Jeremiah 25

Yarmiyaah 25

mulk-ay-baabal men 70 saal rahenay kee peshgoee

¹yahooyaqeem bin yoosiyaah kee hukoomat kay chauthay saal men allaah ka kalaam yaramiyaah par naazil hua. usee saal baabal ka baadshaah nabookadnazzar takhtnasheen hua tha. yah kalaam yahoodaah kay tamaam baashindon kay baaray men tha. ²chunaanchay yaramiyaah nabee nay yarooshalam kay tamaam baashindon aur yahoodaah kee pooree qaum say mukhaatib ho kar kaha,

³“23 saal say rabb ka kalaam mujh par naazil hota raha hai yaanee yoosiyaah bin amoon kee hukoomat kay teraheven saal say lay kar aaj tak. baar baar main tumhen paighaamaat sunaata raha hoon, lekin tum nay dhyaan naheen diya. ⁴meray ilaava rabb deegar tamaam nabiyon ko bhee baar baar tumhaaray paas bhejta raha, lekin tum nay na suna, na tavajjuh dee, ⁵go meray khaadim tumhen baar baar aagaah kartay rahay, ‘tauba karo! har ek apnee ghalat raahon aur buree harkaton say baaz a kar vaapas aaay. phir tum hamesha tak us mulk men rahogay jo rabb nay tumhen aur tumhaaray baapdaada ko ata kiya tha. ⁶ajnabee maaboodon kee pairvee karkay un kee khidmat aur pooja mat karna! apnay haathon kay banaaay huay buton say mujhay taish na dilaana, varna main tumhen nuqsaan pahunchaaoonga’.”

⁷rabb farmaata hai, “afsos! tum nay meree na sunee balki mujhay apnay haathon kay banaaay huay buton say ghussa dila kar apnay aap ko nuqsaan pahunchaaya.” ⁸rabb-ul-afwaaj farmaata hai, “choonki tum nay meray paighaamaat par dhyaan na diya, ⁹is liyay main shimaal kee tamaam qaumon aur apnay khaadim baabal kay baadshaah nabookadnazzar ko bula loonga taaki vah is mulk, is kay baashindon aur gird-o-navaah kay mamaalik par hamla karen. tab yah safha-ay-hastee say yoon mit jaaengay ki logon kay rongtay khaday ho jaaengay aur vah un ka mazaaq udaaengay. yah ilaaqay daaimee khandaraat ban jaaengay. ¹⁰main un kay darmiyaan khushee-o-shaadmaanee aur doolhay dulhan kee aavaazen band kar doonga. chakkiyaan khaamosh pad jaaengee aur charaagh bujh jaaengay. ¹¹poora mulk veeraan-o-sunsaan ho jaaega, chaaron taraf malbay kay dher nazar aaengay. tab tum aur ird-gird kee qaumen 70 saal tak shaah-ay-baabal kee khidmat karogay.

¹²lekin 70 saal kay baad main shaah-ay-baabal aur us kee qaum ko munaasib saza doonga. main mulk-ay-baabal ko yoon barbaad karoonga ki vah hamesha tak veeraan-o-sunsaan rahega. ¹³us vaqt main us mulk par sab kuchh naazil karoonga jo main nay us kay baaray men farmaaya hai, sab kuchh poora ho jaaega jo is kitaab men darj hai aur jis kee peshgoee yaramiyaah nay tamaam aqvaam kay baaray men kee hai. ¹⁴us vaqt unhen bhee mut’addid qaumon aur baday baday baadshaahon kee khidmat karnee padegee. yoon main unhen un kee harkaton aur aamaal ka munaasib ajr doonga.”

rabb kay ghazab ka piyaalaa

¹⁵rabb jo israaeel ka khuda hai mujh say hamkalaam hua, “dekh, meray haath men meray ghazab say bhara hua piyaala hai. isay lay kar un tamaam qaumon ko pila day jin kay paas main tujhay bhejta hoon. ¹⁶jo bhee qaum yah piay vah meree talvaar kay aagay dagmagaatee huee deevaana ho jaaegee.”

¹⁷chunaanchay main nay rabb kay haath say piyaala lay kar usay un tamaam aqvaam ko pila diya jin kay paas rabb nay mujhay bheja. ¹⁸pahelay yarooshalam aur yahoodaah kay shaheron ko un kay baadshaahon aur buzurgon samet ghazab ka piyaala peena pada. tab mulk malbay ka dher ban gaya jisay dekh kar logon kay rongtay khaday ho gaay. aaj tak vah mazaaq aur laanat ka nishaana hai.

¹⁹phir yakay baad deegray mut’addid qaumon ko ghazab ka piyaala peena pada. zail men un kee faherist hai : misr ka baadshaah firaaun, us kay darbaaree, afsar, pooree misree qaum ²⁰aur mulk men basnay vaalay ghairmulkee, mulk-ay-ooz kay tamaam baadshaah,

filistee baadshaah aur un kay shaher asqaloon, ghazza aur aqroon, neez filistee shaher ashdood ka bacha khacha hissa,

²¹adom, moaab aur ammon,

²²soor aur saida kay tamaam baadshaah, baheera-ay-room kay saahilee ilaaqay,

²³dadaan, taima aur booz kay shaher, vah qaumen jo registaan kay kinaaray kinaaray rahetee hain,

²⁴mulk-ay-arab kay tamaam baadshaah, registaan men mil kar basnay vaalay ghairmulkiyon kay baadshaah,

²⁵zimree, ailaam aur maadee kay tamaam baadshaah,

²⁶shimaal kay door-o-nazdeek kay tamaam baadshaah.

yakay baad deegray duniya kay tamaam mamaalik ko ghazab ka piyaala peena pada. aakhir men sheshak kay baadshaah ^[a] ghaaliban is say muraad baabal ka baadshaah hai. ko bhee yah piyaala peena pada.

²⁷phir rabb nay kaha, “unhen bata, ‘rab-ul-afwaaj jo israaeel ka khuda hai farmaata hai ki ghazab ka piyaala khoob piyo! itna piyo ki nashay men a kar qai aanay lagay. us vaqt tak peetay jaao jab tak tum meree talvaar kay aagay gir kar paday na raho.’ ²⁸agar vah teray haath say piyaala na len balki usay peenay say inkaar karen to unhen bata, ‘rab-ul-afwaaj khud farmaata hai ki piyo! ²⁹dekho, jis shaher par meray naam ka thappa laga hai usee par main aafat laanay laga hoon. agar main nay usee say shuroo kiya to phir tum kis tarah bachay rahogay? yaqeenan tumhen saza milegee, kyoonki main nay tai kar liya hai ki duniya kay tamaam baashinday talvaar kee zad men a jaaen’.” yah rabb-ul-afwaaj ka farmaan hai.

tamaam aqvaam kee adaalat

³⁰“ai yaramiyaah, unhen yah tamaam peshgoiyaan suna kar bata ki rabb bulandiyon say dahaadega. us kee muqaddas sukoonatgaah say us kee kadaktee aavaaz niklegee, vah zor say apnee charaagaah kay khilaaf garjega. jis tarah angoor ka ras nikaalnay vaalay angoor ko raundtay vaqt zor say naaray lagaatay hain usee tarah vah naaray lagaaega, alabatta jang kay naaray. kyoonki vah duniya kay tamaam baashindon kay khilaaf jang kay naaray lagaaega. ³¹us ka shor duniya kee intiha tak goonjega, kyoonki rabb adaalat men aqvaam say muqaddma ladega, vah tamaam insaanon ka insaaf karkay shareeron ko talvaar kay havaalay kar dega.” yah rabb ka farmaan hai. ³²rabb-ul-afwaaj farmaata hai, “dekho, yakay baad deegray tamaam qaumon par aafat naazil ho rahee hai, zameen kee intiha say zabardast toofaan a raha hai. ³³us vaqt rabb kay maaray huay logon kee laashen duniya kay ek siray say doosray siray tak padee rahengee. na koee un par maatam karega, na unhen utha kar dafan karega. vah khet men bikhray gobar kee tarah zameen par padee rahengee.

³⁴ai gallaabaano, vaavaila karo! ai revad kay raahanumaao, raakh men lot-pot ho jaao! kyoonki vaqt a gaya hai ki tumhen zabah kiya jaaay. tum gir kar naazuk bartan kee tarah paash paash ho jaaogay. ³⁵gallaabaan kaheen bhee bhaag kar panaah naheen lay sakengay, revad kay raahanuma bach hee naheen sakengay. ³⁶suno! gallaabaanon kee cheekhen aur revad kay raahanumaaon kee aahen! kyoonki rabb un kee charaagaah ko tabaah kar raha hai. ³⁷pursukoon murghazaaron ka satyaanaas hoga jab rabb ka sakht ghazab naazil hoga, ³⁸jab rabb javaan sherbabar kee tarah apnee chhupnay kee jagah say nikal kar logon par toot padega. tab zaalim kee tez talvaar aur rabb ka shadeed qaher un ka mulk tabaah karega.”