Yarmiyaah 19

qaum mittee kay tootay huay bartan kee maanind hogee

¹rabb nay hukm diya, “kumhaar kay paas ja kar mittee ka bartan khareed lay. phir avaam kay kuchh buzurgon aur chand ek buzurg imaamon ko apnay saath lay kar ²shaher say nikal ja. vaadee-ay-bin-hinnoom men chala ja jo shaher kay darvaazay banaam ‘theekray ka darvaaza’ kay saamnay hai. vahaan vah kalaam suna jo main tujhay sunaanay ko kahoonga. ³unhen bata,

‘ai yahoodaah kay baadshaaho aur yarooshalam kay baashindo, rabb ka kalaam suno! rabb-ul-afwaaj jo israaeel ka khuda hai farmaata hai ki main is maqaam par aisee aafat naazil karoonga ki jisay bhee is kee khabar milegee us kay kaan bajengay. ⁴kyoonki unhon nay mujhay tark karkay is maqaam ko ajnabee maaboodon kay havaalay kar diya hai. jin buton say na un kay baapdaada aur na yahoodaah kay baadshaah kabhee vaaqif thay un kay huzoor unhon nay qurbaaniyaan pesh keen. neez, unhon nay is jagah ko bequsooron kay khoon say bhar diya hai. ⁵unhon nay oonchee jagahon par baal devta kay liyay qurbaangaahen taameer keen taaki apnay beton ko un par jala kar usay pesh karen. main nay yah karnay ka kabhee hukm naheen diya tha. na main nay kabhee is ka zikr kiya, na kabhee meray zahen men is ka khayaal tak aaya.

⁶chunaanchay khabardaar! rabb farmaata hai ki aisa vaqt aanay vaala hai jab yah vaadee “toofat” ya “bin-hinnoom” naheen kahelaaegee balki “vaadee-ay-qatl-o-ghaarat.” ⁷is jagah main yahoodaah aur yarooshalam kay mansoobay khaak men mila doonga. main honay doonga ki un kay dushman unhen maut kay ghaat utaaren, ki jo unhen jaan say maarna chaahen vah is men kaamyaab ho jaaen. tab main un kee laashon ko parindon aur darindon ko khila doonga. ⁸main is shaher ko haulnaak tareeqay say tabaah karoonga. tab doosray usay apnay mazaaq ka nishaana banaaengay. jo bhee guzray us kay rongtay khaday ho jaaengay. us kee tabaahashuda haalat dekh kar vah “tauba tauba” kahega. ⁹jab un ka jaanee dushman shaher ka muhaasara karega to itna sakht kaal padega ki baashinday apnay bachchon aur ek doosray ko kha jaaengay.’

¹⁰phir saath vaalon kee maujoodgee men mittee kay bartan ko zameen par patakh day. ¹¹saath saath unhen bata, ‘rab-ul-afwaaj farmaata hai ki jis tarah mittee ka bartan paash paash ho gaya hai aur us kee marammat naamumkin hai usee tarah main is qaum aur shaher ko bhee paash paash kar doonga. us vaqt laashon ko toofat men dafnaaya jaaega, kyoonki kaheen aur jagah naheen milegee. ¹²is shaher aur is kay baashindon kay saath main yahee sulook karoonga. main is shaher ko toofat kee maanind bana doonga. yah rabb ka farmaan hai. ¹³yarooshalam kay ghar yahoodaah kay shaahee mahelon samet toofat kee tarah naapaak ho jaaengay. haan, vah tamaam ghar naapaak ho jaaengay jin kee chhaton par tamaam aasmaanee lashkar kay liyay bakhoor jalaaya jaata aur ajnabee maaboodon ko mai kee nazren pesh kee jaatee theen’.”

¹⁴is kay baad yaramiyaah vaadee-ay-toofat say vaapas aaya jahaan rabb nay usay nubuvvat karnay kay liyay bheja tha. phir vah rabb kay ghar kay sahen men khaday ho kar tamaam logon say mukhaatib hua, ¹⁵“rabb-ul-afwaaj jo israaeel ka khuda hai farmaata hai ki suno! main is shaher aur yahoodaah kay deegar shaheron par vah tamaam museebat laanay ko hoon jis ka elaan main nay kiya hai. kyoonki tum ad gaay ho aur meree baaten sunnay kay liyay tayyaar hee naheen.”