Yarmiyaah 14

kaal kay dauraan rabb ka paighaam

¹kaal kay dauraan rabb yaramiyaah say hamkalaam hua,

²“yahoodaah maatam kar raha hai, us kay darvaazon kee haalat qaabil-ay-rahem hai. log sogvaar haalat men farsh par baithay hain, aur yarooshalam kee cheekhen aasmaan tak buland ho rahee hain. ³ameer apnay naukron ko paanee bharnay bhejtay hain, lekin hauzon kay paas pahunch kar pata chalta hai ki paanee naheen hai, is liyay vah khaalee haath vaapas a jaatay hain. sharmindagee aur nadaamat kay maaray vah apnay saron ko dhaamp letay hain. ⁴baarish na honay kee vajah say zameen men daraaden pad gaee hain. kheton men kaam karnay vaalay bhee sharm kay maaray apnay saron ko dhaamp letay hain. ⁵ghaas naheen hai, is liyay hirnee apnay naumaulood bachchay ko chhod detee hai. ⁶janglee gadhay banjar teelon par khaday geeddon kee tarah haamptay hain. hariyaalee na milnay kee vajah say vah bejaan ho rahay hain.”

⁷ai rabb, hamaaray gunaah hamaaray khilaaf gavaahee day rahay hain. to bhee apnay naam kee khaatir ham par rahem kar. ham maantay hain ki buree tarah bevafa ho gaay hain, ham nay tera hee gunaah kiya hai. ⁸ai allaah, too israaeel kee ummeed hai, too hee museebat kay vaqt usay chhutkaara deta hai. to phir hamaaray saath tera sulook mulk men ajnabee ka sa kyoon hai? too raat ko kabhee idhar kabhee idhar thahernay vaalay musaafir jaisa kyoon hai? ⁹too kyoon us aadmee kee maanind hai jo achaanak dam-ba-khud ho jaata hai, us soormay kee maanind jo bebas ho kar bacha naheen sakta. ai rabb, too to hamaaray darmiyaan hee raheta hai, aur ham par teray hee naam ka thappa laga hai. hamen tark na kar!

is qaum kay liyay dua mat karnaa

¹⁰lekin rabb is qaum kay baaray men farmaata hai, “yah log aavaara phirnay kay shauqeen hain, yah apnay paaon ko rok hee naheen saktay. main un say naakhush hoon. ab mujhay un kay ghalat kaam yaad rahengay, ab main un kay gunaahon kee saza doonga.” ¹¹rabb mazeed mujh say hamkalaam hua, “is qaum kee baheboodee kay liyay dua mat karna. ¹²go yah roza bhee rakhen to bhee main in kee iltijaaon par dhyaan naheen doonga. go yah bhasm honay vaalee aur ghalla kee qurbaaniyaan pesh bhee karen to bhee main in say khush naheen hoonga balki inhen kaal, talvaar aur beemaariyon say nest-o-naabood kar doonga.”

¹³yah sun kar main nay etiraaz kiya, “ai rabb qaadir-ay-mutlaq, nabee inhen bataatay aaay hain, ‘na qatl-o-ghaarat ka khatra hoga, na kaal padega balki main yaheen tumhaaray liyay amn-o-amaan ka pakka band-o-bast kar loonga’.”

¹⁴rabb nay javaab diya, “nabee mera naam lay kar jhootee peshgoiyaan bayaan kar rahay hain. main nay na unhen bheja, na unhen koee zimmaadaaree dee aur na un say hamkalaam hua. yah tumhen jhootee royaaen, fuzool peshgoiyaan aur apnay dil kay vahem sunaatay rahay hain.” ¹⁵chunaanchay rabb farmaata hai, “yah nabee talvaar aur kaal kee zad men a kar mar jaaengay. kyoonki go main nay unhen naheen bheja to bhee yah meray naam men nubuvvat karkay kahetay hain ki mulk men na qatl-o-ghaarat ka khatra hoga, na kaal padega. ¹⁶aur jin logon ko vah apnee nubuvvaten sunaatay rahay hain vah talvaar aur kaal ka shikaar ban jaaengay, un kee laashen yarooshalam kee galiyon men phaink dee jaaengee. unhen dafnaanay vaala koee naheen hoga, na un ko, na un kee beeviyon ko aur na un kay betay-betiyon ko. yoon main un par un kee apnee badkaaree naazil karoonga.

ai rabb, hamen muaaf kar!

¹⁷ai yaramiyaah, unhen yah kalaam suna, ‘din raat meray aansoo bah rahay hain. vah ruk naheen saktay, kyoonki meree qaum, meree kunvaaree betee ko gaheree chot lag gaee hai, aisa zakhm jo bhar naheen sakta. ¹⁸deehaat men ja kar mujhay vah sab nazar aatay hain jo talvaar say qatl kiay gaay hain. jab main shaher men vaapas aata hoon to chaaron taraf kaal kay buray asraat dikhaaee detay hain. nabee aur imaam mulk men maaray maaray phir rahay hain, aur unhen maaloom naheen ki kya karen’.”

¹⁹ai rabb, kya too nay yahoodaah ko saraasar radd kiya hai? kya tujhay siyyoon say itnee ghin aatee hai? too nay hamen itnee baar kyoon maara ki hamaara ilaaj naamumkin ho gaya hai? ham amn-o-amaan kay intizaar men rahay, lekin haalaat theek na huay. ham shifa paanay kee ummeed rakhtay thay, lekin is kay bajaay ham par dahshat chha gaee.

²⁰ai rabb, ham apnee bedeenee aur apnay baapdaada ka qusoor tasleem kartay hain. ham nay tera hee gunaah kiya hai. ²¹apnay naam kee khaatir hamen haqeer na jaan, apnay jalaalee takht kee behuramtee honay na day! hamaaray saath apna ahd yaad kar, usay mansookh na kar. ²²kya deegar aqvaam kay devtaaon men say koee hai jo baarish barsa sakay? ya kya aasmaan khud hee baarishen zameen par bhej deta hai? hargiz naheen, balki too hee yah sab kuchh karta hai, ai rabb hamaaray khuda. isee liyay ham tujh par ummeed rakhtay hain. too hee nay yah saara intizaam qaaim kiya hai.