Yarmiyaah 16
yaramiyaah ko shaadee karnay kee ijaazat naheen
1rabb mujh say hamkalaam hua, 2“is maqaam men na teree shaadee ho, na teray betay-betiyaan paida ho jaaen.” 3kyoonki rabb yahaan paida honay vaalay betay-betiyon aur un kay maan-baap kay baaray men farmaata hai, 4“vah muhalak beemaariyon say mar kar kheton men gobar kee tarah paday rahengay. na koee un par maatam karega, na unhen dafanaaega, kyoonki vah talvaar aur kaal say halaak ho jaaengay, aur un kee laashen parindon aur darindon kee khuraak ban jaaengee.”
5rabb farmaata hai, “aisay ghar men mat jaana jis men koee faut ho gaya hai [a] lafzee tarjuma : jis men janaazay ka khaana khilaaya ja raha hai. . us men na maatam karnay kay liyay, na afsos karnay kay liyay daakhil hona. kyoonki ab say main is qaum par apnee salaamatee, meharbaanee aur rahem ka izhaar naheen karoonga.” yah rabb ka farmaan hai. 6“is mulk kay baashinday mar jaaengay, khwaah baday hon ya chhotay. aur na koee unhen dafanaaega, na maatam karega. koee naheen hoga jo gham kay maaray apnee jild ko kaatay ya apnay sar ko mundavaaay. 7kisee ka baap ya maan bhee intiqaal kar jaaay to bhee log maatam karnay vaalay ghar men naheen jaaengay, na tasallee denay kay liyay janaazay kay khaanay-peenay men shareek hongay. 8aisay ghar men bhee daakhil na hona jahaan log ziyaafat kar rahay hain. un kay saath khaanay-peenay kay liyay mat baithna.” 9kyoonki rabb-ul-afwaaj jo israaeel ka khuda hai farmaata hai, “tumhaaray jeetay jee, haan tumhaaray dekhtay dekhtay main yahaan khushee-o-shaadmaanee kee aavaazen band kar doonga. ab say doolha dulhan kee aavaazen khaamosh ho jaaengee.
10jab too is qaum ko yah sab kuchh bataaega to log poochhengay, ‘rabb itnee badee aafat ham par laanay par kyoon tula hua hai? ham say kya jurm hua hai? ham nay rabb apnay khuda ka kya gunaah kiya hai?’ 11unhen javaab day, ‘vajah yah hai ki tumhaaray baapdaada nay mujhay tark kar diya. vah meree shareeat kay taabay na rahay balki mujhay chhod kar ajnabee maaboodon kay peechhay lag gaay aur un hee kee khidmat aur pooja karnay lagay. 12lekin tum apnay baapdaada kee nisbat kaheen ziyaada ghalat kaam kartay ho. dekho, meree koee naheen sunta balki har ek apnay shareer dil kee zid kay mutaabiq zindagee guzaarta hai. 13is liyay main tumhen is mulk say nikaal kar ek aisay mulk men phaink doonga jis say na tum aur na tumhaaray baapdaada vaaqif thay. vahaan tum din raat ajnabee maaboodon kee khidmat karogay, kyoonki us vaqt main tum par rahem naheen karoonga’.”
jilaavatanee say vaapsee
14lekin rabb yah bhee farmaata hai, “aisa vaqt aanay vaala hai ki log qasam khaatay vaqt naheen kahengay, ‘rabb kee hayaat kee qasam jo israaeeliyon ko misr say nikaal laaya.’ 15is kay bajaay vah kahengay, ‘rabb kee hayaat kee qasam jo israaeeliyon ko shimaalee mulk aur un deegar mamaalik say nikaal laaya jin men us nay unhen muntashir kar diya tha.’ kyoonki main unhen us mulk men vaapas laaoonga jo main nay un kay baapdaada ko diya tha.”
aanay vaalee sazaa
16lekin maujooda haal kay baaray men rabb farmaata hai, “main bahut say maaheegeer bhej doonga jo jaal daal kar unhen pakdengay. is kay baad main mut’addid shikaaree bhej doonga jo un ka taaqqub karkay unhen har jagah pakdengay, khwaah vah kisee pahaad ya teelay par chhup gaay hon, khwaah chataanon kee kisee daraad men. 17kyoonki un kee tamaam harkaten mujhay nazar aatee hain. meray saamnay vah chhup naheen saktay, aur un ka qusoor meray saamnay posheeda naheen hai. 18ab main unhen un kay gunaahon kee dugnee saza doonga, kyoonki unhon nay apnay bejaan buton aur ghinaunee cheezon say meree mauroosee zameen ko bhar kar meray mulk kee behuramtee kee hai.”
yaramiyaah ka rabb par etimaad
19ai rabb, too meree quvvat aur mera qil’a hai, museebat kay din main tujh men panaah leta hoon. duniya kee intiha say aqvaam teray paas a kar kahengee, “hamaaray baapdaada ko meeraas men jhoot hee mila, aisay bekaar but jo un kee madad na kar sakay. 20insaan kis tarah apnay liyay khuda bana sakta hai? us kay but to khuda naheen hain.”
21rabb farmaata hai, “chunaanchay is baar main unhen saheeh pahechaan ata karoonga. vah meree quvvat aur taaqat ko pahechaan lengay, aur vah jaan lengay ki mera naam rabb hai.