Yarmiyaah 20

yaramiyaah fashhoor imaam say takra jaata hai

¹us vaqt ek imaam rabb kay ghar men tha jis ka naam fashhoor bin immer tha. vah rabb kay ghar ka aala afsar tha. jab yaramiyaah kee yah peshgoiyaan us kay kaanon tak pahunch gaeen ²to us nay yaramiyaah nabee kee pitaaee karva kar us kay paaon kaath men thonk diay. yah kaath rabb kay ghar say mulhiq shaher kay oopar vaalay darvaazay banaam binyameen men tha.

³aglay din fashhoor nay usay aazaad kar diya. tab yaramiyaah nay us say kaha, “rabb nay aap ka ek naya naam rakha hai. ab say aap ka naam fashhoor naheen hai balki ‘chaaron taraf dahshat hee dahshat.’ ⁴kyoonki rabb farmaata hai, ‘main honay doonga ki too apnay liyay aur apnay tamaam doston kay liyay dahshat kee alaamat banega. kyoonki too apnee aankhon say apnay doston kee qatl-o-ghaarat dekhega. main yahoodaah kay tamaam baashindon ko baabal kay baadshaah kay qabzay men kar doonga jo baaz ko mulk-ay-baabal men lay jaaega aur baaz ko maut kay ghaat utaar dega. ⁵main is shaher kee saaree daulat dushman kay havaalay kar doonga, aur vah is kee tamaam paidaavaar, qeemtee cheezen aur shaahee khazaanay loot kar mulk-ay-baabal lay jaaega. ⁶ai fashhoor, too bhee apnay ghar vaalon samet mulk-ay-baabal men jilaavatan hoga. vahaan too mar kar dafnaaya jaaega. aur na sirf too balki teray vah saaray dost bhee jinhen too nay jhootee peshgoiyaan sunaaee hain’.”

yaramiyaah kee rabb say shikaayat

⁷ai rabb, too nay mujhay manvaaya, aur main maan gaya. too mujhay apnay qaaboo men la kar mujh par ghaalib aaya. ab main poora din mazaaq ka nishaana bana raheta hoon. har ek meree hansee udaata raheta hai. ⁸kyoonki jab bhee main apna munh kholta hoon to mujhay chilla kar ‘zulm-o-tabaahee’ ka naara lagaana padta hai. chunaanchay main rabb kay kalaam kay baais poora din gaaliyon aur mazaaq ka nishaana bana raheta hoon. ⁹lekin agar main kahoon, “aainda main na rabb ka zikr karoonga, na us ka naam lay kar boloonga” to phir us ka kalaam aag kee tarah meray dil men bhadaknay lagta hai. aur yah aag meree haddiyon men band rahetee aur kabhee naheen nikaltee. main isay bardaasht kartay kartay thak gaya hoon, yah meray bas kee baat naheen rahee. ¹⁰mut’addid logon kee sargoshiyaan meray kaanon tak pahunchtee hain. vah kahetay hain, “chaaron taraf dahshat hee dahshat? yah kya kah raha hai? us kee rapat likhvaao! aao, ham us kee riport karen.” meray tamaam naam-nihaad dost is intizaar men hain ki main phisal jaaoon. vah kahetay hain, “shaayad vah dhoka kha kar phans jaaay aur ham us par ghaalib a kar us say intiqaam lay saken.”

¹¹lekin rabb zabardast soormay kee tarah meray saath hai, is liyay mera taaqqub karnay vaalay mujh par ghaalib naheen aaengay balki khud thokar kha kar gir jaaengay. un kay munh kaalay ho jaaengay, kyoonki vah naakaam ho jaaengay. un kee rusvaaee hamesha hee yaad rahegee aur kabhee naheen mitegee. ¹²ai rabb-ul-afwaaj, too raastbaaz ka muaaina karkay dil aur zahen ko parakhta hai. ab bakhsh day ki main apnee aankhon say vah intiqaam dekhoon jo too meray mukhaalifon say lega. kyoonki main nay apna muaamala teray hee sapurd kar diya hai. ¹³rabb kee madahsaraaee karo! rabb kee tamjeed karo! kyoonki us nay zarooratmand kee jaan ko shareeron kay haath say bacha liya hai.

main kyoon paida hua?

¹⁴us din par laanat jab main paida hua! vah din mubaarak na ho jab meree maan nay mujhay janm diya. ¹⁵us aadmee par laanat jis nay meray baap ko badee khushee dila kar ittila dee ki teray beta paida hua hai! ¹⁶vah un shaheron kee maanind ho jin ko rabb nay berahemee say khaak men mila diya. allaah karay ki subah kay vaqt usay cheekhen sunaaee den aur dopaher kay vaqt jang kay naaray. ¹⁷kyoonki usay mujhay usee vaqt maar daalna chaahiay tha jab main abhee maan kay pet men tha. phir meree maan meree qabr ban jaatee, us ka paaon hamesha tak bhaaree raheta. ¹⁸main kyoon maan kay pet men say nikla? kya sirf is liyay ki museebat aur gham dekhoon aur zindagee kay ikhtitaam tak rusvaaee kee zindagee guzaaroon