Yarmiyaah 29
yaramiyaah jilaavatanon ko khat bhejta hai
1ek din yaramiyaah nabee nay yarooshalam say ek khat mulk-ay-baabal bheja. yah khat un bachay huay buzurgon, imaamon, nabiyon aur baaqee israaeeliyon kay naam likha tha jinhen nabookadnazzar baadshaah jilaavatan karkay baabal lay gaya tha. 2un men yahooyaakeen [a] ibraanee men yahooyaakeen ka mutraadif yakooniyaah mustaamal hai. baadshaah, us kee maan aur darbaaree, aur yahoodaah aur yarooshalam kay buzurg, kaareegar aur lohaar shaamil thay. 3yah khat iliaasa bin saafan aur jamariyaah bin khilaqiyaah kay haath baabal pahuncha jinhen yahoodaah kay baadshaah sidaqiyaah nay baabal men shaah-ay-baabal nabookadnazzar kay paas bheja tha. khat men likha tha,
4“rabb-ul-afwaaj jo israaeel ka khuda hai farmaata hai, ‘ai tamaam jilaavatano jinhen main yarooshalam say nikaal kar baabal lay gaya hoon, dhyaan say suno!
5baabal men ghar bana kar un men basnay lago. baagh laga kar un ka phal khaao. 6shaadee karkay betay-betiyaan paida karo. apnay betay-betiyon kee shaadee karaao taaki un kay bhee bachchay paida ho jaaen. dhyaan do ki mulk-ay-baabal men tumhaaree taadaad kam na ho jaaay balki badh jaaay. 7us shaher kee salaamatee kay taalib raho jis men main tumhen jilaavatan karkay lay gaya hoon. rabb say us kay liyay dua karo! kyoonki tumhaaree salaamatee usee kee salaamatee par munhasir hai.’
8rabb-ul-afwaaj jo israaeel ka khuda hai farmaata hai, ‘khabardaar! tumhaaray darmiyaan rahenay vaalay nabee aur qismat ka haal bataanay vaalay tumhen fareb na den. un khwaabon par tavajjuh mat dena jo yah dekhtay hain.’ 9rabb farmaata hai, ‘yah mera naam lay kar tumhen jhootee peshgoiyaan sunaatay hain, go main nay unhen naheen bheja.’ 10kyoonki rabb farmaata hai, ‘tumhen baabal men rahetay huay kul 70 saal guzar jaaengay. lekin is kay baad main tumhaaree taraf rujoo karoonga, main apna purfazl vaada poora karkay tumhen vaapas laaoonga.’ 11kyoonki rabb farmaata hai, ‘main un mansoobon say khoob vaaqif hoon jo main nay tumhaaray liyay baandhay hain. yah mansoobay tumhen nuqsaan naheen pahunchaaengay balki tumhaaree salaamatee ka baais hongay, tumhen ummeed dila kar ek achchha mustaqbil faraaham karengay. 12us vaqt tum mujhay pukaarogay, tum a kar mujh say dua karogay to main tumhaaree sunoonga. 13tum mujhay talaash karkay pa logay. kyoonki agar tum pooray dil say mujhay dhoondo 14to main honay doonga ki tum mujhay paao.’ yah rabb ka farmaan hai. ‘phir main tumhen bahaal karkay un tamaam qaumon aur maqaamon say jama karoonga jahaan main nay tumhen muntashir kar diya tha. aur main tumhen us mulk men vaapas laaoonga jis say main nay tumhen nikaal kar jilaavatan kar diya tha.’ yah rabb ka farmaan hai.
15tumhaara daava hai ki rabb nay yahaan baabal men bhee hamaaray liyay nabee barpa kiay hain. 16-17 lekin rabb ka javaab suno! daaood kay takht par baithnay vaalay baadshaah aur yarooshalam men bachay huay tamaam baashindon kay baaray men rabb-ul-afwaaj farmaata hai, ‘tumhaaray jitnay bhaaee jilaavatanee say bach gaay hain un kay khilaaf main talvaar, kaal aur muhalak beemaariyaan bhej doonga. main unhen galay huay anjeeron kee maanind bana doonga, jo kharaab honay kee vajah say khaaay naheen ja sakengay. 18main talvaar, kaal aur muhalak beemaariyon say un ka yoon taaqqub karoonga ki duniya kay tamaam mamaalik un kee haalat dekh kar ghabra jaaengay. jis qaum men bhee main unhen muntashir karoonga vahaan logon kay rongtay khaday ho jaaengay. kisee par laanat bhejtay vaqt log kahengay ki usay yahoodaah kay baashindon ka sa anjaam naseeb ho. har jagah vah mazaaq aur rusvaaee ka nishaana ban jaaengay. 19kyoon? is liyay ki unhon nay meree na sunee, go main apnay khaadimon yaanee nabiyon kay zareeay baar baar unhen paighaamaat bhejta raha. lekin tum nay bhee meree na sunee.’ yah rabb ka farmaan hai.
20ab rabb ka farmaan suno, tum sab jo jilaavatan ho chukay ho, jinhen main yarooshalam say nikaal kar baabal bhej chuka hoon. 21rabb-ul-afwaaj jo israaeel ka khuda hai farmaata hai, ‘akhiyab bin qaulaayaah aur sidaqiyaah bin maasiyaah mera naam lay kar tumhen jhootee peshgoiyaan sunaatay hain. is liyay main unhen shaah-ay-baabal nabookadnazzar kay haath men doonga jo unhen teray dekhtay dekhtay saza-ay-maut dega. 22un ka anjaam ibrat’angez misaal ban jaaega. kisee par laanat bhejtay vaqt yahoodaah kay jilaavatan kahengay, “rabb teray saath sidaqiyaah aur akhiyab ka sa sulook karay jinhen shaah-ay-baabal nay aag men bhoon liya!” 23kyoonki unhon nay israaeel men bedeen harkaten kee hain. apnay padosiyon kee beeviyon kay saath zina karnay kay saath saath unhon nay mera naam lay kar aisay jhootay paighaam sunaaay hain jo main nay unhen sunaanay ko naheen kaha tha. mujhay is ka poora ilm hai, aur main is ka gavaah hoon.’ yah rabb ka farmaan hai.”
samaayaah kay liyay rabb ka paighaam
24rabb nay farmaaya, “baabal kay rahenay vaalay samaayaah nakhlaamee ko ittila day, 25rabb-ul-afwaaj jo israaeel ka khuda hai farmaata hai ki too nay apnee hee taraf say imaam safaniyaah bin maasiyaah ko khat bheja. deegar imaamon aur yarooshalam kay baaqee tamaam baashindon ko bhee is kee kaapiyaan mil gaeen. khat men likha tha,
26‘rabb nay aap ko yahoyada kee jagah apnay ghar kee dekh-bhaal karnay kee zimmaadaaree dee hai. aap kee zimmaadaariyon men yah bhee shaamil hai ki har deevaanay aur nubuvvat karnay vaalay ko kaath men daal kar us kee gardan men lohay kee zanjeeren daalen. 27to phir aap nay antot kay rahenay vaalay yaramiyaah kay khilaaf qadam kyoon naheen uthaaya jo aap kay darmiyaan nubuvvat karta raheta hai? 28kyoonki us nay hamen jo baabal men hain khat bhej kar mashvra diya hai ki der lagegee, is liyay ghar bana kar un men basnay lago, baagh laga kar un ka phal khaao’.”
29jab safaniyaah ko samaayaah ka khat mil gaya to us nay yaramiyaah ko sab kuchh sunaaya. 30tab yaramiyaah par rabb ka kalaam naazil hua, 31“tamaam jilaavatanon ko khat bhej kar likh day, ‘rabb samaayaah nakhlaamee kay baaray men farmaata hai ki go main nay samaayaah ko naheen bheja to bhee us nay tumhen peshgoiyaan suna kar jhoot par bharosa rakhnay par aamaada kiya hai. 32chunaanchay rabb farmaata hai ki main samaayaah nakhlaamee ko us kee aulaad samet saza doonga. is qaum men us kee nasal khatm ho jaaegee, aur vah khud un achchhee cheezon say lutf’andoz naheen hoga jo main apnee qaum ko faraaham karoonga. kyoonki us nay rabb say sarkash honay ka mashvra diya hai’.”