Yarmiyaah 12

bedeenon ko itnee kaamyaabee kyoon haasil hotee hai?

¹ai rabb, too hamesha haq par hai, lihaaza adaalat men tujh say shikaayat karnay ka kya faaida? taaham main apna muaamala tujhay pesh karna chaahata hoon. bedeenon ko itnee kaamyaabee kyoon haasil hotee hai? ghaddaar itnay sukoon say zindagee kyoon guzaartay hain? ²too nay unhen zameen men laga diya, aur ab vah jad pakad kar khoob ugnay lagay balki phal bhee la rahay hain. go tera naam un kee zabaan par raheta hai, lekin un ka dil tujh say door hai. ³lekin ai rabb, too mujhay jaanta hai. too mera mulaahaza karkay meray dil ko parakhta raheta hai. guzaarish hai ki too unhen bhedon kee tarah ghaseet kar zabah karnay kay liyay lay ja. unhen qatl-o-ghaarat kay din kay liyay makhsoos kar!

⁴mulk kab tak kaal kee girift men rahega? kheton men hariyaalee kab tak murjhaaee huee nazar aaegee? baashindon kee buraaee kay baais jaanvar aur parinday ghaaib ho gaay hain. kyoonki log kahetay hain, “allaah ko naheen maaloom ki hamaaray saath kya ho jaaega.”

⁵rabb mujh say hamkalaam hua, “paidal chalnay vaalon say daud ka muqaabla karna tujhay thaka deta hai, to phir too kis tarah ghodon ka muqaabla karega? too apnay aap ko sirf vahaan mahfooz samajhta hai jahaan chaaron taraf amn-o-amaan phaila hua hai, to phir too darya-ay-yardan kay gunjaan jangal say kis tarah niptega? ⁶kyoonki teray sagay bhaaee, haan teray baap ka ghar bhee tujh say bevafa ho gaya hai. yah bhee buland aavaaz say teray peechhay tujhay gaaliyaan detay hain. un par etimaad mat karna, khwaah vah teray saath achchhee baaten kyoon na karen.

allaah apnay mulk par maatam karta hai

⁷main nay apnay ghar israaeel ko tark kar diya hai. jo meree mauroosee milkiyat thee usay main nay radd kiya hai. main nay apnay lakht-ay-jigar ko us kay dushmanon kay havaalay kar diya hai. ⁸kyoonki meree qaum jo meree mauroosee milkiyat hai meray saath bura sulook kartee hai. jangal men sherbabar kee tarah vah meray khilaaf dahaadatee hai, is liyay main us say nafrat karta hoon. ⁹ab meree mauroosee milkiyat us rangeen shikaaree parinday kee maanind hai jisay deegar shikaaree parindon nay gher rakha hai. jaao, tamaam darindon ko ikattha karo taaki vah a kar usay kha jaaen. ¹⁰mut’addid gallaabaanon nay meray angoor kay baagh ko kharaab kar diya hai. meray piyaaray khet ko unhon nay paaon talay raund kar registaan men badal diya hai. ¹¹ab vah banjar zameen ban kar ujaad haalat men meray saamnay maatam karta hai. poora mulk veeraan-o-sunsaan hai, lekin koee parva naheen karta.

¹²tabaahakun faujee biyaabaan kee banjar bulandiyon par say utar kar qareeb pahunch rahay hain. kyoonki rabb kee talvaar mulk kay ek siray say doosray siray tak sab kuchh kha jaaegee. koee bhee naheen bachega.

¹³is qaum nay gandum ka beej boya, lekin kaanton kee fasal pak gaee. khoob mehanat-mashaqqat karnay kay baavujood bhee kuchh haasil na hua, kyoonki rabb ka sakht ghazab qaum par naazil ho raha hai. chunaanchay ab rusvaaee kee fasal kaato!”

allaah ka padosee mamaalik kay liyay paighaam

¹⁴rabb farmaata hai, “main un tamaam shareer padosee mamaalik ko jad say ukhaad doonga jo meree qaum israaeel kee milkiyat ko chheennay kee koshish kar rahay hain, vah milkiyat jo main nay khud unhen meeraas men dee thee. saath saath main yahoodaah ko bhee jad say un kay darmiyaan say nikaal doonga. ¹⁵lekin baad men main un par taras kha kar har ek ko phir us kee apnee mauroosee zameen aur apnay mulk men pahuncha doonga. ¹⁶pahelay un deegar qaumon nay meree qaum ko baal devta kee qasam khaanay ka tarz sikhaaya. lekin ab agar vah meree qaum kee raahen achchhee tarah seekh kar meray hee naam aur meree hee hayaat kee qasam khaaen to meree qaum kay darmiyaan rah kar az sar-ay-nau qaaim ho jaaengee. ¹⁷lekin jo qaum meree naheen sunegee usay main hatmee taur par jad say ukhaad kar nest kar doonga.” yah rabb ka farmaan hai.