Yashaayaah 9

aanay vaalay maseeh kee raushnee

¹lekin museebatzada taareekee men naheen rahengay. go pahelay zabooloon ka ilaaqa aur naftaalee ka ilaaqa past hua hai, lekin aainda jheel kay saath ka raasta, darya-ay-yardan kay paar, ghairyahoodiyon ka galeel sarfaraaz hoga.

²andheray men chalnay vaalee qaum nay ek tez raushnee dekhee, maut kay saay men doobay huay mulk kay baashindon par raushnee chamkee. ³too nay qaum ko badha kar usay badee khushee dilaaee hai. teray huzoor vah yoon khushee manaatay hain jis tarah fasal kaattay aur loot ka maal baanttay vaqt manaaee jaatee hai. ⁴too nay apnee qaum ko us din kee tarah chhutkaara diya jab too nay midiyaan ko shikast dee thee. usay dabaanay vaala jooa toot gaya, aur us par zulm karnay vaalay kee laathee tukday tukday ho gaee hai. ⁵zameen par zor say maaray gaay faujee jootay aur khoon men latpat faujee vardiyaan sab havaala-ay-aatish ho kar bhasm ho jaaengee.

⁶kyoonki hamaaray haan bachcha paida hua, hamen beta bakhsha gaya hai. us kay kandhon par hukoomat ka ikhtiyaar thahera rahega. vah anokha musheer, qavee khuda, abdee baap aur sulah-salaamatee ka shahzaada kahelaaega. ⁷us kee hukoomat zor pakadtee jaaegee, aur amn-o-amaan kee intiha naheen hogee. vah daaood kay takht par baith kar us kee saltanat par hukoomat karega, vah usay adal-o-insaaf say mazboot karkay ab say abad tak qaaim rakhega. rabb-ul-afwaaj kee ghairat hee isay anjaam degee.

rabb ka ghazab naazil hogaa

⁸rabb nay yaaqoob kay khilaaf paighaam bheja, aur vah israaeel par naazil ho gaya hai. ⁹israaeel aur saamriya kay tamaam baashinday isay jald hee jaan jaaengay, haalaanki vah is vaqt badee shekhee maar kar kahetay hain, ¹⁰“beshak hamaaree eenton kee deevaaren gir gaee hain, lekin ham unhen taraashay huay pattharon say dubaara taameer kar lengay. beshak hamaaray anjeer-toot kay darakht kat gaay hain, lekin koee baat naheen, ham un kee jagah deodaar kay darakht laga lengay.” ¹¹lekin rabb israaeel kay dushman razeen ko taqviyat day kar us kay khilaaf bhejega balki israaeel kay tamaam dushmanon ko us par hamla karnay kay liyay ubhaarega. ¹²shaam kay faujee mashriq say aur filistee maghrib say munh phaad kar israaeel ko hadap kar lengay. taaham rabb ka ghazab thanda naheen hoga balki us ka haath maarnay kay liyay utha hee rahega.

¹³kyoonki is kay baavujood bhee log saza denay vaalay kay paas vaapas naheen aaengay aur rabb-ul-afwaaj kay taalib naheen hongay. ¹⁴nateejay men rabb ek hee din men israaeel ka na sirf sar balki us kee dum bhee kaatega, na sirf khajoor kee shaandaar shaakh balki maamoolee sa sarkanda bhee todega. ¹⁵buzurg aur asar-o-rasookh vaalay israaeel ka sar hain jabki jhootee taaleem denay vaalay nabee us kee dum hain. ¹⁶kyoonki qaum kay raahanuma logon ko ghalat raah par lay gaay hain, aur jin kee raahanumaaee vah kar rahay hain un kay dimaagh men futoor a gaya hai. ¹⁷is liyay rabb na qaum kay javaanon say khush hoga, na yateemon aur bevaaon par rahem karega. kyoonki sab kay sab bedeen aur shareer hain, har munh kufr bakta hai. taaham rabb ka ghazab thanda naheen hoga balki us ka haath maarnay kay liyay utha hee rahega.

¹⁸kyoonki un kee bedeenee kee bhadaktee huee aag kaantedaar jhaadiyaan aur oontkataaray bhasm kar detee hai, balki gunjaan jangal bhee us kee zad men a kar dhuen kay kaalay baadal chhodta hai. ¹⁹rabb-ul-afwaaj kay ghazab say mulk jhulas jaaega aur us kay baashinday aag ka luqma ban jaaengay. yahaan tak ki koee bhee apnay bhaaee par taras naheen khaaega. ²⁰aur go har ek daaeen taraf mud kar sab kuchh hadap kar jaaay to bhee bhooka rahega, go baaeen taraf rukh karkay sab kuchh nigal jaaay to bhee ser naheen hoga. har ek apnay padosee ko khaaega, ²¹manassee ifraaeem ko aur ifraaeem manassee ko. aur donon mil kar yahoodaah par hamla karengay. taaham rabb ka ghazab thanda naheen hoga balki us ka haath maarnay kay liyay utha hee rahega.