Yarmiyaah 23

rabb qaum kay saheeh gallaabaan muqarrar karegaa

¹rabb farmaata hai, “un gallaabaanon par afsos jo meree charaagaah kee bhedon ko tabaah karkay muntashir kar rahay hain.” ²is liyay rabb jo israaeel ka khuda hai farmaata hai, “ai meree qaum ko charaanay vaalay gallaabaano, main tumhaaree shareer harkaton kee munaasib saza doonga, kyoonki tum nay meree bhedon kee fikr naheen kee balki unhen muntashir karkay tittar-bittar kar diya hai.” rabb farmaata hai, “suno, main tumhaaree shareer harkaton say nipat loonga.

³main khud apnay revad kee bachee huee bhedon ko jama karoonga. jahaan bhee main nay unhen muntashir kar diya tha, un tamaam mamaalik say main unhen un kee apnee charaagaah men vaapas laaoonga. vahaan vah phalen phoolengay, aur un kee taadaad badhtee jaaegee. ⁴main aisay gallaabaanon ko un par muqarrar karoonga jo un kee saheeh gallaabaanee karengay. aainda na vah khauf khaaengay, na ghabra jaaengay. ek bhee gum naheen ho jaaega.” yah rabb ka farmaan hai.

rabb saheeh baadshaah muqarrar karegaa

⁵rabb farmaata hai, “vah vaqt aanay vaala hai ki main daaood kay liyay ek raastbaaz kompal phootnay doonga, ek aisa baadshaah jo hikmat say hukoomat karega, jo mulk men insaaf aur raastee qaaim rakhega. ⁶us kay daur-ay-hukoomat men yahoodaah ko chhutkaara milega aur israaeel mahfooz zindagee guzaarega. vah ‘rabb hamaaree raastbaazee’ kahelaaega.

⁷chunaanchay vah vaqt aanay vaala hai jab log qasam khaatay vaqt naheen kahengay, ‘rabb kee hayaat kee qasam jo israaeeliyon ko misr say nikaal laaya.’ ⁸is kay bajaay vah kahengay, ‘rabb kee hayaat kee qasam jo israaeeliyon ko shimaalee mulk aur deegar un tamaam mamaalik say nikaal laaya jin men us nay unhen muntashir kar diya tha.’ us vaqt vah dubaara apnay hee mulk men basengay.” yah rabb ka farmaan hai.

jhootay nabiyon par yaqeen mat karnaa

⁹jhootay nabiyon ko dekh kar mera dil toot gaya hai, meree tamaam haddiyaan laraz rahee hain. main nashay men dhut aadmee kee maanind hoon. mai say maghloob shakhs kee tarah main rabb aur us kay muqaddas alfaaz kay sabab say dagamga raha hoon.

¹⁰yah mulk zinaakaaron say bhara hua hai, is liyay us par allaah kee laanat hai. zameen jhulas gaee hai, biyaabaan kee charaagaahon kee hariyaalee murjha gaee hai. nabee ghalat raah par daud rahay hain, aur jis men vah taaqatvar hain vah theek naheen. ¹¹rabb farmaata hai, “nabee aur imaam donon hee bedeen hain. main nay apnay ghar men bhee un ka bura kaam paaya hai. ¹²is liyay jahaan bhee chalen vah phisal jaaengay, vah andheray men thokar kha kar gir jaaengay. kyoonki main muqarrara vaqt par un par aafat laaoonga.” yah rabb ka farmaan hai.

¹³“main nay dekha ki saamriya kay nabee baal kay naam men nubuvvat karkay meree qaum israaeel ko ghalat raah par laaay. yah qaabil-ay-ghin hai, ¹⁴lekin jo kuchh mujhay yarooshalam kay nabiyon men nazar aata hai vah utna hee ghinauna hai. vah zina kartay aur jhoot kay pairokaar hain. saath saath vah badkaaron kee hausalaaafzaaee bhee kartay hain, aur nateejay men koee bhee apnee badee say baaz naheen aata. meree nazar men vah sab sadoom kee maanind hain. haan, yarooshalam kay baashinday amoora kay baraabar hain.” ¹⁵is liyay rabb in nabiyon kay baaray men farmaata hai, “main unhen kadva khaana khilaaoonga aur zahereela paanee pilaaoonga, kyoonki yarooshalam kay nabiyon nay pooray mulk men bedeenee phailaaee hai.”

¹⁶rabb-ul-afwaaj farmaata hai, “nabiyon kee peshgoiyon par dhyaan mat dena. vah tumhen fareb day rahay hain. kyoonki vah rabb ka kalaam naheen sunaatay balki mahez apnay dil men say ubharnay vaalee roya pesh kartay hain. ¹⁷jo mujhay haqeer jaantay hain unhen vah bataatay rahetay hain, ‘rabb farmaata hai ki haalaat saheeh-salaamat rahengay.’ jo apnay dilon kee zid kay mutaabiq zindagee guzaartay hain, un sab ko vah tasallee day kar kahetay hain, ‘tum par aafat naheen aaegee.’ ¹⁸lekin un men say kis nay rabb kee majlis men shareek ho kar vah kuchh dekha aur suna hai jo rabb bayaan kar raha hai? kisee nay naheen! kis nay tavajjuh day kar us ka kalaam suna hai? kisee nay naheen!

¹⁹dekho, rabb kee ghazabnaak aandhee chalnay lagee hai, us ka tezee say ghoomta hua bagoola bedeenon kay saron par mandla raha hai. ²⁰aur rabb ka yah ghazab us vaqt tak thanda naheen hoga jab tak us kay dil ka iraada takmeel tak na pahunch jaaay. aanay vaalay dinon men tumhen is kee pooree samajh aaegee.

²¹yah nabee daud kar apnee baaten sunaatay rahetay hain agarchi main nay unhen naheen bheja. go main un say hamkalaam naheen hua to bhee yah peshgoiyaan kartay hain. ²²agar yah meree majlis men shareek hotay to meree qaum ko meray alfaaz suna kar usay us kay buray chaal-chalan aur ghalat harkaton say hataanay kee koshish kartay.”

²³rabb farmaata hai, “kya main sirf qareeb ka khuda hoon? hargiz naheen! main door ka khuda bhee hoon. ²⁴kya koee meree nazar say ghaaib ho sakta hai? naheen, aisee jagah hai naheen jahaan vah mujh say chhup sakay. aasmaan-o-zameen mujh say maamoor rahetay hain.” yah rabb ka farmaan hai.

²⁵“in nabiyon kee baaten mujh tak pahunch gaee hain. yah mera naam lay kar jhoot boltay hain ki main nay khwaab dekha hai, khwaab dekha hai! ²⁶yah nabee jhootee peshgoiyaan aur apnay dilon kay vasvsay sunaanay say kab baaz aaengay? ²⁷jo khwaab vah ek doosray ko bataatay hain un say vah chaahatay hain ki meree qaum mera naam yoon bhool jaaay jis tarah un kay baapdaada baal kee pooja karnay say mera naam bhool gaay thay.” ²⁸rabb farmaata hai, “jis nabee nay khwaab dekha ho vah beshak apna khwaab bayaan karay, lekin jis par mera kalaam naazil hua ho vah vafaadaaree say mera kalaam sunaaay. bhoosay ka gandum say kya vaasta hai?”

²⁹rabb farmaata hai, “kya mera kalaam aag kee maanind naheen? kya vah hathauday kee tarah chataan ko tukday tukday naheen karta?” ³⁰chunaanchay rabb farmaata hai, “ab main un nabiyon say nipat loonga jo ek doosray kay paighaamaat chura kar daava kartay hain ki vah meree taraf say hain.” ³¹rabb farmaata hai, “main un say nipat loonga jo apnay shakhsee khayaalaat suna kar daava kartay hain, ‘yah rabb ka farmaan hai’.” ³²rabb farmaata hai, “main un say nipat loonga jo jhootay khwaab suna kar meree qaum ko apnee dhokebaazee aur shekhee kee baaton say ghalat raah par laatay hain, haalaanki main nay unhen na bheja, na kuchh kahenay ko kaha tha. un logon ka is qaum kay liyay koee bhee faaida naheen.” yah rabb ka farmaan hai.

rabb kay liyay tum bojh ka baais ho

³³“ai yaramiyaah, agar is qaum kay aam log ya imaam ya nabee tujh say poochhen, ‘aaj rabb nay tujh par kalaam ka kya bojh naazil kiya hai?’ to javaab day, ‘rabb farmaata hai ki tum hee mujh par bojh ho! lekin main tumhen utaar phainkoonga.’ ³⁴aur agar koee nabee, imaam ya aam shakhs daava karay, ‘rabb nay mujh par kalaam ka bojh naazil kiya hai’ to main usay us kay gharaanay samet saza doonga.

³⁵is kay bajaay ek doosray say savaal karo ki ‘rabb nay kya javaab diya?’ ya ‘rabb nay kya farmaaya?’ ³⁶aainda rabb kay paighaam kay liyay lafz ‘bojh’ istemaal na karo, kyoonki jo bhee baat tum karo vah tumhaara apna bojh hogee. kyoonki tum zinda khuda kay alfaaz ko tod-marod kar bayaan kartay ho, us kalaam ko jo rabb-ul-afwaaj hamaaray khuda nay naazil kiya hai. ³⁷chunaanchay aainda nabee say sirf itna hee poochho ki ‘rabb nay tujhay kya javaab diya?’ ya ‘rabb nay kya farmaaya?’ ³⁸lekin agar tum ‘rabb ka bojh’ kahenay par israar karo to rabb ka javaab suno! choonki tum kahetay ho ki ‘mujh par rabb ka bojh naazil hua hai’ go main nay yah mana kiya tha, ³⁹is liyay main tumhen apnee yaad say mita kar yarooshalam samet apnay huzoor say door phaink doonga, go main nay khud yah shaher tumhen aur tumhaaray baapdaada ko faraaham kiya tha. ⁴⁰main tumhaaree abdee rusvaaee karaaoonga, aur tumhaaree sharmindagee hamesha tak yaad rahegee.”