Yarmiyaah 18

allaah azeem kumhaar hai

¹rabb yaramiyaah say hamkalaam hua, ²“uth aur kumhaar kay ghar men ja! vahaan main tujh say hamkalaam hoonga.” ³chunaanchay main kumhaar kay ghar men pahunch gaya. us vaqt vah chaak par kaam kar raha tha. ⁴lekin mittee ka jo bartan vah apnay haathon say tashkeel day raha tha vah kharaab ho gaya. yah dekh kar kumhaar nay usee mittee say naya bartan bana diya jo usay ziyaada pasand tha.

⁵tab rabb mujh say hamkalaam hua, ⁶“ai israaeel, kya main tumhaaray saath vaisa sulook naheen kar sakta jaisa kumhaar apnay bartan say karta hai? jis tarah mittee kumhaar kay haath men tashkeel paatee hai usee tarah tum meray haath men tashkeel paatay ho.” yah rabb ka farmaan hai. ⁷“kabhee main elaan karta hoon ki kisee qaum ya saltanat ko jad say ukhaad doonga, usay gira kar tabaah kar doonga. ⁸lekin kaee baar yah qaum apnee ghalat raah ko tark kar detee hai. is soorat men main pachhta kar us par vah aafat naheen laata jo main nay laanay ko kaha tha. ⁹kabhee main kisee qaum ya saltanat ko paneeree kee tarah lagaanay aur taameer karnay ka elaan bhee karta hoon. ¹⁰lekin afsos, kaee dafa yah qaum meree naheen suntee balki aisa kaam karnay lagtee hai jo mujhay naapsand hai. is soorat men main pachhta kar us par vah meharbaanee naheen karta jis ka elaan main nay kiya tha.

¹¹ab yahoodaah aur yarooshalam kay baashindon say mukhaatib ho kar kah, ‘rabb farmaata hai ki main tum par aafat laanay kee tayyaariyaan kar raha hoon, main nay tumhaaray khilaaf mansooba baandh liya hai. chunaanchay har ek apnee ghalat raah say hat kar vaapas aaay, har ek apna chaal-chalan aur apna ravayya durust karay.’ ¹²lekin afsos, yah etiraaz karengay, ‘dafa karo! ham apnay hee mansoobay jaaree rakhengay. har ek apnay shareer dil kee zid kay mutaabiq hee zindagee guzaarega’.”

qaum rabb ko bhool gaee hai

¹³is liyay rabb farmaata hai, “deegar aqvaam say darayaaft karo ki un men kabhee aisee baat sunnay men aaee hai. kunvaaree israaeel say nihaayat ghinauna jurm hua hai! ¹⁴kya lubnaan kee pathreelee chotiyon kee barf kabhee pighal kar khatm ho jaatee hai? kya doordaraaz chashmon say bahenay vaala barfeela paanee kabhee tham jaata hai? ¹⁵lekin meree qaum mujhay bhool gaee hai. yah log baatil buton kay saamnay bakhoor jalaatay hain, un cheezon kay saamnay jin kay baais vah thokar kha kar qadeem raahon say hat gaay hain aur ab kachchay raaston par chal rahay hain. ¹⁶is liyay un ka mulk veeraan ho jaaega, ek aisee jagah jisay doosray apnay mazaaq ka nishaana banaaengay. jo bhee guzray us kay rongtay khaday ho jaaengay, vah afsos say apna sar hilaaega. ¹⁷dushman aaega to main apnee qaum ko us kay aagay aagay muntashir karoonga. jis tarah gard mashriqee hava kay tez jhonkon say ud kar bikhar jaatee hai usee tarah vah tittar-bittar ho jaaengay. jab aafat un par naazil hogee to main un kee taraf rujoo naheen karoonga balki apna munh un say pher loonga.” yaramiyaah kay khilaaf saazish

¹⁸yah sun kar log aapas men kahenay lagay, “aao, ham yaramiyaah kay khilaaf mansoobay baandhen, kyoonki us kee baaten saheeh naheen hain. na imaam shareeat kee hidaayat say, na daanishmand achchhay mashvaron say, aur na nabee allaah kay kalaam say maheroom ho jaaega. aao, ham zabaanee us par hamla karen aur us kee baaton par dhyaan na den, khwaah vah kuchh bhee kyoon na kahay.”

¹⁹ai rabb, mujh par tavajjuh day aur us par ghaur kar jo meray mukhaalif kah rahay hain. ²⁰kya insaan ko nek kaam kay badlay men bura kaam karna chaahiay? kyoonki unhon nay mujhay phansaanay kay liyay gadha khod kar tayyaar kar rakha hai. yaad kar ki main nay teray huzoor khaday ho kar un kay liyay shafaaat kee taaki tera ghazab un par naazil na ho. ²¹ab honay day ki un kay bachchay bhookay mar jaaen aur vah khud talvaar kee zad men aaen. un kee beeviyaan beaulaad aur shauharon say maheroom ho jaaen. un kay aadmiyon ko maut kay ghaat utaara jaaay, un kay naujavaan jang men ladtay ladtay halaak ho jaaen. ²²achaanak un par jangee dastay la taaki un kay gharon say cheekhon kee aavaazen buland hon. kyoonki unhon nay mujhay pakadnay kay liyay gadha tayyaar kar rakha hai, unhon nay meray paaon ko phansaanay kay liyay meray raastay men phanday chhupa rakhay hain.

²³ai rabb, too un kee mujhay qatl karnay kee tamaam saazishen jaanta hai. un ka qusoor muaaf na kar, aur un kay gunaahon ko na mita balki unhen hamesha yaad kar. honay day ki vah thokar kha kar teray saamnay gir jaaen. jab tera ghazab naazil hoga to un say bhee nipat lay.