Yarmiyaah 27
jooay kee alaamat
1jab sidaqiyaah bin yoosiyaah yahoodaah kay takht par baith gaya to rabb yaramiyaah say hamkalaam hua. 2rabb nay mujhay farmaaya,
“apnay liyay jooa aur us kay rassay bana kar usay apnee gardan par rakh lay! 3phir adom, moaab, ammon, soor aur saida kay shaahee safeeron kay paas ja jo is vaqt yarooshalam men sidaqiyaah baadshaah kay paas jama hain. 4un kay haath un kay baadshaahon ko paighaam bhej, ‘rab-ul-afwaaj jo israaeel ka khuda hai farmaata hai ki 5main nay apna haath badha kar badee qudrat say duniya ko insaan-o-haivaan samet khalaq kiya hai, aur main hee yah cheezen usay ata karta hoon jo meree nazar men laaiq hai. 6is vaqt main tumhaaray tamaam mamaalik ko apnay khaadim shaah-ay-baabal nabookadnazzar kay havaalay karoonga. janglee jaanvar tak sab us kay taabay ho jaaengay. 7tamaam aqvaam us kee aur us kay betay aur potay kee khidmat karengee. phir ek vaqt aaega ki baabal kee hukoomat khatm ho jaaegee. tab mut’addid qaumen aur baday baday baadshaah usay apnay hee taabay kar lengay. 8lekin is vaqt laazim hai ki har qaum aur saltanat shaah-ay-baabal nabookadnazzar kee khidmat karkay us ka jooa qabool karay. jo inkaar karay usay main talvaar, kaal aur muhalak beemaariyon say us vaqt tak saza doonga jab tak vah pooray taur par nabookadnazzar kay haath say tabaah na ho jaaay. yah rabb ka farmaan hai.
9chunaanchay apnay nabiyon, faalgeeron, khwaab dekhnay vaalon, qismat ka haal bataanay vaalon aur jaadoogaron par dhyaan na do jab vah tumhen bataatay hain ki tum shaah-ay-baabal kee khidmat naheen karogay. 10kyoonki vah tumhen jhootee peshgoiyaan pesh kar rahay hain jin ka sirf yah nateeja niklega ki main tumhen vatan say nikaal kar muntashir karoonga aur tum halaak ho jaaogay. 11lekin jo qaum shaah-ay-baabal ka jooa qabool karkay us kee khidmat karay usay main us kay apnay mulk men rahenay doonga, aur vah us kee kheteebaadee karkay us men basegee. yah rabb ka farmaan hai’.”
12main nay yahee paighaam yahoodaah kay baadshaah sidaqiyaah ko bhee sunaaya. main bola, “shaah-ay-baabal kay jooay ko qabool karkay us kee aur us kee qaum kee khidmat karo to tum zinda rahogay. 13kya zaroorat hai ki too apnee qaum samet talvaar, kaal aur muhalak beemaariyon kee zad men a kar halaak ho jaaay? kyoonki rabb nay farmaaya hai ki har qaum jo shaah-ay-baabal kee khidmat karnay say inkaar karay us ka yahee anjaam hoga. 14un nabiyon par tavajjuh mat dena jo tum say kahetay hain, ‘tum shaah-ay-baabal kee khidmat naheen karogay.’ un kee yah peshgoee jhoot hee hai. 15rabb farmaata hai, ‘main nay unhen naheen bheja balki vah mera naam lay kar jhootee peshgoiyaan suna rahay hain. agar tum un kee suno to main tumhen muntashir kar doonga, aur tum nubuvvat karnay vaalay un nabiyon samet halaak ho jaaogay’.”
16phir main imaamon aur pooree qaum say mukhaatib hua, “rabb farmaata hai, ‘un nabiyon kee na suno jo nubuvvat karkay kahetay hain ki ab rabb kay ghar ka saamaan jald hee mulk-ay-baabal say vaapas laaya jaaega. vah tumhen jhootee peshgoiyaan bayaan kar rahay hain. 17un par tavajjuh mat dena. baabal kay baadshaah kee khidmat karo to tum zinda rahogay. yah shaher kyoon malbay ka dher ban jaaay? 18agar yah log vaaqaee nabee hon aur inhen rabb ka kalaam mila ho to inhen rabb kay ghar, shaahee mahel aur yarooshalam men ab tak bachay huay saamaan kay liyay dua karnee chaahiay. vah rabb-ul-afwaaj say shafaaat karen ki yah cheezen mulk-ay-baabal na lay jaaee jaaen balki yaheen rahen.
19-22 ab tak peetal kay satoon, peetal ka hauz banaam samundar, paanee kay baasan uthaanay vaalee hathgaadiyaan aur is shaher ka baaqee bacha hua saamaan yaheen maujood hai. nabookadnazzar nay inhen us vaqt apnay saath naheen liya tha jab vah yahoodaah kay baadshaah yahooyaakeen [a] ibraanee men yahooyaakeen ka mutraadif yakooniyaah mustaamal hai. bin yahooyaqeem ko yarooshalam aur yahoodaah kay tamaam shurfa samet jilaavatan karkay mulk-ay-baabal lay gaya tha. lekin rabb-ul-afwaaj jo israaeel ka khuda hai in cheezon kay baaray men farmaata hai ki jitnee bhee qeemtee cheezen ab tak rabb kay ghar, shaahee mahel ya yarooshalam men kaheen aur bach gaee hain vah bhee mulk-ay-baabal men pahunchaaee jaaengee. vaheen vah us vaqt tak rahengee jab tak main un par nazar daal kar unhen is jagah vaapas na laaoon.’ yah rabb ka farmaan hai.”