Yarmiyaah 32
yaramiyaah muhaasaray kay dauraan khet khareedta hai
1yahoodaah kay baadshaah sidaqiyaah kee hukoomat kay dasven saal men rabb yaramiyaah say hamkalaam hua. us vaqt nabookadnazzar jo 18 saal say baabal ka baadshaah thaa 2apnee fauj kay saath yarooshalam ka muhaasara kar raha tha. yaramiyaah un dinon men shaahee mahel kay muhaafizon kay sahen men qaid tha. 3sidaqiyaah nay yah kah kar usay giriftaar kiya tha, “too kyoon is qism kee peshgoee sunaata hai? too kaheta hai, ‘rabb farmaata hai ki main is shaher ko shaah-ay-baabal kay haath men denay vaala hoon. jab vah us par qabza karegaa 4to sidaqiyaah baabal kee fauj say naheen bachega. usay shaah-ay-baabal kay havaalay kar diya jaaega, aur vah us kay roo-ba-roo us say baat karega, apnee aankhon say usay dekhega. 5shaah-ay-baabal sidaqiyaah ko baabal lay jaaega, aur vahaan vah us vaqt tak rahega jab tak main usay dubaara qabool na karoon. rabb farmaata hai ki agar tum baabal kee fauj say lado to naakaam rahogay’.”
6jab rabb ka kalaam yaramiyaah par naazil hua to yaramiyaah nay kaha, “rabb mujh say hamkalaam hua, 7‘tera chachaazaad bhaaee hanam-el bin salloom teray paas a kar kahega ki antot men mera khet khareed len. aap sab say qareebee rishtedaar hain, is liyay usay khareedna aap ka haq balki farz bhee hai taaki zameen hamaaray khaandaan kee milkiyat rahe [a] lafzee tarjuma : ivzaana day kar usay chhudaana (taaki khaandaan ka hissa rahay) aap hee ka haq hai. .’ 8aisa hee hua jis tarah rabb nay farmaaya tha. mera chachaazaad bhaaee hanam-el shaahee muhaafizon kay sahen men aaya aur mujh say kaha, ‘binyameen kay qabeelay kay shaher antot men mera khet khareed len. yah khet khareedna aap ka mauroosee haq balki farz bhee hai taaki zameen hamaaray khaandaan kee milkiyat rahay. aaen, usay khareed len!’
tab main nay jaan liya ki yah vahee baat hai jo rabb nay farmaaee thee. 9chunaanchay main nay apnay chachaazaad bhaaee hanam-el say antot ka khet khareed kar usay chaandee kay 17 sikkay day diay. 10main nay intiqaalanaama likh kar us par muhar lagaaee, phir chaandee kay sikkay tol kar apnay bhaaee ko day diay. main nay gavaah bhee bulaaay thay taaki vah pooree kaar-ravaaee kee tasdeeq karen. 11-12 is kay baad main nay muharshuda intiqaalanaama tamaam sharaait aur qavaaid samet baarook bin nairiyaah bin mahsiyaah kay sapurd kar diya. saath saath main nay usay ek naqal bhee dee jis par muhar naheen lagee thee. hanam-el, intiqaalanaamay par dastakhat karnay vaalay gavaah aur sahen men haazir baaqee hamvatan sab is kay gavaah thay. 13un kay dekhtay dekhtay main nay baarook ko hidaayat dee,
14‘rab-ul-afwaaj jo israaeel ka khuda hai farmaata hai ki muharshuda intiqaalanaama aur us kee naqal lay kar mittee kay bartan men daal day taaki lambay arsay tak mahfooz rahen. 15kyoonki rabb-ul-afwaaj jo israaeel ka khuda hai farmaata hai ki ek vaqt aaega jab is mulk men dubaara ghar, khet aur angoor kay baagh khareeday jaaengay.’
yaramiyaah allaah kee tamjeed karta hai
16baarook bin nairiyaah ko intiqaalanaama denay kay baad main nay rabb say dua kee,
17‘ai rabb qaadir-ay-mutlaq, too nay apna haath badha kar badee qudrat say aasmaan-o-zameen ko banaaya, teray liyay koee bhee kaam naamumkin naheen. 18too hazaaron par shafqat karta aur saath saath bachchon ko un kay vaalidain kay gunaahon kee saza deta hai. ai azeem aur qaadir khuda jis ka naam rabb-ul-afwaaj hai, 19teray maqaasid azeem aur teray kaam zabardast hain, teree aankhen insaan kee tamaam raahon ko dekhtee rahetee hain. too har ek ko us kay chaal-chalan aur aamaal ka munaasib ajr deta hai.
20misr men too nay ilaahee nishaan aur mojizay dikhaaay, aur tera yah silsila aaj tak jaaree raha hai, israaeel men bhee aur baaqee qaumon men bhee. yoon teray naam ko vah izzat-o-jalaal mila jo tujhay aaj tak haasil hai. 21too ilaahee nishaan aur mojizay dikha kar apnee qaum israaeel ko misr say nikaal laaya. too nay apna haath badha kar apnee azeem qudrat misriyon par zaahir kee to un par shadeed dahshat taaree huee. 22tab too nay apnee qaum ko yah mulk bakhsh diya jis men doodh aur shahed kee kasrat thee aur jis ka vaada too nay qasam kha kar un kay baapdaada say kiya tha.
23lekin jab hamaaray baapdaada nay mulk men daakhil ho kar us par qabza kiya to unhon nay na teree sunee, na teree shareeat kay mutaabiq zindagee guzaaree. jo kuchh bhee too nay unhen karnay ko kaha tha us par unhon nay amal na kiya. nateejay men too un par yah aafat laaya. 24dushman mittee kay pushtay bana kar faseel kay qareeb pahunch chuka hai. ham talvaar, kaal aur muhalak beemaariyon say itnay kamzor ho gaay hain ki jab baabal kee fauj shaher par hamla karegee to vah us kay qabzay men aaega. jo kuchh bhee too nay farmaaya tha vah pesh aaya hai. too khud is ka gavaah hai. 25lekin ai rabb qaadir-ay-mutlaq, kamaal hai ki go shaher ko baabal kee fauj kay havaalay kiya jaaega to bhee too mujh say hamkalaam hua hai ki chaandee day kar khet khareed lay aur gavaahon say kaar-ravaaee kee tasdeeq karva’.”
rabb ka javaab
26tab rabb ka kalaam yaramiyaah par naazil hua, 27“dekh, main rabb aur tamaam insaanon ka khuda hoon. to phir kya koee kaam hai jo mujh say naheen ho sakta?” 28chunaanchay rabb farmaata hai, “main is shaher ko baabal aur us kay baadshaah nabookadnazzar kay havaalay kar doonga. vah zaroor us par qabza karega. 29baabal kay jo faujee is shaher par hamla kar rahay hain is men ghus kar sab kuchh jala dengay, sab kuchh nazar-ay-aatish karengay. tab vah tamaam ghar raakh ho jaaengay jin kee chhaton par logon nay baal devta kay liyay bakhoor jala kar aur ajnabee maaboodon ko mai kee nazren pesh karkay mujhay taish dilaaya.”
30rabb farmaata hai, “israaeel aur yahoodaah kay qabeelay javaanee say lay kar aaj tak vahee kuchh kartay aaay hain jo mujhay naapsand hai. apnay haathon kay kaam say vah mujhay baar baar ghussa dilaatay rahay hain. 31yarooshalam kee bunyaaden daalnay say lay kar aaj tak is shaher nay mujhay hadd say ziyaada mushtail kar diya hai. ab laazim hai ki main usay nazron say door kar doon. 32kyoonki israaeel aur yahoodaah kay baashindon nay apnee buree harkaton say mujhay taish dilaaya hai, khwaah baadshaah ho ya mulaazim, khwaah imaam ho ya nabee, khwaah yahoodaah ho ya yarooshalam. 33unhon nay apna munh mujh say pher kar meree taraf rujoo karnay say inkaar kiya hai. go main unhen baar baar taaleem deta raha to bhee vah sunnay ya meree tarbiyat qabool karnay kay liyay tayyaar naheen thay. 34na sirf yah balki jis ghar par meray naam ka thappa laga hai us men unhon nay apnay ghinaunay buton ko rakh kar us kee behuramtee kee hai. 35vaadee-ay-bin-hinnoom kee oonchee jagahon par unhon nay baal devta kee qurbaangaahen taameer keen taaki vahaan apnay betay-betiyon ko malik devta kay liyay qurbaan karen. main nay unhen aisee qaabil-ay-ghin harkaten karnay ka hukm naheen diya tha, balki mujhay is ka khayaal tak naheen aaya. yoon unhon nay yahoodaah ko gunaah karnay par uksaaya hai.
36is vaqt tum kah rahay ho, ‘yah shaher zaroor shaah-ay-baabal kay qabzay men a jaaega, kyoonki talvaar, kaal aur muhalak beemaariyon nay hamen kamzor kar diya hai.’ lekin ab shaher kay baaray men rabb ka farmaan suno, jo israaeel ka khuda hai!
37beshak main baday taish men a kar shaher kay baashindon ko mukhtalif mamaalik men muntashir kar doonga, lekin main unhen un jagahon say phir jama karkay vaapas bhee laaoonga taaki vah dubaara yahaan sukoon kay saath rah saken. 38tab vah meree qaum hongay, aur main un ka khuda hoonga. 39main honay doonga ki vah soch aur chaal-chalan men ek ho kar har vaqt mera khauf maanengay. kyoonki unhen maaloom hoga ki aisa karnay say hamen aur hamaaree aulaad ko barkat milegee.
40main un kay saath abdee ahd baandh kar vaada karoonga ki un par shafqat karnay say baaz naheen aaoonga. saath saath main apna khauf un kay dilon men daal doonga taaki vah mujh say door na ho jaaen. 41unhen barkat dena meray liyay khushee ka baais hoga, aur main vafaadaaree aur pooray dil-o-jaan say unhen paneeree kee tarah is mulk men dubaara laga doonga.” 42kyoonki rabb farmaata hai, “main hee nay yah badee aafat is qaum par naazil kee, aur main hee unhen un tamaam barkaton say navaazoonga jin ka vaada main nay kiya hai. 43beshak tum is vaqt kahetay ho, ‘haay, hamaara mulk veeraan-o-sunsaan hai, us men na insaan aur na haivaan rah gaya hai, kyoonki sab kuchh baabal kay havaalay kar diya gaya hai.’ lekin main farmaata hoon ki pooray mulk men dubaara khet khareede 44aur farokht kiay jaaengay. log maamool kay mutaabiq intiqaalanaamay likh kar un par muhar lagaaengay aur kaar-ravaaee kee tasdeeq kay liyay gavaah bulaaengay. tamaam ilaaqay yaanee binyameen kay qabaailee ilaaqay men, yarooshalam kay deehaat men, yahoodaah aur pahaadee ilaaqay kay shaheron men, maghrib kay nishebee pahaadee ilaaqay kay shaheron men aur dasht-ay-najab kay shaheron men aisa hee kiya jaaega. main khud un kee badnaseebee khatm karoonga.” yah rabb ka farmaan hai.