Yaaqoob 3

zabaan

¹meray bhaaiyo, aap men say ziyaada ustaad na banen. aap ko maaloom hai ki ham ustaadon kee ziyaada sakhtee say adaalat kee jaaegee. ²ham sab say to kaee tarah kee ghaltiyaan sarzad hotee hain. lekin jis shakhs say bolnay men kabhee ghaltee naheen hotee vah kaamil hai aur apnay pooray badan ko qaaboo men rakhnay kay qaabil hai. ³ham ghoday kay munh men lagaam ka dahaana rakh detay hain taaki vah hamaaray hukm par chalay, aur is tarah ham apnee marzee say us ka poora jism chala letay hain. ⁴ya baadbaanee jahaaz ko misaal len. jitna bhee bada vah ho aur jitnee bhee tez hava chaltee ho naakhuda ek chhotee see patvaar kay zareeay us ka rukh theek rakhta hai. yoon hee vah usay apnee marzee say chala leta hai. ⁵isee tarah zabaan ek chhota sa uzv hai, lekin vah badee badee baaten kartee hai.

dekhen, ek baday jangal ko bhasm karnay kay liyay ek hee chingaaree kaafee hotee hai. ⁶zabaan bhee aag kee maanind hai. badan kay deegar aaza kay darmiyaan rah kar us men naaraastee kee pooree duniya paaee jaatee hai. vah pooray badan ko aalooda kar detee hai, haan insaan kee pooree zindagee ko aag laga detee hai, kyoonki vah khud jahennum kee aag say sulgaaee gaee hai. ⁷dekhen, insaan har qism kay jaanvaron par qaaboo pa leta hai aur us nay aisa kiya bhee hai, khwaah janglee jaanvar hon ya parinday, rengnay vaalay hon ya samundaree jaanvar. ⁸lekin zabaan par koee qaaboo naheen pa sakta, is betaab aur shareer cheez par jo muhalak zaher say labaalab bharee hai. ⁹zabaan say ham apnay khudaavand aur baap kee sitaaish bhee kartay hain aur doosron par laanat bhee bhejtay hain, jinhen allaah kee soorat par banaaya gaya hai. ¹⁰ek hee munh say sitaaish aur laanat nikaltee hai. meray bhaaiyo, aisa naheen hona chaahiay. ¹¹yah kaisay ho sakta hai ki ek hee chashmay say meetha aur kadva paanee phoot niklay. ¹²meray bhaaiyo, kya anjeer kay darakht par zaitoon lag saktay hain ya angoor kee bel par anjeer? hargiz naheen! isee tarah namkeen chashmay say meetha paanee naheen nikal sakta.

aasmaan say hikmat

¹³kya aap men say koee daana aur samajhdaar hai? vah yah baat apnay achchhay chaal-chalan say zaahir karay, hikmat say paida honay vaalee haleemee kay nek kaamon say. ¹⁴lekin khabardaar! agar aap dil men hasad kee kadavaahat aur khudgharzee paal rahay hain to is par shekhee mat maarna, na sachchaaee kay khilaaf jhoot bolen. ¹⁵aisa fakhar aasmaan kee taraf say naheen hai, balki duniyaavee, ghairruhaanee aur iblees say hai. ¹⁶kyoonki jahaan hasad aur khudgharzee hai vahaan fasaad aur har shareer kaam paaya jaata hai. ¹⁷aasmaan kee hikmat farq hai. avval to vah paak aur muqaddas hai. neez vah amnapasand, narmdil, faramaambardaar, rahem aur achchhay phal say bharee huee, ghairjaanibdaar aur khuloosdil hai. ¹⁸aur jo sulah karaatay hain un kay liyay raastbaazee ka phal salaamatee say boya jaata hai.