Yarmiyaah 13

galee sadee langotee

¹rabb mujh say hamkalaam hua, “ja, kataan kee langotee khareed kar usay baandh lay. lekin vah bheeg na jaaay.” ²main nay aisa hee kiya. langotee khareed kar main nay usay baandh liya. ³tab rabb ka kalaam dubaara mujh par naazil hua, ⁴“ab vah langotee lay jo too nay khareed kar baandh lee hai. darya-ay-furaat kay paas ja kar usay kisee chataan kee daraad men chhupa day.” ⁵chunaanchay main ravaana ho kar darya-ay-furaat kay kinaaray pahunch gaya. vahaan main nay langotee ko kaheen chhupa diya jis tarah rabb nay hukm diya tha. ⁶bahut din guzar gaay. phir rabb mujh say ek baar phir hamkalaam hua, “uth, darya-ay-furaat kay paas ja kar vah langotee nikaal la jo main nay tujhay vahaan chhupaanay ko kaha tha.” ⁷chunaanchay main ravaana ho kar darya-ay-furaat kay paas pahunch gaya. vahaan main nay khod kar langotee ko us jagah say nikaal liya jahaan main nay usay chhupa diya tha. lekin afsos, vah gal sad gaee thee, bilkul bekaar ho gaee thee.

⁸tab rabb ka kalaam mujh par naazil hua, ⁹“jis tarah yah kapda zameen men dab kar gal sad gaya usee tarah main yahoodaah aur yarooshalam ka bada ghamand khaak men mila doonga. ¹⁰yah kharaab log meree baaten sunnay kay liyay tayyaar naheen balki apnay shareer dil kee zid kay mutaabiq zindagee guzaartay hain. ajnabee maaboodon kay peechhay lag kar yah un hee kee khidmat aur pooja kartay hain. lekin in ka anjaam langotee kee maanind hee hoga. yah bekaar ho jaaengay. ¹¹kyoonki jis tarah langotee aadmee kee kamar kay saath liptee rahetee hai usee tarah main nay pooray israaeel aur pooray yahoodaah ko apnay saath lipatnay ka mauqa faraaham kiya taaki vah meree qaum aur meree shuharat, taareef aur izzat ka baais ban jaaen. lekin afsos, vah sunnay kay liyay tayyaar naheen thay.” yah rabb ka farmaan hai.

mai kay ghaday bharay huay hain

¹²“unhen bata day ki rabb israaeel ka khuda farmaata hai, ‘har ghaday ko mai say bharna hai.’ vah javaab men kahengay, ‘ham to khud jaantay hain ki har ghaday ko mai say bharna hai.’ ¹³tab unhen is ka matlab bata. ‘rabb farmaata hai ki is mulk kay tamaam baashinday ghaday hain jinhen main mai say bhar doonga. daaood kay takht par baithnay vaalay baadshaah, imaam, nabee aur yarooshalam kay tamaam rahenay vaalay sab kay sab bhar bhar kar nashay men dhut ho jaaengay. ¹⁴tab main unhen ek doosray kay saath takra doonga, aur baap beton kay saath mil kar tukday tukday ho jaaengay. na main taras khaaoonga, na un par rahem karoonga balki hamdardee dikhaaay baghair unhen tabaah karoonga’.” yah rabb ka farmaan hai.

qaid kee haibtanaak haalat

¹⁵dhyaan say suno! maghroor na ho, kyoonki rabb nay khud farmaaya hai. ¹⁶is say pahelay ki taareekee phail jaaay aur tumhaaray paaon dhundalepan men pahaadon kay saath thokar khaaen, rabb apnay khuda ko jalaal do! kyoonki us vaqt go tum raushnee kay intizaar men rahogay, lekin allaah andheray ko mazeed badhaaega, gaheree taareekee tum par chha jaaegee. ¹⁷lekin agar tum na suno to main tumhaaray takabbur ko dekh kar posheedgee men girya-o-zaaree karoonga. main zaar zaar rooonga, meree aankhon say aansoo zor say tapkengay, kyoonki dushman rabb kay revad ko pakad kar jilaavatan kar dega.

¹⁸baadshaah aur us kee maan ko ittila day, “apnay takhton say utar kar zameen par baith jaao, kyoonki tumhaaree shaan ka taaj tumhaaray saron say gir gaya hai.” ¹⁹dasht-ay-najab kay shaher band kiay jaaengay, aur unhen kholnay vaala koee naheen hoga. pooray yahoodaah ko jilaavatan kar diya jaaega, ek bhee naheen bachega.

²⁰ai yarooshalam, apnee nazar utha kar unhen dekh jo shimaal say a rahay hain. ab vah revad kahaan raha jo teray sapurd kiya gaya, teree shaandaar bhed-bakriyaan kidhar hain? ²¹too us din kya kahegee jab rabb unhen tujh par muqarrar karega jinhen too nay apnay qareebee dost banaaya tha? janm denay vaalee aurat ka sa dard tujh par ghaalib aaega. ²²aur agar teray dil men savaal ubhar aaay ki meray saath yah kyoon ho raha hai to sun! yah teray sangeen gunaahon kee vajah say ho raha hai. in hee kee vajah say teray kapday utaaray gaay hain aur teree ismatdaree huee hai.

²³kya kaala aadmee apnee jild ka rang ya cheeta apnee khaal kay dhabbay badal sakta hai? hargiz naheen! tum bhee badal naheen saktay. tum ghalat kaam kay itnay aadee ho gaay ho ki saheeh kaam kar hee naheen saktay.

²⁴“jis tarah bhoosa registaan kee tez hava men ud kar tittar-bittar ho jaata hai usee tarah main teray baashindon ko muntashir kar doonga.” ²⁵rabb farmaata hai, “yahee tera anjaam hoga, main nay khud muqarrar kiya hai ki tujhay yah ajr milna hai. kyoonki too nay mujhay bhool kar jhoot par bharosa rakha hai. ²⁶main khud teray kapday utaaroonga taaki teree barahenagee sab ko nazar aaay. ²⁷main nay pahaadee aur maidaanee ilaaqon men teree ghinaunee harkaton par khoob dhyaan diya hai. teree zinaakaaree, tera mastaana hinahinaana, teree besharm ismatafaroshee, sab kuchh mujhay nazar aata hai. ai yarooshalam, tujh par afsos! too paak-saaf ho jaanay kay liyay tayyaar naheen. mazeed kitnee der lagegee?”