Yarmiyaah 15

saza zaroor aaegee, kyoonki der ho gaee hai

¹phir rabb mujh say hamkalaam hua, “ab say mera dil is qaum kee taraf maail naheen hoga, khwaah moosa aur samooel meray saamnay a kar un kee shafaaat kyoon na karen. unhen meray huzoor say nikaal day, vah chalay jaaen! ²agar vah tujh say poochhen, ‘ham kidhar jaaen?’ to unhen javaab day, ‘rabb farmaata hai ki jisay marna hai vah maray, jisay talvaar kee zad men aana hai vah talvaar ka luqma banay, jisay bhookon marna hai vah bhookon maray, jisay qaid men jaana hai vah qaid ho jaaay’.” ³rabb farmaata hai, “main unhen chaar qism kee saza doonga. ek, talvaar unhen qatl karegee. doosray, kuttay un kee laashen ghaseet kar lay jaaengay. teesray aur chauthay, parinday aur darinday unhen kha kha kar khatm kar dengay. ⁴jab main apnee qaum say nipat loonga to duniya kay tamaam mamaalik us kee haalat dekh kar kaamp uthengay. un kay rongtay khaday ho jaaengay jab vah yahoodaah kay baadshaah manassee bin hizaqiyaah kee un shareer harkaton ka anjaam dekhengay jo us nay yarooshalam men kee hain.

⁵ai yarooshalam, kaun tujh par taras khaaega, kaun hamdardee ka izhaar karega? kaun teray ghar a kar tera haal poochhega?” ⁶rabb farmaata hai, “too nay mujhay radd kiya, apna munh mujh say pher liya hai. ab main apna haath teray khilaaf badha kar tujhay tabaah kar doonga. kyoonki main hamdardee dikhaatay dikhaatay tang a gaya hoon.

⁷jis tarah gandum ko hava men uchhaal kar bhoosay say alag kiya jaata hai usee tarah main unhen mulk kay darvaazon kay saamnay phatkoonga. choonki meree qaum nay apnay ghalat raaston ko tark na kiya is liyay main usay beaulaad bana kar barbaad kar doonga. ⁸us kee bevaaen samundar kee ret jaisee beshumaar hongee. dopaher kay vaqt hee main naujvaanon kee maaon par tabaahee naazil karoonga, achaanak hee un par pech-o-taab aur dahshat chha jaaegee. ⁹saat bachchon kee maan nidhaal ho kar jaan say haath dho baithegee. din kay vaqt hee us ka sooraj doob jaaega, us ka fakhar aur izzat jaatee rahegee. jo log bach jaaengay unhen main dushman kay aagay aagay talvaar say maar daaloonga.” yah rabb ka farmaan hai.

yaramiyaah rabb say shikaayat karta hai

¹⁰ai meree maan, mujh par afsos! afsos ki too nay mujh jaisay shakhs ko janm diya jis kay saath poora mulk jhagadta aur ladta hai. go main nay na udhaar diya na liya to bhee sab mujh par laanat kartay hain. ¹¹rabb nay javaab diya, “yaqeenan main tujhay mazboot karkay apna achchha maqsad poora karoonga. yaqeenan main honay doonga ki museebat kay vaqt dushman tujh say minnat karay.

¹²kyoonki koee us lohay ko tod naheen sakega jo shimaal say aaega, haan lohay aur peetal ka vah sariya toda naheen jaaega. ¹³main teray khazaanay dushman ko muft men doonga. tujhay tamaam gunaahon ka ajr milega jab vah pooray mulk men teree daulat lootnay aaega. ¹⁴tab main tujhay dushman kay zareeay ek mulk men pahuncha doonga jis say too naavaaqif hai. kyoonki meray ghazab kee bhadaktee aag tujhay bhasm kar degee.”

¹⁵ai rabb, too sab kuchh jaanta hai. mujhay yaad kar, mera khayaal kar, taaqqub karnay vaalon say mera intiqaam lay! unhen yahaan tak bardaasht na kar ki aakhirkaar mera safaaya ho jaaay. isay dhyaan men rakh ki meree rusvaaee teree hee khaatir ho rahee hai. ¹⁶ai rabb, lashkaron kay khuda, jab bhee tera kalaam mujh par naazil hua to main nay usay hazam kiya, aur mera dil us say khush-o-khurram hua. kyoonki mujh par teray hee naam ka thappa laga hai. ¹⁷jab deegar log rangraliyon men apnay dil bahelaatay thay to main kabhee un kay saath na baitha, kabhee un kee baaton say lutf’andoz na hua. naheen, tera haath mujh par tha, is liyay main doosron say door hee baitha raha. kyoonki too nay meray dil ko qaum par qaher say bhar diya tha. ¹⁸kya vajah hai ki mera dard kabhee khatm naheen hota, ki mera zakhm laailaaj hai aur kabhee naheen bharta? too meray liyay farebdih chashma ban gaya hai, aisee nadee jis kay paanee par etimaad naheen kiya ja sakta.

¹⁹rabb javaab men farmaata hai, “agar too meray paas vaapas aaay to main tujhay vaapas aanay doonga, aur too dubaara meray saamnay haazir ho sakega. aur agar too fuzool baaten na karay balki meray laaiq alfaaz bolay to mera tarjumaan hoga. laazim hai ki log teree taraf rujoo karen, lekin khabardaar, kabhee un kee taraf rujoo na kar!” ²⁰rabb farmaata hai, “main tujhay peetal kee mazboot deevaar bana doonga taaki too is qaum ka saamna kar sakay. yah tujh say ladengay lekin tujh par ghaalib naheen aaengay, kyoonki main teray saath hoon, main teree madad karkay tujhay bachaaay rakhoonga. ²¹main tujhay bedeenon kay haath say bachaaoonga aur fidya day kar zaalimon kee girift say chhudaaoonga.”