Yashaayaah 7
allaah aakhaz ko tasallee deta hai
1jab aakhaz bin yootaam bin uzziyaah, yahoodaah ka baadshaah tha to shaam ka baadshaah razeen aur israaeel ka baadshaah fiqah bin ramaliyaah yarooshalam kay saath ladnay kay liyay niklay. lekin vah shaher par qabza karnay men naakaam rahay. 2jab daaood kay shaahee gharaanay ko ittila milee ki shaam kee fauj nay ifraaeem kay ilaaqay men apnee lashkargaah lagaaee hai to aakhaz baadshaah aur us kee qaum laraz uthay. un kay dil aandhee kay jhonkon say hilnay vaalay darakhton kee tarah thartharaanay lagay.
3tab rabb yasaayaah say hamkalaam hua, “apnay betay shayaar-yaashoob [a] shayaar-yaashoob say muraad hai ek bacha khacha hissa vaapas aaega. ko apnay saath lay kar aakhaz baadshaah say milnay kay liyay nikal ja. vah us naalay kay siray kay paas ruka hua hai jo paanee ko oopar vaalay taalaab tak pahunchaata hai (yah taalaab us raastay par hai jo dhobiyon kay ghaat tak lay jaata hai). 4usay bata ki muhtaat rah kar sukoon ka daaman mat chhod. mat dar. tera dil razeen, shaam aur bin ramaliyaah ka taish dekh kar himmat na haaray. yah bas jalee huee lakdee kay do bachay huay tukday hain jo ab tak kuchh dhuaan chhod rahay hain. 5beshak shaam aur israaeel kay baadshaahon nay teray khilaaf buray mansoobay baandhay hain, aur vah kahetay hain, 6‘aao ham yahoodaah par hamla karen. ham vahaan dahshat phaila kar us par fatah paaen aur phir taabiel kay betay ko us ka baadshaah banaaen.’ 7lekin rabb qaadir-ay-mutlaq farmaata hai ki un ka mansooba naakaam ho jaaega. baat naheen banegee! 8kyoonki shaam ka sar damishq aur damishq ka sar mahez razeen hai. jahaan tak mulk-ay-israaeel ka taalluq hai, 65 saal kay andar andar vah chikna-choor ho jaaega, aur qaum nest-o-naabood ho jaaegee. 9israaeel ka sar saamriya aur saamriya ka sar mahez ramaliyaah ka beta hai.
agar eemaan men qaaim na raho, to khud qaaim naheen rahogay.”
rabb aakhaz ko nishaan deta hai
10rabb aakhaz baadshaah say ek baar phir hamkalaam hua, 11“is kee tasdeeq kay liyay rabb apnay khuda say koee ilaahee nishaan maang lay, khwaah aasmaan par ho ya paataal men.”
12lekin aakhaz nay inkaar kiya, “naheen, main nishaan maang kar rabb ko naheen aazmaaoonga.”
13tab yasaayaah nay kaha, “phir meree baat suno, ai daaood kay khaandaan! kya yah kaafee naheen ki tum insaan ko thaka do? kya laazim hai ki allaah ko bhee thakaanay par musir raho? 14chalo, phir rabb apnee hee taraf say tumhen nishaan dega. nishaan yah hoga ki kunvaaree ummeed say ho jaaegee. jab beta paida hoga to us ka naam immaanooel [b] immaanooel say muraad hai allaah hamaaray saath hai. rakhegee. 15jis vaqt bachcha itna bada hoga ki ghalat kaam radd karnay aur achchha kaam chunnay ka ilm rakhega us vaqt say baalaaee aur shahed khaaega. 16kyoonki is say pahelay ki ladka ghalat kaam radd karnay aur achchha kaam chunnay ka ilm rakhay vah mulk veeraan-o-sunsaan ho jaaega jis kay donon baadshaahon say too dahshat khaata hai.
yahoodaah bhee tabaah ho jaaegaa
17rabb tujhay bhee teray aabaaee khaandaan aur qaum samet badee museebat men daalega. kyoonki vah asoor kay baadshaah ko tumhaaray khilaaf bhejega. us vaqt tumhen aisay mushkil dinon ka saamna karna padega ki israaeel kay yahoodaah say alag ho jaanay say lay kar aaj tak naheen guzray.”
18us din rabb seetee baja kar dushman ko bulaaega. kuchh makkhiyon kay ghol kee tarah darya-ay-neel kee doordaraaz shaakhon say aaengay, aur kuchh shahed kee makkhiyon kee tarah asoor say ravaana ho kar mulk par dhaava bol dengay. 19har jagah vah tik jaaengay, gaheree ghaatiyon aur chataanon kee daraadon men, tamaam kaantedaar jhaadiyon men aur har johad kay paas. 20us din qaadir-ay-mutlaq darya-ay-furaat kay parlee taraf ek ustara kiraaay par lay kar tum par chalaaega. yaanee asoor kay baadshaah kay zareeay vah tumhaaray sar aur taangon ko mundavaaega. haan, vah tumhaaree daadhee-moonchh ka bhee safaaya karega.
21us din jo aadmee ek javaan gaay aur do bhed-bakriyaan rakh sakay vah khushqismat hoga. 22to bhee vah itna doodh dengee ki vah baalaaee khaata rahega. haan, jo bhee mulk men baaqee rah gaya hoga vah baalaaee aur shahed khaaega.
23us din jahaan jahaan haal men angoor kay hazaar pauday chaandee kay hazaar sikkon kay liyay biktay hain vahaan kaantedaar jhaadiyaan aur oontkataaray hee ugengay. 24poora mulk kaantedaar jhaadiyon aur oontakataaron kay sabab say itna janglee hoga ki log teer aur kamaan lay kar us men shikaar khelnay kay liyay jaaengay. 25jin bulandiyon par is vaqt kheteebaadee kee jaatee hai vahaan log kaantedaar paudon aur oontakataaron kee vajah say ja naheen sakengay. gaay-bail un par charengay, aur bhed-bakriyaan sab kuchh paaon talay raundengee.