Yarmiyaah 17

yahoodaah ka gunaah aur us kee sazaa

¹ai yahoodaah kay logo, tumhaara gunaah tumhaaree zindagiyon ka anmit hissa ban gaya hai. usay heeray kee nok rakhnay vaalay lohay kay aalay say tumhaaray dilon kee takhtiyon aur tumhaaree qurbaanagaahon kay seengon par kanda kiya gaya hai. ²na sirf tum balki tumhaaray bachchay bhee apnee qurbaanagaahon aur aseerat devee kay khambon ko yaad kartay hain, khwaah vah ghanay darakhton kay saay men ya oonchee jagahon par kyoon na hon. ³ai meray pahaad jo deehaat say ghira hua hai, teray pooray mulk par gunaah ka asar hai, is liyay main honay doonga ki sab kuchh loot liya jaaega. tera maal, teray khazaanay aur teree oonchee jagahon kee qurbaangaahen sab chheen lee jaaengee.

⁴apnay qusoor kay sabab say tujhay apnee mauroosee milkiyat chhodnee padegee, vah milkiyat jo tujhay meree taraf say milee thee. main tujhay teray dushmanon ka ghulaam bana doonga, aur too ek naamaaloom mulk men basega. kyoonki tum logon nay mujhay taish dilaaya hai, aur ab tum par mera ghazab kabhee na bujhnay vaalee aag kee tarah bhadakta rahega.”

mukhtalif farmaan

⁵rabb farmaata hai, “us par laanat jis ka dil rabb say door ho kar sirf insaan aur usee kee taaqat par bharosa rakhta hai. ⁶vah registaan men jhaadee kee maanind hoga, usay kisee bhee achchhee cheez ka tajriba naheen hoga balki vah biyaabaan kay aisay pathreelay aur kallar vaalay ilaaqon men basega jahaan koee aur naheen raheta. ⁷lekin mubaarak hai vah jo rabb par bharosa rakhta hai, jis ka etimaad usee par hai. ⁸vah paanee kay kinaaray par lagay us darakht kee maanind hai jis kee jaden naher tak phailee huee hain. jhulsaanay vaalee garmee bhee aaay to usay dar naheen, balki us kay pattay haray-bharay rahetay hain. kaal bhee paday to vah pareshaan naheen hota balki vaqt par phal laata raheta hai.

⁹dil hadd say ziyaada farebdih hai, aur us ka ilaaj naamumkin hai. kaun us ka saheeh ilm rakhta hai? ¹⁰main, rabb hee dil kee tafteesh karta hoon. main har ek kee baatinee haalat jaanch kar usay us kay chaal-chalan aur amal ka munaasib ajr deta hoon.

¹¹jis shakhs nay ghalat tareeqay say daulat jama kee hai vah us teetar kee maanind hai jo kisee doosray kay andon par baith jaata hai. kyoonki zindagee kay urooj par usay sab kuchh chhodna padega, aur aakhirkaar us kee hamaaqat sab par zaahir ho jaaegee.”

¹²hamaara maqdis allaah ka jalaalee takht hai jo azal say azeem hai. ¹³ai rabb, too hee israaeel kee ummeed hai. tujhay tark karnay vaalay sab sharminda ho jaaengay. tujh say door honay vaalay khaak men milaaay jaaengay, kyoonki unhon nay rabb ko chhod diya hai jo zindagee kay paanee ka sarchashma hai.

madad kay liyay yaramiyaah kee darakhwaast

¹⁴ai rabb, too hee mujhay shifa day to mujhay shifa milegee. too hee mujhay bacha to main bachoonga. kyoonki too hee mera fakhar hai. ¹⁵log mujh say poochhtay rahetay hain, “rabb ka jo kalaam too nay pesh kiya vah kahaan hai? usay poora honay day!” ¹⁶ai allaah, too nay mujhay apnee qaum ka gallaabaan banaaya hai, aur main nay yah zimmaadaaree kabhee naheen chhodee. main nay kabhee khwaahish naheen rakhee ki museebat ka din aaay. too yah sab kuchh jaanta hai, jo bhee baat meray munh say niklee hai vah teray saamnay hai. ¹⁷ab meray liyay dahshat ka baais na ban! museebat kay din main tujh men hee panaah leta hoon. ¹⁸mera taaqqub karnay vaalay sharminda ho jaaen, lekin meree rusvaaee na ho. un par dahshat chha jaaay, lekin main is say bacha rahoon. un par museebat ka din naazil kar, un ko do baar kuchal kar khaak men mila day.

sabat ka din manaao

¹⁹rabb mujh say hamkalaam hua, “shaher kay avaamee darvaazay men khada ho ja, jisay yahoodaah kay baadshaah istemaal kartay hain jab shaher men aatay aur us say nikaltay hain. isee tarah yarooshalam kay deegar darvaazon men bhee khada ho ja. ²⁰vahaan logon say kah, ‘ai darvaazon men say guzarnay vaalo, rabb ka kalaam suno! ai yahoodaah kay baadshaaho aur yahoodaah aur yarooshalam kay tamaam baashindo, meree taraf kaan lagaao!

²¹rabb farmaata hai ki apnee jaan khatray men na daalo balki dhyaan do ki tum sabat kay din maal-o-asbaab shaher men na laao aur usay utha kar shaher kay darvaazon men daakhil na ho. ²²na sabat kay din bojh utha kar apnay ghar say kaheen aur lay jaao, na koee aur kaam karo, balki usay is tarah manaana ki makhsoos-o-muqaddas ho. main nay tumhaaray baapdaada ko yah karnay ka hukm diya tha, ²³lekin unhon nay meree na sunee, na tavajjuh dee balki apnay mauqif par aday rahay aur na meree sunee, na meree tarbiyat qabool kee.

²⁴rabb farmaata hai ki agar tum vaaqaee meree suno aur sabat kay din apna maal-o-asbaab is shaher men na laao balki aaraam karnay say yah din makhsoos-o-muqaddas maano ²⁵to phir aainda bhee daaood kee nasal kay baadshaah aur sardaar is shaher kay darvaazon men say guzarengay. tab vah ghodon aur rathon par savaar ho kar apnay afsaron aur yahoodaah aur yarooshalam kay baashindon kay saath shaher men aatay jaatay rahengay. agar tum sabat ko maano to yah shaher hamesha tak aabaad rahega. ²⁶phir pooray mulk say log yahaan aaengay. yahoodaah kay shaheron aur yarooshalam kay gird-o-navaah kay deehaat say, binyameen kay qabaailee ilaaqay say, maghrib kay nishebee pahaadee ilaaqay say, pahaadee ilaaqay say aur dasht-ay-najab say sab apnee qurbaaniyaan la kar rabb kay ghar men pesh karengay. un kee tamaam bhasm honay vaalee qurbaaniyaan, zabah, ghalla, bakhoor aur salaamatee kee qurbaaniyaan rabb kay ghar men chadhaaee jaaengee. ²⁷lekin agar tum meree na suno aur sabat ka din makhsoos-o-muqaddas na maano to phir tumhen sakht saza milegee. agar tum sabat kay din apna maal-o-asbaab shaher men laao to main in hee darvaazon men ek na bujhnay vaalee aag laga doonga jo jaltee jaltee yarooshalam kay mahelon ko bhasm kar degee’.”