Yarmiyaah 31
jilaavatanon kee vaapsee
1rabb farmaata hai, “us vaqt main tamaam israaeelee gharaanon ka khuda hoonga, aur vah meree qaum hongay.” 2rabb farmaata hai, “talvaar say bachay huay logon ko registaan men hee mera fazl haasil hua hai, aur israaeel apnee aaraamgaah kay paas pahunch raha hai.”
3rabb nay door say israaeel par zaahir ho kar farmaaya, “main nay tujhay hamesha hee piyaar kiya hai, is liyay main tujhay badee shafqat say apnay paas khainch laaya hoon. 4ai kunvaaree israaeel, teree naay siray say taameer ho jaaegee, kyoonki main khud tujhay taameer karoonga. too dubaara apnay dafon say aaraasta ho kar khushee manaanay vaalon kay loknaach kay liyay niklegee. 5too dubaara saamriya kee pahaadiyon par angoor kay baagh lagaaegee. aur jo paudon ko lagaaengay vah khud un kay phal say lutf’andoz hongay. 6kyoonki vah din aanay vaala hai jab ifraaeem kay pahaadee ilaaqay kay paheredaar aavaaz day kar kahengay, ‘aao ham siyyoon kay paas jaaen taaki rabb apnay khuda ko sijda karen’.”
7kyoonki rabb farmaata hai, “yaaqoob ko dekh kar khushee manaao! qaumon kay sarbaraah ko dekh kar shaadmaanee ka naara maaro! buland aavaaz say allaah kee hamd-o-sana karkay kaho, ‘ai rabb, apnee qaum ko bacha, israaeel kay bachay huay hissay ko chhutkaara day.’ 8kyoonki main unhen shimaalee mulk say vaapas laaoonga, unhen duniya kee intiha say jama karoonga. andhay aur langday un men shaamil hongay, haamila aur janm denay vaalee aurten bhee saath chalengee. un ka bada hujoom vaapas aaega. 9aur jab main unhen vaapas laaoonga to vah rotay huay aur iltijaaen kartay huay meray peechhay chalengay. main unhen nadiyon kay kinaaray kinaaray aur aisay hamvaar raaston par vaapas lay chaloonga, jahaan thokar khaanay ka khatra naheen hoga. kyoonki main israaeel ka baap hoon, aur ifraaeem [a] yahaan ifraaeem israaeel ka doosra naam hai. mera pahelautha hai.
10ai qaumo, rabb ka kalaam suno! doordaraaz jazeeron tak elaan karo, ‘jis nay israaeel ko muntashir kar diya hai vah usay dubaara jama karega aur charvaahay kee see fikr rakh kar us kee gallaabaanee karega.’ 11kyoonki rabb nay fidya day kar yaaqoob ko bachaaya hai, us nay ivzaana day kar usay zoraavar kay haath say chhudaaya hai. 12tab vah a kar siyyoon kee bulandee par khushee kay naaray lagaaengay, un kay chiharay rabb kee barkaton ko dekh kar chamak uthengay. kyoonki us vaqt vah unhen anaaj, naee mai, zaitoon kay tel aur javaan bhed-bakriyon aur gaay-bailon kee kasrat say navaazega. un kee jaan seraab baagh kee tarah sarsabz hogee, aur un kee nidhaal haalat sambhal jaaegee. 13phir kunvaariyaan khushee kay maaray loknaach naachengee, javaan aur buzurg aadmee bhee us men hissa lengay. yoon main un ka maatam khushee men badal doonga, main un kay dilon say gham nikaal kar unhen apnee tasallee aur shaadmaanee say bhar doonga.” 14rabb farmaata hai, “main imaamon kee jaan ko tar-o-taaza karoonga, aur meree qaum meree barkaton say ser ho jaaegee.”
15rabb farmaata hai, “raama men shor mach gaya hai, ronay peetnay aur shadeed maatam kee aavaazen. raakhil apnay bachchon kay liyay ro rahee hai aur tasallee qabool naheen kar rahee, kyoonki vah halaak ho gaay hain.”
16lekin rabb farmaata hai, “ronay aur aansoo bahaanay say baaz a, kyoonki tujhay apnee mehanat ka ajr milega. yah rabb ka vaada hai ki vah dushman kay mulk say laut aaengay. 17tera mustaqbil puraummeed hoga, kyoonki teray bachchay apnay vatan men vaapas aaengay.” yah rabb ka farmaan hai.
18“israaeel [b] lafzee tarjuma : ifraaeem. kee girya-o-zaaree mujh tak pahunch gaee hai. kyoonki vah kaheta hai, ‘haay, too nay meree sakht taadeeb kee hai. meree yoon tarbiyat huee hai jis tarah bachhday kee hotee hai jab us kee gardan par pahelee baar jooa rakha jaata hai. ai rabb, mujhay vaapas la taaki main vaapas aaoon, kyoonki too hee rabb mera khuda hai. 19meray vaapas aanay par mujhay nadaamat mahsoos huee, aur samajh aanay par main apna seena peetnay laga. mujhay sharmindagee aur rusvaaee ka shadeed ihsaas ho raha hai, kyoonki ab main apnee javaanee kay sharmanaak phal kee fasal kaat raha hoon.’ 20lekin rabb farmaata hai ki israaeel mera qeemtee beta, mera laadla hai. go main baar baar us kay khilaaf baaten karta hoon to bhee usay yaad karta raheta hoon. is liyay mera dil us kay liyay tadapta hai, aur laazim hai ki main us par taras khaaoon.
21ai meree qaum, aisay nishaan khaday kar jin say logon ko saheeh raastay ka pata chalay! us pakkee sadak par dhyaan day jis par too nay safar kiya hai. ai kunvaaree israaeel, vaapas a, apnay in shaheron men laut a! 22ai bevafa betee, too kab tak bhataktee phiregee? rabb nay mulk men ek naee cheez paida kee hai, yah ki aainda aurat aadmee kay gird rahegee.”
israaeel aur yahoodaah dubaara aabaad ho jaaenge
23rabb-ul-afwaaj jo israaeel ka khuda hai farmaata hai, “jab main israaeeliyon ko bahaal karoonga to mulk-ay-yahoodaah aur us kay shaheron kay baashinday dubaara kahengay, ‘ai raastee kay ghar, ai muqaddas pahaad, rabb tujhay barkat day!’ 24tab yahoodaah aur us kay shaher dubaara aabaad hongay. kisaan bhee mulk men basengay, aur vah bhee jo apnay revdon kay saath idhar udhar phirtay hain. 25kyoonki main thakemaandon ko naee taaqat doonga aur ghash khaanay vaalon ko tar-o-taaza karoonga.”
26tab main jaag utha aur chaaron taraf dekha. meree neend kitnee meethee rahee thee!
27rabb farmaata hai, “vah vaqt aanay vaala hai jab main israaeel kay gharaanay aur yahoodaah kay gharaanay ka beej bo kar insaan-o-haivaan kee taadaad badha doonga. 28pahelay main nay baday dhyaan say unhen jad say ukhaad diya, gira diya, dha diya, haan tabaah karkay khaak men mila diya. lekin aainda main utnay hee dhyaan say unhen taameer karoonga, unhen paneeree kee tarah laga doonga.” yah rabb ka farmaan hai. 29“us vaqt log yah kahenay say baaz aaengay ki vaalidain nay khattay angoor khaaay, lekin daant un kay bachchon kay khattay ho gaay hain. 30kyoonki ab say khattay angoor khaanay vaalay kay apnay hee daant khattay hongay. ab say usee ko saza-ay-maut dee jaaegee jo qusoorvaar hai.”
naya ahd
31rabb farmaata hai, “aisay din a rahay hain jab main israaeel kay gharaanay aur yahoodaah kay gharaanay kay saath ek naya ahd baandhoonga. 32yah us ahd kee maanind naheen hoga jo main nay un kay baapdaada kay saath us din baandha tha jab main un ka haath pakad kar unhen misr say nikaal laaya. kyoonki unhon nay vah ahd tod diya, go main un ka maalik tha.” yah rabb ka farmaan hai.
33“jo naya ahd main un dinon kay baad israaeel kay gharaanay kay saath baandhoonga us kay tahet main apnee shareeat un kay andar daal kar un kay dilon par kanda karoonga. tab main hee un ka khuda hoonga, aur vah meree qaum hongay. 34us vaqt say is kee zaroorat naheen rahegee ki koee apnay padosee ya bhaaee ko taaleem day kar kahay, ‘rabb ko jaan lo.’ kyoonki chhotay say lay kar baday tak sab mujhay jaanengay. kyoonki main un ka qusoor muaaf karoonga aur aainda un kay gunaahon ko yaad naheen karoonga.” yah rabb ka farmaan hai.
35rabb farmaata hai, “main hee nay muqarrar kiya hai ki din kay vaqt sooraj chamkay aur raat kay vaqt chaand sitaaron samet raushnee day. main hee samundar ko yoon uchhaal deta hoon ki us kee maujen garajnay lagtee hain. rabb-ul-afwaaj hee mera naam hai.” 36rabb farmaata hai, “jab tak yah qudratee usool meray saamnay qaaim rahengay us vaqt tak israaeel qaum meray saamnay qaaim rahegee. 37kya insaan aasmaan kee paimaaish kar sakta hai? ya kya vah zameen kee bunyaadon kee tafteesh kar sakta hai? hargiz naheen! isee tarah yah mumkin hee naheen ki main israaeel kee pooree qaum ko us kay gunaahon kay sabab say radd karoon.” yah rabb ka farmaan hai.
yarooshalam ko naay siray say taameer kiya jaaegaa
38rabb farmaata hai, “vah vaqt aanay vaala hai jab yarooshalam ko rabb kay liyay naay siray say taameer kiya jaaega. tab us kee faseel hanan-el kay burj say lay kar konay kay darvaazay tak tayyaar ho jaaegee. 39vahaan say shaher kee sarhadd seedhee jareeb pahaadee tak pahunchegee, phir joa kee taraf mudegee. 40us vaqt jo vaadee laashon aur bhasm huee charbee kee raakh say naapaak huee hai vah pooray taur par rabb kay liyay makhsoos-o-muqaddas hogee. us kee dhalaanon par kay tamaam khet bhee vaadee-ay-qidron tak shaamil hongay, balki mashriq men ghoday kay darvaazay kay konay tak sab kuchh muqaddas hoga. aainda shaher ko na kabhee dubaara jad say ukhaada jaaega, na tabaah kiya jaaega.”