Yarmiyaah 21
baabal kee fauj yarooshalam par fatah paaegee
1ek din sidaqiyaah baadshaah nay fashhoor bin malkiyaah aur maasiyaah kay betay safaniyaah imaam ko yaramiyaah kay paas bhej diya. us kay paas pahunch kar unhon nay kaha, 2“baabal ka baadshaah nabookadnazzar ham par hamla kar raha hai. shaayad jis tarah rabb nay maazee men kaee baar kiya is dafa bhee hamaaree madad karkay nabookadnazzar ko mojizaana taur par yarooshalam ko chhodnay par majboor karay. rabb say is kay baaray men darayaaft karen.”
tab rabb ka kalaam yaramiyaah par naazil hua, 3aur us nay donon aadmiyon say kaha, “sidaqiyaah ko bataao ki 4rabb jo israaeel ka khuda hai farmaata hai, ‘beshak shaher say nikal kar baabal kee muhaasara karnay vaalee fauj aur us kay baadshaah say lado. lekin main tumhen peechhay dhakel kar shaher men panaah lenay par majboor karoonga. vahaan us kay beech men hee tum apnay hathiyaaron samet jama ho jaaogay. 5main khud apna haath badha kar badee qudrat say tumhaaray saath ladoonga, main apnay ghussay aur taish ka poora izhaar karoonga, mera sakht ghazab tum par naazil hoga. 6shaher kay baashinday meray haath say halaak ho jaaengay, khwaah insaan hon ya haivaan. muhalak vaba unhen maut kay ghaat utaar degee.’ 7rabb farmaata hai, ‘is kay baad main yahoodaah kay baadshaah sidaqiyaah ko us kay afsaron aur baaqee baashindon samet baabal kay baadshaah nabookadnazzar kay havaalay kar doonga. vaba, talvaar aur kaal say bachnay vaalay sab apnay jaanee dushman kay qaaboo men a jaaengay. tab nabookadnazzar berahemee say unhen talvaar say maar dega. na usay un par taras aaega, na vah hamdardee ka izhaar karega.’
8is qaum ko bata ki rabb farmaata hai, ‘main tumhen apnee jaan ko bachaanay ka mauqa faraaham karta hoon. is say faaida uthaao, varna tum marogay. 9agar tum talvaar, kaal ya vaba say marna chaaho to is shaher men raho. lekin agar tum apnee jaan ko bachaana chaaho to shaher say nikal kar apnay aap ko baabal kee muhaasara karnay vaalee fauj kay havaalay karo. jo koee yah karay us kee jaan chhoot jaaegee’ [a] lafzee tarjuma : vah ghaneemat kay taur par apnee jaan ko bachaaega. .
10rabb farmaata hai, ‘main nay atal faisla kiya hai ki is shaher par meharbaanee naheen karoonga balki isay nuqsaan pahunchaaoonga. isay shaah-ay-baabal kay havaalay kar diya jaaega jo isay aag laga kar tabaah karega.’
11yahoodaah kay shaahee khaandaan say kah, ‘rabb ka kalaam suno! 12ai daaood kay gharaanay, rabb farmaata hai ki har subah logon ka insaaf karo. jisay loot liya gaya ho usay zaalim kay haath say bachaao! aisa na ho ki mera ghazab tumhaaree shareer harkaton kee vajah say tum par naazil ho kar aag kee tarah bhadak uthay aur koee na ho jo usay bujha sakay.
13rabb farmaata hai ki ai yarooshalam, too vaadee kay oopar oonchee chataan par rah kar fakhar kartee hai ki kaun ham par hamla karega, kaun hamaaray gharon men ghus sakta hai? lekin ab main khud tujh say nipat loonga. 14rabb farmaata hai ki main tumhaaree harkaton ka poora ajr doonga. main yarooshalam kay jangal men aisee aag laga doonga jo ird-gird sab kuchh bhasm kar degee’.”