Yaaqoob 4

duniya say dostee

¹yah ladaaiyaan aur jhagday jo aap kay darmiyaan hain kahaan say aatay hain? kya in ka sarchashma vah buree khwaahishaat naheen jo aap kay aaza men ladtee rahetee hain? ²aap kisee cheez kee khwaahish rakhtay hain, lekin usay haasil naheen kar saktay. aap qatl aur hasad kartay hain, lekin jo kuchh aap chaahatay hain vah pa naheen saktay. aap jhagadtay aur ladtay hain. to bhee aap kay paas kuchh naheen hai, kyoonki aap allaah say maangtay naheen. ³aur jab aap maangtay hain to aap ko kuchh naheen milta. vajah yah hai ki aap ghalat neeyat say maangtay hain. aap is say apnee khudgharaz khwaahishaat pooree karna chaahatay hain. ⁴bevafa logo! kya aap ko naheen maaloom ki duniya ka dost allaah ka dushman hota hai? jo duniya ka dost banna chaahata hai vah allaah ka dushman ban jaata hai. ⁵ya kya aap samajhtay hain ki kalaam-ay-muqaddas kee yah baat betukee see hai ki allaah ghairat say us rooh ka aarzoomand hai jis ko us nay hamaaray andar sukoonat karnay diya? ⁶lekin vah hamen is say kaheen ziyaada fazl bakhshta hai. kalaam-ay-muqaddas yoon farmaata hai, “allaah maghrooron ka muqaabla karta lekin farotanon par meharbaanee karta hai.”

⁷gharaz, allaah kay taabay ho jaaen. iblees ka muqaabla karen to vah bhaag jaaega. ⁸allaah kay qareeb a jaaen to vah aap kay qareeb aaega. gunaahagaaro, apnay haathon ko paak-saaf karen. dodilo, apnay dilon ko makhsoos-o-muqaddas karen. ⁹afsos karen, maatam karen, khoob roen. aap kee hansee maatam men badal jaaay aur aap kee khushee maayoosee men. ¹⁰apnay aap ko khudaavand kay saamnay neecha karen to vah aap ko sarfaraaz karega.

ek doosray ka munsif mat bannaa

¹¹bhaaiyo, ek doosray par tuhamat mat lagaana. jo apnay bhaaee par tuhamat lagaata ya usay mujrim tharraata hai vah shareeat par tuhamat lagaata hai aur shareeat ko mujrim thaheraata hai. aur jab aap shareeat par tuhamat lagaatay hain to aap us kay pairokaar naheen rahetay balki us kay munsif ban gaay hain. ¹²shareeat denay vaala aur munsif sirf ek hee hai aur vah hai allaah jo najaat denay aur halaak karnay kay qaabil hai. to phir aap kaun hain jo apnay aap ko munsif samajh kar apnay padosee ko mujrim thahera rahay hain!

shekhee mat maarnaa

¹³aur ab meree baat sunen, aap jo kahetay hain, “aaj ya kal ham fulaan fulaan shaher men jaaengay. vahaan ham ek saal thaher kar kaarobaar karkay paisay kamaaengay.” ¹⁴dekhen, aap yah bhee naheen jaantay ki kal kya hoga. aap kee zindagee cheez hee kiya hai! aap bhaap hee hain jo thodee der kay liyay nazar aatee, phir ghaaib ho jaatee hai. ¹⁵balki aap ko yah kahena chaahiay, “agar khudaavand kee marzee huee to ham jiengay aur yah ya vah karengay.” ¹⁶lekin filahaal aap shekhee maar kar apnay gharoor ka izhaar kartay hain. is qism kee tamaam shekheebaazee buree hai.

¹⁷chunaanchay jo jaanta hai ki usay kya kya nek kaam karna hai, lekin phir bhee kuchh naheen karta vah gunaah karta hai.