Yarmiyaah 11

qaum kee ahdashikanee

¹rabb yaramiyaah say hamkalaam hua, ²“yarooshalam aur yahoodaah kay baashindon say kah ki us ahd kee sharaait par dhyaan do jo main nay tumhaaray saath baandha tha. ³rabb jo israaeel ka khuda hai farmaata hai ki us par laanat jo us ahd kee sharaait pooree na kare ⁴jo main nay tumhaaray baapdaada say baandha tha jab unhen misr say nikaal laaya, us maqaam say jo loha pighlaanay vaalee bhattee kee maanind tha. us vaqt main bola, ‘meree suno aur meray har hukm par amal karo to tum meree qaum hogay aur main tumhaara khuda hoonga. ⁵phir main vah vaada poora karoonga jo main nay qasam kha kar tumhaaray baapdaada say kiya tha, main tumhen vah mulk doonga jis men doodh aur shahed kee kasrat hai.’ aaj tum usee mulk men rah rahay ho.”

main, yaramiyaah nay javaab diya, “ai rabb, aameen, aisa hee ho!”

⁶tab rabb nay mujhay hukm diya ki yahoodaah kay shaheron aur yarooshalam kee galiyon men phir kar yah tamaam baaten suna day. elaan kar, “ahd kee sharaait par dhyaan day kar un par amal karo. ⁷tumhaaray baapdaada ko misr say nikaaltay vaqt main nay unhen aagaah kiya ki meree suno. aaj tak main baar baar yahee baat duharaata raha, ⁸lekin unhon nay na meree sunee, na dhyaan diya balki har ek apnay shareer dil kee zid kay mutaabiq zindagee guzaarta raha. ahd kee jin baaton par main nay unhen amal karnay ka hukm diya tha un par unhon nay amal na kiya. nateejay men main un par vah tamaam laanten laaya jo ahd men bayaan kee gaee hain.”

⁹rabb mazeed mujh say hamkalaam hua, “yahoodaah aur yarooshalam kay baashindon nay meray khilaaf saazish kee hai. ¹⁰un say vahee gunaah sarzad huay hain jo un kay baapdaada nay kiay thay. kyoonki yah bhee meree baaten sunnay kay liyay tayyaar naheen hain, yah bhee ajnabee maaboodon kay peechhay ho liyay hain taaki un kee khidmat karen. israaeel aur yahoodaah nay mil kar vah ahd toda hai jo main nay un kay baapdaada say baandha tha.

¹¹is liyay rabb farmaata hai ki main un par aisee aafat naazil karoonga jis say vah bach naheen sakengay. tab vah madad kay liyay mujh say faryaad karengay, lekin main un kee naheen sunoonga. ¹²phir yahoodaah aur yarooshalam kay baashinday apnay shaheron say nikal kar cheekhtay chillaatay un devtaaon say minnat karengay jin kay saamnay bakhoor jalaatay rahay hain. lekin ab jab vah museebat men mubtala hongay to yah unhen naheen bachaaengay. ¹³ai yahoodaah, teray devta teray shaheron jaisay beshumaar ho gaay hain. sharmanaak devta baal kay liyay bakhoor jalaanay kee itnee qurbaangaahen khadee kee gaee hain jitnee yarooshalam men galiyaan hotee hain. ¹⁴ai yaramiyaah, is qaum kay liyay dua mat karna! is kay liyay na minnat kar, na samaajat. kyoonki jab aafat un par aaegee aur vah chilla kar mujh say faryaad karengay to main un kee naheen sunoonga.

¹⁵meree piyaaree qaum meray ghar men kyoon haazir hotee hai? vah to apnee beshumaar saazishon say baaz hee naheen aatee. kya aanay vaalee aafat qurbaanee ka muqaddas gosht pesh karnay say ruk jaaegee? agar aisa hota to too khushee mana saktee.

¹⁶rabb nay tera naam ‘zaitoon ka phalta phoolta darakht jis ka khoobsoorat phal hai’ rakha, lekin ab vah zabardast aandhee ka shor macha kar darakht ko aag lagaaega. tab us kee tamaam daaliyaan bhasm ho jaaengee. ¹⁷ai israaeel aur yahoodaah, rabb-ul-afwaaj nay khud tumhen zameen men lagaaya. lekin ab us nay tum par aafat laanay ka faisla kiya hai. kyoon? tumhaaray ghalat kaam kee vajah say, aur is liyay ki tum nay baal devta ko bakhoor kee qurbaaniyaan pesh karkay mujhay taish dilaaya hai.”

yaramiyaah kay liyay jaan ka khatraa

¹⁸rabb nay mujhay ittila dee to mujhay maaloom hua. haan, us vaqt too hee nay mujhay un kay mansoobon say aagaah kiya. ¹⁹pahelay main us bhoolay-bhaalay bhed kay bachchay kee maanind tha jisay qasaaee kay paas laaya ja raha ho. mujhay kya pata tha ki yah meray khilaaf saazishen kar rahay hain. aapas men vah kah rahay thay, “aao, ham darakht ko phal samet khatm karen, aao ham usay zindon kay mulk men say mitaaen taaki us ka naam-o-nishaan tak yaad na rahay.”

²⁰ai rabb-ul-afwaaj, too aadil munsif hai jo logon kay sab say gaheray khayaalaat aur raaz jaanch leta hai. ab bakhsh day ki main apnee aankhon say vah intiqaam dekhoon jo too meray mukhaalifon say lega. kyoonki main nay apna muaamala teray hee sapurd kar diya hai.

²¹rabb farmaata hai, “antot kay aadmee tujhay qatl karna chaahatay hain. vah kahetay hain, ‘rabb ka naam lay kar nubuvvat mat karna, varna too hamaaray haathon maar diya jaaega’.” ²²choonki yah log aisee baaten kartay hain is liyay rabb-ul-afwaaj farmaata hai, “main unhen saza doonga! un kay javaan aadmee talvaar say aur un kay betay-betiyaan kaal say halaak ho jaaengay. ²³un men say ek bhee naheen bachega. kyoonki jis saal un kee saza naazil hogee, us vaqt main antot kay aadmiyon par sakht aafat laaoonga.”