Yaaqoob 2

taassub say khabardaar

¹meray bhaaiyo, laazim hai ki aap jo hamaaray jalaalee khudaavand eesa maseeh par eemaan rakhtay hain jaanibdaaree na dikhaaen. ²farz karen ki ek aadmee sonay kee angoothee aur shaandaar kapday pahenay huay aap kee jamaaat men a jaaay aur saath saath ek ghareeb aadmee bhee mailay-kuchailay kapday pahenay huay andar aaay. ³aur aap shaandaar kapday pahenay huay aadmee par khaas dhyaan day kar us say kahen, “yahaan is achchhee kursee par tashreef rakhen,” lekin ghareeb aadmee ko kahen, “vahaan khada ho ja” ya “a, meray paaon kay paas farsh par baith ja.” ⁴kya aap aisa karnay say mujrimaana khayaalaat vaalay munsif naheen saabit huay? kyoonki aap nay logon men naarva farq kiya hai.

⁵meray azeez bhaaiyo, sunen! kya allaah nay unhen naheen chuna jo duniya kee nazar men ghareeb hain taaki vah eemaan men daulatmand ho jaaen? yahee log vah baadshaahee meeraas men paaengay jis ka vaada allaah nay un say kiya hai jo usay piyaar kartay hain. ⁶lekin aap nay zarooratmandon kee beizzatee kee hai. zara soch len, vah kaun hain jo aap ko dabaatay aur adaalat men ghaseet kar lay jaatay hain? kya yah daulatmand hee naheen hain? ⁷vahee to eesa par kufr baktay hain, us azeem naam par jis kay pairokaar aap ban gaay hain.

⁸allaah chaahata hai ki aap kalaam-ay-muqaddas men mazkoor shaahee shareeat pooree karen, “apnay padosee say vaisee muhabbat rakhna jaisee too apnay aap say rakhta hai.” ⁹chunaanchay jab aap jaanibdaaree dikhaatay hain to gunaah kartay hain aur shareeat aap ko mujrim thaheraatee hai. ¹⁰mat bhoolna ki jis nay shareeat ka sirf ek hukm toda hai vah pooree shareeat ka qusoorvaar thaherta hai. ¹¹kyoonki jis nay farmaaya, “zina na karna” us nay yah bhee kaha, “qatl na karna.” ho sakta hai ki aap nay zina to na kiya ho, lekin kisee ko qatl kiya ho. to bhee aap us ek jurm kee vajah say pooree shareeat todnay kay mujrim ban gaay hain. ¹²chunaanchay jo kuchh bhee aap kahetay aur kartay hain yaad rakhen ki aazaad karnay vaalee shareeat aap kee adaalat karegee. ¹³kyoonki allaah adaalat kartay vaqt us par rahem naheen karega jis nay khud rahem naheen dikhaaya. lekin rahem adaalat par ghaalib a jaata hai. jab aap rahem karengay to allaah aap par rahem karega.

eemaan nek kaamon kay baghair murda hai

¹⁴meray bhaaiyo, agar koee eemaan rakhnay ka daava karay, lekin us kay mutaabiq zindagee na guzaaray to us ka kya faaida hai? kya aisa eemaan usay najaat dila sakta hai? ¹⁵farz karen ki koee bhaaee ya bahen kapdon aur rozmarra rotee kee zarooratmand ho. ¹⁶yah dekh kar aap men say koee us say kahay, “achchha jee, khuda haafiz. garm kapday paheno aur jee bhar kar khaana khaao.” lekin vah khud yah zarooriyaat pooree karnay men madad na karay. kya is ka koee faaida hai? ¹⁷gharaz, mahez eemaan kaafee naheen. agar vah nek kaamon say amal men na laaya jaaay to vah murda hai.

¹⁸ho sakta hai koee etiraaz karay, “ek shakhs kay paas to eemaan hota hai, doosray kay paas nek kaam.” aaen, mujhay dikhaaen ki aap nek kaamon kay baghair kis tarah eemaan rakh saktay hain. yah to naamumkin hai. lekin main zaroor aap ko apnay nek kaamon say dikha sakta hoon ki main eemaan rakhta hoon. ¹⁹achchha, aap kahetay hain, “ham eemaan rakhtay hain ki ek hee khuda hai.” shaabaash, yah bilkul saheeh hai. shayaateen bhee yah eemaan rakhtay hain, go vah yah jaan kar khauf kay maaray thartharaatay hain. ²⁰hosh men aaen! kya aap naheen samajhtay ki nek aamaal kay baghair eemaan bekaar hai? ²¹hamaaray baap ibraaheem par ghaur karen. vah to isee vajah say raastbaaz thaheraaya gaya ki us nay apnay betay ishaaq ko qurbaangaah par pesh kiya. ²²aap khud dekh saktay hain ki us ka eemaan aur nek kaam mil kar amal kar rahay thay. us ka eemaan to us say mukammal hua jo kuchh us nay kiyaa ²³aur is tarah hee kalaam-ay-muqaddas kee yah baat pooree huee, “ibraaheem nay allaah par bharosa rakha. is bina par allaah nay usay raastbaaz qaraar diya.” isee vajah say vah “allaah ka dost” kahelaaya. ²⁴yoon aap khud dekh saktay hain ki insaan apnay nek aamaal kee bina par raastbaaz qaraar diya jaata hai, na ki sirf eemaan rakhnay kee vajah say.

²⁵raahab faahisha kee misaal bhee len. usay bhee apnay kaamon kee bina par raastbaaz qaraar diya gaya jab us nay israaeelee jaasooson kee mehamaan-navaazee kee aur unhen shaher say nikalnay ka doosra raasta dikha kar bachaaya.

²⁶gharaz, jis tarah badan rooh kay baghair murda hai usee tarah eemaan bhee nek aamaal kay baghair murda hai.