Yarmiyaah 10

but befaaida hain

¹ai israaeel kay gharaanay, rabb ka paighaam sun! ²rabb farmaata hai, “deegar aqvaam kee butparastee mat apnaana. yah log ilm-ay-nujoom say mustaqbil jaan lenay kee koshish kartay kartay pareshaan ho jaatay hain, lekin tum un kee baaton say pareshaan na ho jaao. ³kyoonki deegar qaumon kay rasm-o-rivaaj fuzool hee hain. jangal men darakht kat jaata hai, phir kaareegar usay apnay auzaar say tashkeel deta hai. ⁴log usay apnee sona-chaandee say saja kar keelon say kaheen laga detay hain taaki hilay na. ⁵but un putlon kee maanind hain jo kheeray kay khet men khaday kiay jaatay hain taaki parindon ko bhaga den. na vah bol saktay, na chal saktay hain, is liyay log unhen utha kar apnay saath lay jaatay hain. un say mat darna, kyoonki na vah nuqsaan ka baais hain, na bhalaaee ka.”

⁶ai rabb, tujh jaisa koee naheen hai, too azeem hai, teray naam kee azmat zordaar tareeqay say zaahir huee hai. ⁷ai aqvaam kay baadshaah, kaun tera khauf naheen maanega? kyoonki too is laaiq hai. aqvaam kay tamaam daanishmandon aur un kay tamaam mamaalik men tujh jaisa koee naheen hai. ⁸sab ahemaq aur bevuqoof saabit huay hain, kyoonki un kee tarbiyat lakdee kay bekaar buton say haasil huee hai. ⁹tarsees say chaandee kee chaadren aur oofaaz say sona laaya jaata hai. un say kaareegar aur sunaar but bana detay hain jisay qirmizee aur arghvaanee rang kay kapday pahenaaay jaatay hain. sab kuchh maahir ustaadon kay haath say banaaya jaata hai.

¹⁰lekin rabb hee haqeeqee khuda hai. vahee zinda khuda aur abdee baadshaah hai. jab vah naaraaz ho jaata hai to zameen laraznay lagtee hai. aqvaam us ka qaher bardaasht naheen kar sakteen.

¹¹butparaston ko bataao ki devtaaon nay na aasmaan ko banaaya aur na zameen ko, un ka naam-o-nishaan to aasmaan-o-zameen say mit jaaega. ¹²dekho, allaah hee nay apnee qudrat say zameen ko khalaq kiya, usee nay apnee hikmat say duniya kee bunyaad rakhee, aur usee nay apnee samajh kay mutaabiq aasmaan ko khaimay kee tarah taan liya. ¹³us kay hukm par aasmaan par paanee kay zakheeray garajnay lagtay hain. vah duniya kee intiha say baadal chadhnay deta, baarish kay saath bijlee kadaknay deta aur apnay godaamon say hava nikalnay deta hai.

¹⁴tamaam insaan ahemaq aur samajh say khaalee hain. har sunaar apnay buton kay baais sharminda hua hai. us kay but dhoka hee hain, un men dam naheen. ¹⁵vah fuzool aur mazhakaakhez hain. adaalat kay vaqt vah nest ho jaaengay. ¹⁶allaah jo yaaqoob ka mauroosee hissa hai in kee maanind naheen hai. vah sab ka khaaliq hai, aur israaeelee qaum us ka mauroosee hissa hai. rabb-ul-afwaaj hee us ka naam hai.

aanay vaalee jilaavatanee

¹⁷ai muhaasaraashuda shaher, apna saamaan samet kar mulk say nikalnay kee tayyaariyaan kar lay. ¹⁸kyoonki rabb farmaata hai, “is baar main mulk kay baashindon ko baahar phaink doonga. main unhen tang karoonga taaki unhen pakda jaaay.”

¹⁹haay, mera beda gharq ho gaya hai! haay, mera zakhm bhar naheen sakta. pahelay main nay socha ki yah aisee beemaaree hai jisay mujhay bardaasht hee karna hai. ²⁰lekin ab mera khaima tabaah ho gaya hai, us kay tamaam rassay toot gaay hain. meray betay meray paas say chalay gaay hain, ek bhee naheen raha. koee naheen hai jo mera khaima dubaara lagaaay, jo us kay parday naay siray say latkaaay. ²¹kyoonki qaum kay gallaabaan ahemaq ho gaay hain, unhon nay rabb ko talaash naheen kiya. is liyay vah kaamyaab naheen rahay, aur un ka poora revad tittar-bittar ho gaya hai.

²²suno! ek khabar pahunch rahee hai, shimaalee mulk say shor-o-ghaugha sunaaee day raha hai. yahoodaah kay shaher us kee zad men a kar barbaad ho jaaengay. aainda geedad hee un men basengay.

²³ai rabb, main nay jaan liya hai ki insaan kee raah us kay apnay haath men naheen hotee. apnee marzee say na vah chalta, na qadam uthaata hai. ²⁴ai rabb, meree tambeeh kar, lekin munaasib hadd tak. taish men a kar meree tambeeh na kar, varna main bhasm ho jaaoonga. ²⁵apna ghazab un aqvaam par naazil kar jo tujhay naheen jaanteen, un ummaton par jo tera naam lay kar tujhay naheen pukaarateen. kyoonki unhon nay yaaqoob ko hadap kar liya hai. unhon nay usay mukammal taur par nigal kar us kee charaagaah ko tabaah kar diya hai.