Yarmiyaah 26

rabb kay ghar men yaramiyaah ka paighaam

¹jab yahooyaqeem bin yoosiyaah yahoodaah kay takht par baith gaya to thodee der kay baad rabb ka kalaam yaramiyaah par naazil hua. ²rabb nay farmaaya, “ai yaramiyaah, rabb kay ghar kay sahen men khada ho kar un tamaam logon say mukhaatib ho jo rabb kay ghar men sijda karnay kay liyay yahoodaah kay deegar shaheron say aaay hain. unhen mera poora paighaam suna day, ek baat bhee na chhod! ³shaayad vah sunen aur har ek apnee buree raah say baaz a jaaay. is soorat men main pachhta kar un par vah saza naazil naheen karoonga jis ka mansooba main nay un kay buray aamaal dekh kar baandh liya hai.

⁴unhen bata, ‘rabb farmaata hai ki meree suno aur meree us shareeat par amal karo jo main nay tumhen dee hai. ⁵neez, nabiyon kay paighaamaat par dhyaan do. afsos, go main apnay khaadimon ko baar baar tumhaaray paas bhejta raha to bhee tum nay un kee na sunee. ⁶agar tum aainda bhee na suno to main is ghar ko yoon tabaah karoonga jis tarah main nay saila ka maqdis tabaah kiya tha. main is shaher ko bhee yoon khaak men mila doonga ki ibrat’angez misaal ban jaaega. duniya kee tamaam qaumon men jab koee apnay dushman par laanat bhejna chaahay to vah kahega ki us ka yarooshalam ka sa anjaam ho’.”

yaramiyaah kee adaalat

⁷jab yaramiyaah nay rabb kay ghar men rabb kay yah alfaaz sunaaay to imaamon, nabiyon aur tamaam baaqee logon nay ghaur say suna. ⁸yaramiyaah nay unhen sab kuchh pesh kiya jo rabb nay usay sunaanay ko kaha tha. lekin joon hee vah ikhtitaam par pahunch gaya to imaam, nabee aur baaqee tamaam log usay pakad kar cheekhnay lagay, “tujhay marna hee hai! ⁹too rabb ka naam lay kar kyoon kah raha hai ki rabb ka ghar saila kee tarah tabaah ho jaaega, aur yarooshalam malbay ka dher ban kar ghair’aabaad ho jaaega?” aisee baaten kah kar tamaam logon nay rabb kay ghar men yaramiyaah ko gheray rakha.

¹⁰jab yahoodaah kay buzurgon ko is kee khabar milee to vah shaahee mahel say nikal kar rabb kay ghar kay paas pahunchay. vahaan vah rabb kay ghar kay sahen kay naay darvaazay men baith gaay taaki yaramiyaah kee adaalat karen. ¹¹tab imaamon aur nabiyon nay buzurgon aur tamaam logon kay saamnay yaramiyaah par ilzaam lagaaya, “laazim hai ki is aadmee ko saza-ay-maut dee jaaay! kyoonki is nay is shaher yarooshalam kay khilaaf nubuvvat kee hai. aap nay apnay kaanon say yah baat sunee hai.”

¹²tab yaramiyaah nay buzurgon aur baaqee tamaam logon say kaha, “rabb nay khud mujhay yahaan bheja taaki main rabb kay ghar aur yarooshalam kay khilaaf un tamaam baaton kee peshgoee karoon jo aap nay sunee hain. ¹³chunaanchay apnee raahon aur aamaal ko durust karen! rabb apnay khuda kee sunen taaki vah pachhta kar aap par vah saza naazil na karay jis ka elaan us nay kiya hai. ¹⁴jahaan tak mera taalluq hai, main to aap kay haath men hoon. meray saath vah sulook karen jo aap ko achchha aur munaasib lagay. ¹⁵lekin ek baat jaan len. agar aap mujhay saza-ay-maut den to aap bequsoor kay qaatil thaherengay. aap aur yah shaher us kay tamaam baashindon samet qusoorvaar thaherengay. kyoonki rabb hee nay mujhay aap kay paas bheja taaki aap kay saamnay hee yah baaten karoon.”

¹⁶yah sun kar buzurgon aur avaam kay tamaam logon nay imaamon aur nabiyon say kaha, “yah aadmee saza-ay-maut kay laaiq naheen hai! kyoonki us nay rabb hamaaray khuda ka naam lay kar ham say baat kee hai.”

¹⁷phir mulk kay kuchh buzurg khaday ho kar pooree jamaaat say mukhaatib huay, ¹⁸“jab hizaqiyaah yahoodaah ka baadshaah tha to morshat kay rahenay vaalay nabee meekaah nay nubuvvat karkay yahoodaah kay tamaam baashindon say kaha, ‘rab-ul-afwaaj farmaata hai ki siyyoon par khet kee tarah hal chalaaya jaaega, aur yarooshalam malbay ka dher ban jaaega. rabb kay ghar kee pahaadee par gunjaan jangal ugega.’ ¹⁹kya yahoodaah kay baadshaah hizaqiyaah ya yahoodaah kay kisee aur shakhs nay meekaah ko saza-ay-maut dee? hargiz naheen, balki hizaqiyaah nay rabb ka khauf maan kar us ka ghussa thanda karnay kee koshish kee. nateejay men rabb nay pachhta kar vah saza un par naazil na kee jis ka elaan vah kar chuka tha. sunen, agar ham yaramiyaah ko saza-ay-maut den to apnay aap par sakht saza laaengay.”

ooriyaah nabee ka qatl

²⁰un dinon men ek aur nabee bhee yaramiyaah kee tarah rabb ka naam lay kar nubuvvat karta tha. us ka naam ooriyaah bin samaayaah tha, aur vah qiryat-yaareem ka rahenay vaala tha. us nay bhee yarooshalam aur yahoodaah kay khilaaf vahee peshgoiyaan sunaaeen jo yaramiyaah sunaata tha.

²¹jab yahooyaqeem baadshaah aur us kay tamaam faujee aur sarkaaree afsaron nay us kee baaten suneen to baadshaah nay usay maar daalnay kee koshish kee. lekin ooriyaah ko is kee khabar milee, aur vah dar kar bhaag gaya. chaltay chaltay vah misr pahunch gaya. ²²tab yahooyaqeem nay ilnaatan bin akbor aur chand ek aadmiyon ko vahaan bhej diya. ²³vahaan pahunch kar vah ooriyaah ko pakad kar yahooyaqeem kay paas vaapas laaay. baadshaah kay hukm par us ka sar qalam kar diya gaya aur us kee naash ko nichlay tabqay kay logon kay qabristaan men dafnaaya gaya.

²⁴lekin yaramiyaah kee jaan chhoot gaee. usay avaam kay havaalay na kiya gaya, go vah usay maar daalna chaahatay thay, kyoonki akheeqaam bin saafan us kay haq men tha.