Yarmiyaah 30
israaeel aur yahoodaah bahaal ho jaaenge
1rabb ka kalaam yaramiyaah par naazil hua, 2“rabb israaeel ka khuda farmaata hai ki jo bhee paighaam main nay tujh par naazil kiay unhen kitaab kee soorat men qalamband kar! 3kyoonki rabb farmaata hai ki vah vaqt aanay vaala hai jab main apnee qaum israaeel aur yahoodaah ko bahaal karkay us mulk men vaapas laaoonga jo main nay un kay baapdaada ko meeraas men diya tha.”
4yah israaeel aur yahoodaah kay baaray men rabb kay farmaan hain. 5“rabb farmaata hai, ‘khaufzada cheekhen sunaaee day rahee hain. amn ka naam-o-nishaan tak naheen balki chaaron taraf dahshat hee dahshat phailee huee hai. 6kya mard bachchay janm day sakta hai? to phir tamaam mard kyoon apnay haath kamar par rakh kar dard-ay-zah men mubtala aurton kee tarah tadap rahay hain? har ek ka rang faq pad gaya hai.
7afsos! vah din kitna haulnaak hoga! us jaisa koee naheen hoga. yaaqoob kee aulaad ko badee museebat pesh aaegee, lekin aakhirkaar usay rihaaee milegee.’ 8rabb farmaata hai, ‘us din main un kee gardan par rakhay jooay aur un kee zanjeeron ko tod daaloonga. tab vah ghairmulkiyon kay ghulaam naheen rahenge 9balki rabb apnay khuda aur daaood kee nasal kay us baadshaah kee khidmat karengay jisay main barpa karkay un par muqarrar karoonga.’
10chunaanchay rabb farmaata hai, ‘ai yaaqoob meray khaadim, mat dar! ai israaeel, dahshat mat kha! dekh, main tujhay doordaraaz ilaaqon say aur teree aulaad ko jilaavatanee say chhuda kar vaapas lay aaoonga. yaaqoob vaapas a kar sukoon say zindagee guzaarega, aur usay pareshaan karnay vaala koee naheen hoga.’ 11kyoonki rabb farmaata hai, ‘main teray saath hoon, main hee tujhay bachaaoonga. main un tamaam qaumon ko nest-o-naabood kar doonga jin men main nay tujhay muntashir kar diya hai, lekin tujhay main is tarah safha-ay-hastee say naheen mitaaoonga. alabatta main munaasib hadd tak teree tambeeh karoonga, kyoonki main tujhay saza diay baghair naheen chhod sakta.’
12kyoonki rabb farmaata hai, ‘tera zakhm laailaaj hai, teree chot bhar hee naheen saktee. 13koee naheen hai jo teray haq men baat karay, teray phodon ka muaalaja aur teree shifa mumkin hee naheen! 14teray tamaam aashiq [a] aashiq say muraad israaeel kay ittihaadee hain. tujhay bhool gaay hain aur teree parva hee naheen kartay. tera qusoor bahut sangeen hai, tujh say beshumaar gunaah sarzad huay hain. isee liyay main nay tujhay dushman kee tarah maara, zaalim kee tarah tambeeh dee hai.
15ab jab chot lag gaee hai aur laailaaj dard mahsoos ho raha hai to too madad kay liyay kyoon cheekhta hai? yah main hee nay teray sangeen qusoor aur mut’addid gunaahon kee vajah say teray saath kiya hai.
16lekin jo tujhay hadap karen unhen bhee hadap kiya jaaega. teray tamaam dushman jilaavatan ho jaaengay. jinhon nay tujhay loot liya unhen bhee loota jaaega, jinhon nay tujhay ghaarat kiya unhen bhee ghaarat kiya jaaega.’ 17kyoonki rabb farmaata hai, ‘main teray zakhmon ko bhar kar tujhay shifa doonga, kyoonki logon nay tujhay mardood qaraar day kar kaha hai ki siyyoon ko dekho jis kee fikr koee naheen karta.’ 18rabb farmaata hai, ‘dekho, main yaaqoob kay khaimon kee badnaseebee khatm karoonga, main israaeel kay gharon par taras khaaoonga. tab yarooshalam ko khandaraat par naay siray say taameer kiya jaaega, aur mahel ko dubaara us kee puraanee jagah par khada kiya jaaega.
19us vaqt vahaan shukrguzaaree kay geet aur khushee manaanay vaalon kee aavaazen buland ho jaaengee. aur main dhyaan doonga ki un kee taadaad kam na ho jaaay balki mazeed badh jaaay. unhen haqeer naheen samjha jaaega balki main un kee izzat bahut badha doonga. 20un kay bachchay qadeem zamaanay kee tarah mahfooz zindagee guzaarengay, aur un kee jamaaat mazbootee say meray huzoor qaaim rahegee. lekin jitnon nay un par zulm kiya hai unhen main saza doonga.
21un ka hukmaraan un ka apna hamvatan hoga, vah dubaara un men say uth kar takhtnasheen ho jaaega. main khud usay apnay qareeb laaoonga to vah meray qareeb aaega.’ kyoonki rabb farmaata hai, ‘sirf vahee apnee jaan khatray men daal kar meray qareeb aanay kee jur’at kar sakta hai jisay main khud apnay qareeb laaya hoon. 22us vaqt tum meree qaum hogay aur main tumhaara khuda hoonga’.”
23dekho, rabb ka ghazab zabardast aandhee kee tarah naazil ho raha hai. tez bagoolay kay jhonkay bedeenon kay saron par utar rahay hain. 24aur rabb ka shadeed qaher us vaqt tak thanda naheen hoga jab tak us nay apnay dil kay mansoobon ko takmeel tak naheen pahunchaaya. aanay vaalay dinon men tumhen is kee saaf samajh aaegee.