Yarmiyaah 2
allaah kee javaan israaeel kay liyay fikr
1rabb ka kalaam mujh par naazil hua, 2“ja, zor say yarooshalam kay kaan men pukaar ki rabb farmaata hai, ‘mujhay teree javaanee kee vafaadaaree khoob yaad hai. jab teree shaadee qareeb aaee to too mujhay kitna piyaar kartee thee, yahaan tak ki too registaan men bhee jahaan kheteebaadee naamumkin thee meray peechhay peechhay chaltee rahee. 3us vaqt israaeel rabb kay liyay makhsoos-o-muqaddas tha, vah us kee fasal ka pahela phal tha. jis nay bhee us men say kuchh khaaya vah mujrim thahera, aur us par aafat naazil huee. yah rabb ka farmaan hai’.”
israaeel kay baapdaada kay gunaah
4ai yaaqoob kee aulaad, rabb ka kalaam suno! ai israaeel kay tamaam gharaano, dhyaan do! 5rabb farmaata hai, “tumhaaray baapdaada nay mujh men kaun see naainsaafee paaee ki mujh say itnay door ho gaay? hech buton kay peechhay ho kar vah khud hech ho gaay. 6unhon nay poochha tak naheen ki rabb kahaan hai jo hamen misr say nikaal laaya aur registaan men saheeh raah dikhaaee, go vah ilaaqa veeraan-o-sunsaan tha. har taraf ghaatiyon, paanee kee sakht kamee aur taareekee ka saamna karna pada. na koee us men say guzarta, na koee vahaan raheta hai. 7main to tumhen baaghon say bharay mulk men laaya taaki tum us kay phal aur achchhee paidaavaar say lutf’andoz ho sako. lekin tum nay kya kiya? meray mulk men daakhil hotay hee tum nay usay naapaak kar diya, aur main apnee mauroosee milkiyat say ghin khaanay laga. 8na imaamon nay poochha ki rabb kahaan hai, na shareeat ko amal men laanay vaalay mujhay jaantay thay. qaum kay gallaabaan mujh say bevafa huay, aur nabee befaaida buton kay peechhay lag kar baal devta kay paighaamaat sunaanay lagay.”
rabb ka apnee qaum kay khilaaf muqaddmaa
9rabb farmaata hai, “isee vajah say main aainda bhee adaalat men tumhaaray saath ladoonga. haan, na sirf tumhaaray saath balki tumhaaree aanay vaalee naslon kay saath bhee. 10jaao, samundar ko paar karkay jazeera-ay-qubrus kee tafteesh karo! apnay qaasidon ko mulk-ay-qeedaar men bhej kar ghaur say darayaaft karo ki kya vahaan kabhee yahaan ka sa kaam hua hai? 11kya kisee qaum nay kabhee apnay devtaaon ko tabdeel kiya, go vah haqeeqat men khuda naheen hain? hargiz naheen! lekin meree qaum apnee shaan-o-shaukat kay khuda ko chhod kar befaaida buton kee pooja karnay lagee hai.” 12rabb farmaata hai, “ai aasmaan, yah dekh kar haibatzada ho ja, teray rongtay khaday ho jaaen, hakka-bakka rah ja! 13kyoonki meree qaum say do sangeen jurm sarzad huay hain. ek, unhon nay mujhay tark kiya, go main zindagee kay paanee ka sarchashma hoon. doosray, unhon nay apnay zaatee hauz banaaay hain jo daraadon kee vajah say bhar hee naheen saktay.
israaeel kee bevafaaee kay nataaij
14kya israaeel ibtida say hee ghulaam hai? kya us kay vaalidain ghulaam thay ki vah ab tak ghulaam hai? hargiz naheen! to phir vah kyoon doosron ka loota hua maal ban gaya hai? 15javaan sherbabar dahaadatay huay us par toot paday hain, garajtay garajtay unhon nay mulk-ay-israaeel ko barbaad kar diya hai. us kay shaher nazar-ay-aatish ho kar veeraan-o-sunsaan ho gaay hain. 16saath saath memfis aur tahfanhees kay log bhee teray sar ko mundva rahay hain.
17ai israaeelee qaum, kya yah teray ghalat kaam ka nateeja naheen? kyoonki too nay rabb apnay khuda ko us vaqt tark kiya jab vah teree raahanumaaee kar raha tha. 18ab mujhay bata ki misr ko ja kar darya-ay-neel ka paanee peenay ka kya faaida? mulk-ay-asoor men ja kar darya-ay-furaat ka paanee peenay say kya haasil? 19tera ghalat kaam tujhay saza day raha hai, teree bevafa harkaten hee teree sarzanish kar rahee hain. chunaanchay jaan lay aur dhyaan day ki rabb apnay khuda ko chhod kar us ka khauf na maannay ka phal kitna bura aur kadva hai.” yah qaadir-ay-mutlaq rabb-ul-afwaaj ka farmaan hai.
20“kyoonki shuroo say hee too apnay jooay aur rasson ko tod kar kahetee rahee, ‘main teree khidmat naheen karoongee!’ too har bulandee par aur har ghanay darakht kay saay men let kar ismatafaroshee kartee rahee. 21pahelay too angoor kee makhsoos aur qaabil-ay-etimaad nasal kee paneeree thee jisay main nay khud zameen men lagaaya. to yah kya hua ki too bigad kar janglee [a] lafzee tarjuma : ajnabee. bel ban gaee? 22ab teray qusoor ka daagh utar naheen sakta, khwaah too kitna khaaree soda aur saabun kyoon na istemaal karay.” yah rabb qaadir-ay-mutlaq ka farmaan hai.
23“too kis tarah yah kahenay kee jur’at kar saktee hai ki main nay apnay aap ko aalooda naheen kiya, main baal devtaaon kay peechhay naheen gaee. vaadee men apnee harkaton par to ghaur kar! jaan lay ki tujh say kya kuchh sarzad hua hai. too bemaqsad idhar udhar bhaagnay vaalee oontnee hai. 24balki too registaan men rahenay kee aadee gadhee hee hai jo shahevat kay maaray haamptee hai. mastee kay is aalam men kaun us par qaaboo pa sakta hai? jo bhee us say milna chaahay usay ziyaada jidd-o-jahd kee zaroorat naheen, kyoonki mastee kay mausam men vah har ek kay liyay haazir hai. 25ai israaeel, itna na daud ki teray jootay ghis kar phat jaaen aur tera gala khushk ho jaaay. lekin afsos, too bazid hai, ‘naheen, mujhay chhod day! main ajnabee maaboodon ko piyaar kartee hoon, aur laazim hai ki main un kay peechhay bhaagtee jaaoon.’
26suno! israaeelee qaum kay tamaam afraad un kay baadshaahon, afsaron, imaamon aur nabiyon samet sharminda ho jaaengay. vah pakday huay chor kee see sharm mahsoos karengay. 27yah log lakdee kay but say kahetay hain, ‘too mera baap hai’ aur patthar kay devta say, ‘too nay mujhay janm diya.’ lekin go yah meree taraf rujoo naheen kartay balki apna munh mujh say pher kar chaltay hain to bhee joon hee koee aafat un par a jaaay to yah mujh say iltija karnay lagtay hain ki a kar hamen bacha! 28ab yah but kahaan hain jo too nay apnay liyay banaaay? vahee khaday ho kar dikhaaen ki tujhay museebat say bacha saktay hain. ai yahoodaah, aakhir jitnay teray shaher hain utnay teray devta bhee hain.” 29rabb farmaata hai, “tum mujh par kyoon ilzaam lagaatay ho? tum to sab mujh say bevafa ho gaay ho. 30main nay tumhaaray bachchon ko saza dee, lekin befaaida. vah meree tarbiyat qabool naheen kartay. balki tum nay phaadnay vaalay sherbabar kee tarah apnay nabiyon par toot kar unhen talvaar say qatl kiya.
31ai maujooda nasal, rabb kay kalaam par dhyaan do! kya main israaeel kay liyay registaan ya taareektareen ilaaqay kee maanind tha? meree qaum kyoon kahetee hai, ‘ab ham aazaadee say idhar udhar phir saktay hain, aainda ham teray huzoor naheen aaengay?’ 32kya kunvaaree kabhee apnay zevraat ko bhool saktee hai, ya dulhan apna uroosee libaas? hargiz naheen! lekin meree qaum beshumaar dinon say mujhay bhool gaee hai.
33too ishq dhoondnay men kitnee maahir hai! badkaar aurten bhee tujh say bahut kuchh seekh letee hain. 34teray libaas ka daaman begunaah ghareebon kay khoon say aalooda hai, go too nay unhen naqbazanee jaisa ghalat kaam kartay vaqt na pakda. is sab kuchh kay baavujood bhee 35too bazid hai ki main bequsoor hoon, allaah ka mujh par ghussa thanda ho gaya hai. lekin main teree adaalat karoonga, is liyay ki too kahetee hai, ‘mujh say gunaah sarzad naheen hua.’
36too kabhee idhar, kabhee idhar ja kar itnee aasaanee say apna rukh kyoon badaltee hai? yaqeen kar ki jis tarah too apnay ittihaadee asoor say maayoos ho kar sharminda huee hai usee tarah too naay ittihaadee misr say bhee naadim ho jaaegee. 37too us jagah say bhee apnay haathon ko sar par rakh kar niklegee. kyoonki rabb nay unhen radd kiya hai jin par too bharosa rakhtee hai. un say tujhay madad haasil naheen hogee.”