Yaaqoob 1

¹yah khat allaah aur khudaavand eesa maseeh kay khaadim yaaqoob kee taraf say hai.

ghairyahoodee qaumon men bikhray huay baarah israaeelee qabeelon ko salaam.

eemaan aur hikmat

²meray bhaaiyo, jab aap ko tarah tarah kee aazmaaishon ka saamna karna paday to apnay aap ko khushqismat samjhen, ³kyoonki aap jaantay hain ki aap kay eemaan kay aazmaaay jaanay say saabitqadmee paida hotee hai. ⁴chunaanchay saabitqadmee ko badhnay den, kyoonki jab vah takmeel tak pahunchegee to aap baaligh aur kaamil ban jaaengay, aur aap men koee bhee kamee naheen paaee jaaegee. ⁵lekin agar aap men say kisee men hikmat kee kamee ho to allaah say maangay jo sab ko fayyaazee say aur baghair jhidkee diay deta hai. vah zaroor aap ko hikmat dega. ⁶lekin apnee guzaarish eemaan kay saath pesh karen aur shak na karen, kyoonki shak karnay vaala samundar kee mauj kee maanind hota hai jo hava say idhar udhar uchhaltee bahetee jaatee hai. ⁷aisa shakhs na samjhay ki mujhay khudaavand say kuchh milega, ⁸kyoonki vah dodila aur apnay har kaam men ghairmustaqilamizaaj hai.

ghurbat aur daulat

⁹pastahaal bhaaee maseeh men apnay oonchay martbay par fakhar kare ¹⁰jabki daulatmand shakhs apnay adna martbay par fakhar karay, kyoonki vah janglee phool kee tarah jald hee jaata rahega. ¹¹jab sooraj tuloo hota hai to us kee jhulsa denay vaalee dhoop men pauda murjha jaata, us ka phool gir jaata aur us kee tamaam khoobsoortee khatm ho jaatee hai. us tarah daulatmand shakhs bhee kaam kartay kartay murjha jaaega.

aazmaaish

¹²mubaarak hai vah jo aazmaaish kay vaqt saabitqadam raheta hai, kyoonki qaaim rahenay par usay zindagee ka vah taaj milega jis ka vaada allaah nay un say kiya hai jo us say muhabbat rakhtay hain. ¹³aazmaaish kay vaqt koee na kahay ki allaah mujhay aazmaaish men phansa raha hai. na to allaah ko buraaee say aazmaaish men phansaaya ja sakta hai, na vah kisee ko phansaata hai. ¹⁴balki har ek kee apnee buree khwaahishaat usay khainch kar aur uksa kar aazmaaish men phansa detee hain. ¹⁵phir yah khwaahishaat haamila ho kar gunaah ko janm detee hain aur gunaah baaligh ho kar maut ko janm deta hai.

¹⁶meray azeez bhaaiyo, fareb mat khaana! ¹⁷har achchhee nemat aur har achchha tuhfa aasmaan say naazil hota hai, nooron kay baap say, jis men na kabhee tabdeelee aatee hai, na badaltay huay saaiyon kee see haalat paaee jaatee hai. ¹⁸usee nay apnee marzee say hamen sachchaaee kay kalaam kay vaseelay say paida kiya. yoon ham ek tarah say us kee tamaam makhlooqaat ka pahela phal hain.

sunna kaafee naheen hai

¹⁹meray azeez bhaaiyo, is ka khayaal rakhna, har shakhs sunnay men tez ho, lekin bolnay aur ghussa karnay men dheema. ²⁰kyoonki insaan ka ghussa vah raastbaazee paida naheen karta jo allaah chaahata hai. ²¹chunaanchay apnee zindagee kee gandee aadaten aur shareer chaal-chalan door karkay haleemee say kalaam-ay-muqaddas ka vah beej qabool karen jo aap kay andar boya gaya hai, kyoonki yahee aap ko najaat day sakta hai.

²²kalaam-ay-muqaddas ko na sirf sunen balki us par amal bhee karen, varna aap apnay aap ko fareb dengay. ²³jo kalaam ko sun kar us par amal naheen karta vah us aadmee kee maanind hai jo aaeenay men apnay chiharay par nazar daalta hai. ²⁴apnay aap ko dekh kar vah chala jaata hai aur fauran bhool jaata hai ki main nay kiya kuchh dekha. ²⁵us kee nisbat vah mubaarak hai jo aazaad karnay vaalee kaamil shareeat men ghaur say nazar daal kar us men qaaim raheta hai aur usay sunnay kay baad naheen bhoolta balki us par amal karta hai.

²⁶kya aap apnay aap ko deendaar samajhtay hain? agar aap apnee zabaan par qaaboo naheen rakh saktay to aap apnay aap ko fareb detay hain. phir aap kee deendaaree ka izhaar bekaar hai. ²⁷khuda baap kee nazar men deendaaree ka paak aur bedaagh izhaar yah hai, yateemon aur bevaaon kee dekh-bhaal karna jab vah museebat men hon aur apnay aap ko duniya kee aaloodgee say bachaaay rakhna.