haivaan say khaalee hai. lekin aainda yahaan aur baaqee tamaam shaheron men dubaara aisee charaagaahen hongee jahaan gallaabaan apnay revdon ko charaaengay. ¹³tab pooray mulk men charvaahay apnay revdon ko gintay aur sambhaaltay huay nazar aaengay, khwaah pahaadee ilaaqay kay shaheron ya maghrib kay nishebee pahaadee ilaaqay men dekho, khwaah dasht-ay-najab ya binyameen kay qabaailee ilaaqay men maaloom karo, khwaah yarooshalam kay deehaat ya yahoodaah kay baaqee shaheron men darayaaft karo. yah rabb ka farmaan hai.

abdee ahd ka vaadaa

¹⁴rabb farmaata hai ki aisa vaqt aanay vaala hai jab main vah achchha vaada poora karoonga jo main nay israaeel kay gharaanay aur yahoodaah kay gharaanay say kiya hai. ¹⁵us vaqt main daaood kee nasal say ek raastbaaz kompal phootnay doonga, aur vahee mulk men insaaf aur raastee qaaim karega. ¹⁶un dinon men yahoodaah ko chhutkaara milega aur yarooshalam pur’amn zindagee guzaarega. tab yarooshalam ‘rabb hamaaree raastee’ kahelaaega. ¹⁷kyoonki rabb farmaata hai ki israaeel kay takht par baithnay vaala hamesha hee daaood kee nasal ka hoga. ¹⁸isee tarah rabb kay ghar men khidmatguzaar imaam hamesha hee laavee kay qabeelay kay hongay. vahee mutvaatir meray huzoor bhasm honay vaalee qurbaaniyaan aur ghalla aur zabah kee qurbaaniyaan pesh karengay.”

¹⁹rabb ek baar phir yaramiyaah say hamkalaam hua, ²⁰“rabb farmaata hai ki main nay din aur raat say ahd baandha hai ki vah muqarrara vaqt par aur tarteebavaar guzren. koee is ahd ko tod naheen sakta. ²¹isee tarah main nay apnay khaadim daaood say bhee ahd baandh kar vaada kiya ki israaeel ka baadshaah hamesha usee kee nasal ka hoga. neez, main nay laavee kay imaamon say bhee ahd baandh kar vaada kiya ki rabb kay ghar men khidmatguzaar imaam hamesha laavee kay qabeelay kay hee hongay. raat aur din say bandhay huay ahd kee tarah in ahdon ko bhee toda naheen ja sakta. ²²main apnay khaadim daaood kee aulaad aur apnay khidmatguzaar laaviyon ko sitaaron aur samundar kee ret jaisa beshumaar bana doonga.”

²³rabb yaramiyaah say ek baar phir hamkalaam hua, ²⁴“kya tujhay logon kee baaten maaloom naheen hueen? yah kah rahay hain, ‘go rabb nay israaeel aur yahoodaah ko chun kar apnee qaum bana liya tha, lekin ab us nay donon ko radd kar diya hai.’ yoon vah meree qaum ko haqeer jaantay hain balki isay ab say qaum hee naheen samajhtay.” ²⁵lekin rabb farmaata hai, “jo ahd main nay din aur raat say baandha hai vah main naheen todoonga, na kabhee aasmaan-o-zameen kay muqarrara usool mansookh karoonga. ²⁶isee tarah yah mumkin hee naheen ki main yaaqoob aur apnay khaadim daaood kee aulaad ko kabhee radd karoon. naheen, main hamesha hee daaood kee nasal men say kisee ko takht par bithaaoonga taaki vah ibraaheem, ishaaq aur yaaqoob kee aulaad par hukoomat karay, kyoonki main unhen bahaal karkay un par taras khaaoonga.”