Yarmiyaah 1
rabb ka nabee yaramiyaah
1zail men yaramiyaah bin khilaqiyaah kay paighaamaat qalamband kiay gaay hain. (binyameen kay qabaailee ilaaqay kay shaher antot men kuchh imaam rahetay thay, aur yaramiyaah ka vaalid un men say tha). 2rabb ka farmaan pahelee baar yahoodaah kay baadshaah yoosiyaah bin amoon kee hukoomat kay 13ven saal men yaramiyaah par naazil hua, 3aur yaramiyaah ko yah paighaamaat yahooyaqeem bin yoosiyaah kay daur-ay-hukoomat say lay kar sidaqiyaah bin yoosiyaah kee hukoomat kay 11ven saal kay paanchven maheene [a] julaaee ta agast. tak miltay rahay. us vaqt yarooshalam kay baashindon ko jilaavatan kar diya gaya.
yaramiyaah kee bulaahat
4ek din rabb ka kalaam mujh par naazil hua, 5“main tujhay maan kay pet men tashkeel denay say pahelay hee jaanta tha, teree paidaaish say pahelay hee main nay tujhay makhsoos-o-muqaddas karkay aqvaam kay liyay nabee muqarrar kiya.”
6main nay etiraaz kiya, “ai rabb qaadir-ay-mutlaq, afsos! main tera kalaam sunaanay ka saheeh ilm naheen rakhta, main to bachcha hee hoon.” 7lekin rabb nay mujh say farmaaya, “mat kah ‘main bachcha hee hoon.’ kyoonki jin kay paas bhee main tujhay bhejoonga un kay paas too jaaega, aur jo kuchh bhee main tujhay sunaanay ko kahoonga usay too sunaaega. 8logon say mat darna, kyoonki main teray saath hoon, main tujhay bachaaay rakhoonga.” yah rabb ka farmaan hai.
9phir rabb nay apna haath badha kar meray honton ko chhoo diya aur farmaaya, “dekh, main nay apnay alfaaz ko teray munh men daal diya hai. 10aaj main tujhay qaumon aur saltanaton par muqarrar kar deta hoon. kaheen tujhay unhen jad say ukhaad kar gira dena, kaheen barbaad karkay dha dena aur kaheen taameer karkay pauday kee tarah laga dena hai.”
baadaam kee shaakh aur ubaltee deg kee royaa
11rabb ka kalaam mujh par naazil hua, “ai yaramiyaah, tujhay kya nazar a raha hai?” main nay javaab diya, “baadaam kee ek shaakh, us darakht kee jo ‘dekhnay vaala’ kahelaata hai.” 12rabb nay farmaaya, “too nay saheeh dekha hai. is ka matlab hai ki main apnay kalaam kee dekh-bhaal kar raha hoon, main dhyaan day raha hoon ki vah poora ho jaaay.”
13phir rabb ka kalaam dubaara mujh par naazil hua, “tujhay kya nazar a raha hai?” main nay javaab diya, “shimaal men deg dikhaaee day rahee hai. jo kuchh us men hai vah ubal raha hai, aur us ka munh hamaaree taraf jhuka hua hai.” 14tab rabb nay mujh say kaha, “isee tarah shimaal say mulk kay tamaam baashindon par aafat toot padegee.” 15kyoonki rabb farmaata hai, “main shimaalee mamaalik kay tamaam gharaanon ko bula loonga, aur har ek a kar apna takht yarooshalam kay darvaazon kay saamnay hee khada karega. haan, vah us kee pooree faseel ko gher kar us par balki yahoodaah kay tamaam shaheron par chhaapa maarengay. 16yoon main apnee qaum par faislay saadir karkay un kay ghalat kaamon kee saza doonga. kyoonki unhon nay mujhay tark karkay ajnabee maaboodon kay liyay bakhoor jalaaya aur apnay haathon say banay huay buton ko sijda kiya hai.
17chunaanchay kamarbasta ho ja! uth kar unhen sab kuchh suna day jo main faramaaoonga. un say dahshat mat khaana, varna main tujhay un kay saamnay hee dahshatzada kar doonga. 18dekh, aaj main nay tujhay qil’aaband shaher, lohay kay satoon aur peetal kee chaardeevaaree jaisa mazboot bana diya hai taaki too pooray mulk ka saamna kar sakay, khwaah yahoodaah kay baadshaah, afsar, imaam ya avaam tujh par hamla kyoon na karen. 19tujh say ladnay kay baavujood vah tujh par ghaalib naheen aaengay, kyoonki main teray saath hoon, main hee tujhay bachaaay rakhoonga.” yah rabb ka farmaan hai.