Yarmiyaah 24
anjeer kee do tokriyaan
1ek din rabb nay mujhay roya dikhaaee. us vaqt baabal ka baadshaah nabookadnazzar yahoodaah kay baadshaah yahooyaakeen [a] ibraanee men yahooyaakeen ka mutraadif yakooniyaah mustaamal hai. bin yahooyaqeem ko yahoodaah kay buzurgon, kaareegaron aur lohaaron samet baabal men jilaavatan kar chuka tha.
roya men main nay dekha ki anjeeron say bharee do tokriyaan rabb kay ghar kay saamnay padee hain. 2ek tokree men mausam kay shuroo men paknay vaalay behtareen anjeer thay jabki doosree men kharaab anjeer thay jo khaaay bhee naheen ja saktay thay.
3rabb nay mujh say savaal kiya, “ai yaramiyaah, tujhay kya nazar aata hai?” main nay javaab diya, “mujhay anjeer nazar aatay hain. kuchh behtareen hain jabki doosray itnay kharaab hain ki unhen khaaya bhee naheen ja sakta.”
4tab rabb mujh say hamkalaam hua, 5“rabb israaeel ka khuda farmaata hai ki achchhay anjeer yahoodaah kay vah log hain jinhen main nay jilaavatan karkay mulk-ay-baabal men bheja hai. unhen main meharbaanee kee nigaah say dekhta hoon. 6kyoonki un par main apnay karam ka izhaar karkay unhen is mulk men vaapas laaoonga. main unhen giraaoonga naheen balki taameer karoonga, unhen jad say ukhaadoonga naheen balki paneeree kee tarah lagaaoonga. 7main unhen samajhdaar dil ata karoonga taaki vah mujhay jaan len, vah pahechaan len ki main rabb hoon. tab vah meree qaum hongay aur main un ka khuda hoonga, kyoonki vah pooray dil say meray paas vaapas aaengay.
8lekin baaqee log un kharaab anjeeron kee maanind hain jo khaaay naheen ja saktay. un kay saath main vah sulook karoonga jo kharaab anjeeron kay saath kiya jaata hai. un men yahoodaah ka baadshaah sidaqiyaah, us kay afsar, yarooshalam aur yahoodaah men bachay huay log aur misr men panaah lenay vaalay sab shaamil hain. 9main honay doonga ki vah duniya kay tamaam mamaalik kay liyay dahshat aur aafat kee alaamat ban jaaengay. jahaan bhee main unhen muntashir karoonga vahaan vah ibrat’angez misaal ban jaaengay. har jagah log un kee beizzatee, unhen laan-taan aur un par laanat karengay. 10jab tak vah us mulk men say mit na jaaen jo main nay un kay baapdaada ko day diya tha us vaqt tak main un kay darmiyaan talvaar, kaal aur muhalak beemaariyaan bhejta rahoonga.”