Yaaqoob 5
daulatmando, khabardaar!
1daulatmando, ab meree baat sunen! khoob roen aur girya-o-zaaree karen, kyoonki aap par museebat aanay vaalee hai. 2aap kee daulat sad gaee hai aur keeday aap kay shaandaar kapday kha gaay hain. 3aap kay sonay aur chaandee ko zang lag gaya hai. aur un kee zang’aalooda haalat aap kay khilaaf gavaahee degee aur aap kay jismon ko aag kee tarah kha jaaegee. kyoonki aap nay in aakhiree dinon men apnay liyay khazaanay jama kar liyay hain. 4dekhen, jo mazdooree aap nay fasal kee kataaee karnay vaalon say baaz rakhee hai vah aap kay khilaaf chilla rahee hai. aur aap kee fasal jama karnay vaalon kee cheekhen aasmaanee lashkaron kay rabb kay kaanon tak pahunch gaee hain. 5aap nay duniya men ayyaashee aur aish-o-ishrat kee zindagee guzaaree hai. zabah kay din aap nay apnay aap ko mota-taaza kar diya hai. 6aap nay raastbaaz ko mujrim thahera kar qatl kiya hai, aur us nay aap ka muqaabla naheen kiya.
sabr aur duaa
7bhaaiyo, ab sabr say khudaavand kee aamad kay intizaar men rahen. kisaan par ghaur karen jo is intizaar men raheta hai ki zameen apnee qeemtee fasal paida karay. vah kitnay sabr say khareef aur bahaar kee baarishon ka intizaar karta hai! 8aap bhee sabr karen aur apnay dilon ko mazboot rakhen, kyoonki khudaavand kee aamad qareeb a gaee hai.
9bhaaiyo, ek doosray par mat budbudaana, varna aap kee adaalat kee jaaegee. munsif to darvaazay par khada hai. 10bhaaiyo, un nabiyon kay namoonay par chalen jinhon nay rabb kay naam men kalaam pesh karkay sabr say dukh uthaaya. 11dekhen, ham unhen mubaarak kahetay hain jo sabr say dukh bardaasht kartay thay. aap nay ayyoob kee saabitqadmee kay baaray men suna hai aur yah bhee dekh liya ki rabb nay aakhir men kya kuchh kiya, kyoonki rabb bahut meharbaan aur raheem hai.
12meray bhaaiyo, sab say badh kar yah ki aap qasam na khaaen, na aasmaan kee qasam, na zameen kee, na kisee aur cheez kee. jab aap “haan” kahena chaahatay hain to bas “haan” hee kaafee hai. aur agar inkaar karna chaahen to bas “naheen” kahena kaafee hai, varna aap mujrim thaherengay.
13kya aap men say koee museebat men phansa hua hai? vah dua karay. kya koee khush hai? vah sitaaish kay geet gaaay . 14kya aap men say koee beemaar hai? vah jamaaat kay buzurgon ko bulaaay taaki vah a kar us kay liyay dua karen aur khudaavand kay naam men us par tel malen. 15phir eemaan say kee gaee dua mareez ko bachaaegee aur khudaavand usay utha khada karega. aur agar us nay gunaah kiya ho to usay muaaf kiya jaaega. 16chunaanchay ek doosray kay saamnay apnay gunaahon ka iqraar karen aur ek doosray kay liyay dua karen taaki aap shifa paaen. raast shakhs kee muassir dua say bahut kuchh ho sakta hai. 17ilyaas ham jaisa insaan tha. lekin jab us nay zor say dua kee ki baarish na ho to saadhay teen saal tak baarish na huee. 18phir us nay dubaara dua kee to aasmaan nay baarish ata kee aur zameen nay apnee faslen paida keen.
19meray bhaaiyo, agar aap men say koee sachchaaee say bhatak jaaay aur koee usay saheeh raah par vaapas laae 20to yaqeen jaanen, jo kisee gunaahgaar ko us kee ghalat raah say vaapas laata hai vah us kee jaan ko maut say bachaaega aur gunaahon kee badee taadaad ko chhupa dega.