Yarmiyaah 3

israaeel kee rabb say bevafaaee

¹rabb farmaata hai, “agar koee apnee beevee ko talaaq day aur alag honay kay baad beevee kee kisee aur say shaadee ho jaaay to kya pahelay shauhar ko us say dubaara shaadee karnay kee ijaazat hai? hargiz naheen, balki aisee harkat say pooray mulk kee behuramtee ho jaatee hai. dekh, yahee teree haalat hai. too nay mut’addid aashiqon say zina kiya hai, aur ab too meray paas vaapas aana chaahatee hai. yah kaisee baat hai?

²apnee nazar banjar pahaadiyon kee taraf utha kar dekh! kya koee jagah hai jahaan zina karnay say teree behuramtee naheen huee? registaan men tanha baithnay vaalay badoo kee tarah too raaston kay kinaaray par apnay aashiqon kee taak men baithee rahee hai. apnee ismatafaroshee aur badkaaree say too nay mulk kee behuramtee kee hai. ³isee vajah say bahaar men barsaat ka mausam roka gaya aur baarish naheen padee. lekin afsos, too kasbee kee see peshaanee rakhtee hai, too sharm khaanay kay liyay tayyaar hee naheen. ⁴is vaqt bhee too cheekhtee chillaatee aavaaz detee hai, ‘ai meray baap, jo meree javaanee say mera dost hai, ⁵kya too hamesha tak meray saath naaraaz rahega? kya tera qaher kabhee thanda naheen hoga?’ yahee teray apnay alfaaz hain, lekin saath saath too ghalat kaam karnay kee har mumkin koshish kartee rahetee hai.”

⁶yoosiyaah baadshaah kee hukoomat kay dauraan rabb mujh say hamkalaam hua, “kya too nay vah kuchh dekha jo bevafa israaeel nay kiya hai? us nay har bulandee par aur har ghanay darakht kay saay men zina kiya hai. ⁷main nay socha ki yah sab kuchh karnay kay baad vah meray paas vaapas aaegee. lekin afsos, aisa na hua. us kee ghaddaar bahen yahoodaah bhee in tamaam vaaqiaat kee gavaah thee. ⁸bevafa israaeel kee zinaakaaree naaqaabil-ay-bardaasht thee, is liyay main nay usay ghar say nikaal kar talaaqnaama day diya. phir bhee main nay dekha ki us kee ghaddaar bahen yahoodaah nay khauf na khaaya balki khud nikal kar zina karnay lagee. ⁹israaeel ko is jurm kee sanjeedgee mahsoos na huee balki us nay patthar aur lakdee kay buton kay saath zina karkay mulk kee behuramtee kee. ¹⁰is kay baavujood us kee bevafa bahen yahoodaah pooray dil say naheen balki sirf zaahiree taur par meray paas vaapas aaee.” yah rabb ka farmaan hai.

meray paas laut aa

¹¹rabb mujh say hamkalaam hua, “bevafa israaeel ghaddaar yahoodaah kee nisbat ziyaada raastbaaz hai. ¹²ja, shimaal kee taraf dekh kar buland aavaaz say elaan kar, ‘ai bevafa israaeel, rabb farmaata hai ki vaapas a! aainda main ghussay say teree taraf naheen dekhoonga, kyoonki main meharbaan hoon. main hamesha tak naaraaz naheen rahoonga. yah rabb ka farmaan hai.

¹³lekin laazim hai ki too apna qusoor tasleem karay. iqraar kar ki main rabb apnay khuda say sarkash huee. main idhar udhar ghoom kar har ghanay darakht kay saay men ajnabee maaboodon kee pooja kartee rahee, main nay rabb kee na sunee’.” yah rabb ka farmaan hai. ¹⁴rabb farmaata hai, “ai bevafa bachcho, vaapas aao, kyoonki main tumhaara maalik hoon. main tumhen har jagah say nikaal kar siyyoon men vaapas laaoonga. kisee shaher say main ek ko nikaal laaoonga, aur kisee khaandaan say do afraad ko.

¹⁵tab main tumhen aisay gallaabaanon say navaazoonga jo meree soch rakhengay aur jo samajh aur aqal kay saath tumhaaree gallaabaanee karengay. ¹⁶phir tumhaaree taadaad bahut badhegee aur tum chaaron taraf phail jaaogay.” rabb farmaata hai, “un dinon men rabb kay ahd kay sandooq ka zikr naheen kiya jaaega. na us ka khayaal aaega, na usay yaad kiya jaaega. na us kee kamee mahsoos hogee, na usay dubaara banaaya jaaega. ¹⁷kyoonki us vaqt yarooshalam ‘rabb ka takht’ kahelaaega, aur us men tamaam aqvaam rabb kay naam kee taazeem men jama ho jaaengee. tab vah apnay shareer aur ziddee dilon kay mutaabiq zindagee naheen guzaarengee. ¹⁸tab yahoodaah ka gharaana israaeel kay gharaanay kay paas aaega, aur vah mil kar shimaalee mulk say us mulk men vaapas aaengay jo main nay tumhaaray baapdaada ko meeraas men diya tha.

¹⁹main nay socha, kaash main teray saath beton ka sa sulook karkay tujhay ek khushgavaar mulk day sakoon, ek aisee meeraas jo deegar aqvaam kee nisbat kaheen shaandaar ho. main samjha ki tum mujhay apna baap thahera kar apna munh mujh say naheen pherogay. ²⁰lekin ai israaeelee qaum, too mujh say bevafa rahee hai, bilkul us aurat kee tarah jo apnay shauhar say bevafa ho gaee hai.” yah rabb ka farmaan hai.

²¹“suno! banjar bulandiyon par cheekhen aur iltijaaen sunaaee day rahee hain. israaeelee ro rahay hain, is liyay ki vah ghalat raah ikhtiyaar karkay rabb apnay khuda ko bhool gaay hain. ²²ai bevafa bachcho, vaapas aao taaki main tumhaaray bevafa dilon ko shifa day sakoon.”

“ai rabb, ham haazir hain. ham teray paas aatay hain, kyoonki too hee rabb hamaara khuda hai. ²³vaaqaee, pahaadiyon aur pahaadon par butparastee ka tamaasha fareb hee hai. yaqeenan rabb hamaara khuda israaeel kee najaat hai. ²⁴hamaaree javaanee say lay kar aaj tak sharmanaak devta hamaaray baapdaada kee mehanat ka phal khaatay aaay hain, khwaah un kee bhed-bakriyaan aur gaay-bail thay, khwaah un kay betay-betiyaan. ²⁵aao, ham apnee sharm kay bistar par let jaaen aur apnee beizzatee kee razaaee men chhup jaaen. kyoonki ham nay apnay baapdaada samet rabb apnay khuda ka gunaah kiya hai. apnee javaanee say lay kar aaj tak ham nay rabb apnay khuda kee naheen sunee.”