Yashaayaah 8
jald hee loot-khasoot
1rabb mujh say hamkalaam hua, “ek bada takhta lay kar us par saaf alfaaz men likh day, ‘jald hee loot-khasoot, sur’at say ghaaratagaree’.” 2main nay ooriyaah imaam aur zakariyaah bin yabarakiyaah kee maujoodgee men aisa hee likh diya, kyoonki donon motbar gavaah thay.
3us vaqt jab main apnee beevee nabiya kay paas gaya to vah ummeed say huee. beta paida hua, aur rabb nay mujhay hukm diya, “is ka naam ‘jald hee loot-khasoot, sur’at say ghaaratagaree’ rakh. 4kyoonki is say pahelay ki ladka ‘abboo’ ya ‘ammee’ kah sakay damishq kee daulat aur saamriya ka maal-o-asbaab chheen liya gaya hoga, asoor kay baadshaah nay sab kuchh loot liya hoga.”
shilokh ka paanee radd karnay ka bura anjaam
5ek baar phir rabb mujh say hamkalaam hua, 6“yah log yarooshalam men aaraam say bahenay vaalay shilokh naalay ka paanee mustarad karkay razeen aur fiqah bin ramaliyaah say khush hain. 7is liyay rabb un par darya-ay-furaat ka zabardast sailaab laaega, asoor ka baadshaah apnee tamaam shaan-o-shaukat kay saath un par toot padega. us kee tamaam daryaaee shaakhen apnay kinaaron say nikal kar 8sailaab kee soorat men yahoodaah par say guzarengee. ai immaanooel, paanee parinday kee tarah apnay paron ko phaila kar teray pooray mulk ko dhaamp lega, aur log galay tak us men doob jaaengay.”
9ai qaumo, beshak jang kay naaray lagaao. tum phir bhee chikna-choor ho jaaogee. ai doordaraaz mamaalik kay tamaam baashindo, dhyaan do! beshak jang kay liyay tayyaariyaan karo. tum phir bhee paash paash ho jaaogay. kyoonki jang kay liyay tayyaariyaan karnay kay baavujood bhee tumhen kuchla jaaega. 10jo bhee mansooba tum baandho, baat naheen banegee. aapas men jo bhee faisla karo, tum naakaam ho jaaogay, kyoonki allaah hamaaray saath hai [a] ibraanee men immaanooel likha hai, dekhiay 7:14 ka futnot. .
rabb nabee ko qaum kay baaray men aagaah karta hai
11jis vaqt rabb nay mujhay mazbootee say pakad liya us vaqt us nay mujhay is qaum kee raahon par chalnay say khabardaar kiya. us nay farmaaya, 12“har baat ko saazish mat samajhna jo yah qaum saazish samajhtee hai. jis say yah log dartay hain us say na darna, na dahshat khaanaa 13balki rabb-ul-afwaaj say daro. usee say dahshat khaao aur usee ko quddoos maano. 14tab vah israaeel aur yahoodaah ka maqdis hoga, ek aisa patthar jo thokar ka baais banega, ek chataan jo thes lagnay ka sabab hogee. yarooshalam kay baashinday us kay phanday aur jaal men ulajh jaaengay. 15un men say bahut saaray thokar khaaengay. vah gir kar paash paash ho jaaengay aur phanday men phans kar pakday jaaengay.”
rabb ka kalaam shaagirdon kay havaalay karna hai
16mujhay mukaashfay ko liphaaphay men daal kar mahfooz rakhna hai, apnay shaagirdon kay darmiyaan hee allaah kee hidaayat par muhar lagaanee hai. 17main khud rabb kay intizaar men rahoonga jis nay apnay chiharay ko yaaqoob kay gharaanay say chhupa liya hai. usee say main ummeed rakhoonga.
18ab main haazir hoon, main aur vah bachchay jo allaah nay mujhay diay hain, ham israaeel men ilaahee aur mojizaana nishaan hain jin say rabb-ul-afwaaj jo koh-ay-siyyoon par sukoonat karta hai logon ko aagaah kar raha hai.
19log tumhen mashvra detay hain, “jaao, murdon say raabita karnay vaalon aur qismat ka haal bataanay vaalon say pata karo, un say jo baareek aavaazen nikaaltay aur budabudaatay huay javaab detay hain.” lekin un say kaho, “kya munaasib naheen ki qaum apnay khuda say mashvra karay? ham zindon kee khaatir mardon say baat kyoon karen?”
20allaah kee hidaayat aur mukaashfa kee taraf rujoo karo! jo inkaar karay us par subah kee raushnee kabhee naheen chamkegee. 21aisay log maayoos aur faaqaakash haalat men mulk men maaray maaray phirengay. aur jab bhookon marnay ko hongay to jhunjhla kar apnay baadshaah aur apnay khuda par laanat karengay. vah oopar aasmaan 22aur neechay zameen kee taraf dekhengay, lekin jahaan bhee nazar paday vahaan museebat, andhera aur haulnaak taareekee hee dikhaaee degee. unhen taareekee hee taareekee men daal diya jaaega.