Yashaayaah 66
do maalikon kee khidmat karna naamumkin hai
1rabb farmaata hai, “aasmaan mera takht hai aur zameen meray paaon kee chaukee, to phir vah ghar kahaan hai jo tum meray liyay banaaogay? vah jagah kahaan hai jahaan main aaraam karoonga?” 2rabb farmaata hai, “meray haath nay yah sab kuchh banaaya, tab hee yah sab kuchh vujood men aaya. aur main usee ka khayaal rakhta hoon jo museebatzada aur shikastaadil hai, jo meray kalaam kay saamnay kaampta hai.
3lekin bail ko zabah karnay vaala qaatil kay baraabar aur lelay ko qurbaan karnay vaala kuttay kee gardan todnay vaalay kay baraabar hai. ghalla kee nazar pesh karnay vaala sooar ka khoon chadhaanay vaalay say behatar naheen, aur bakhoor jalaanay vaala butparast kee maanind hai. in logon nay apnee ghalat raahon ko ikhtiyaar kiya hai, aur in kee jaan apnee ghinaunee cheezon say lutf’andoz hotee hai. 4javaab men main bhee un say badasulookee kee raah ikhtiyaar karoonga, main un par vah kuchh naazil karoonga jis say vah dahshat khaatay hain. kyoonki jab main nay unhen aavaaz dee to kisee nay javaab na diya, jab main bola to unhon nay na suna balki vahee kuchh kartay rahay jo mujhay bura laga, vahee karnay par tulay rahay jo mujhay naapsand hai.”
yarooshalam kay saath khushee manaao
5ai rabb kay kalaam kay saamnay laraznay vaalo, us ka farmaan suno! “tumhaaray apnay bhaaee tum say nafrat kartay aur meray naam kay baais tumhen radd kartay hain. vah mazaaq uda kar kahetay hain, ‘rabb apnay jalaal ka izhaar karay taaki ham tumhaaree khushee ka mushaahada kar saken.’ lekin vah sharminda ho jaaengay.
6suno! shaher men shor-o-ghaugha ho raha hai. suno! rabb kay ghar say halchal kee aavaaz sunaaee day rahee hai. suno! rabb apnay dushmanon ko un kee munaasib saza day raha hai.
7dard-ay-zah men mubtala honay say pahelay hee yarooshalam nay bachcha janm diya, zachchgee kee eeza say pahelay hee us kay beta paida hua. 8kis nay kabhee aisee baat sunee hai? kis nay kabhee is qism ka muaamala dekha hai? kya koee mulk ek hee din kay andar andar paida ho sakta hai? kya koee qaum ek hee lamhay men janm lay saktee hai? lekin siyyoon kay saath aisa hee hua hai. dard-ay-zah abhee shuroo hee hona tha ki us kay bachchay paida huay.” 9rabb farmaata hai, “kya main bachchay ko yahaan tak laaoon ki vah maan kay pet say nikalnay vaala ho aur phir usay janm lenay na doon? hargiz naheen!” tera khuda farmaata hai, “kya main jo bachchay ko paida honay deta hoon bachchay ko rok doon? kabhee naheen!”
10“ai yarooshalam ko piyaar karnay vaalo, sab us kay saath khushee manaao! ai shaher par maatam karnay vaalo, sab us kay saath shaadiyaana bajaao! 11kyoonki ab tum us kee tasallee dilaanay vaalee chhaatee say jee bhar kar doodh piyogay, tum us kay shaandaar doodh kee kasrat say lutf’andoz hogay.” 12kyoonki rabb farmaata hai, “main yarooshalam men salaamatee ka darya bahenay doonga aur us par aqvaam kee shaan-o-shaukat ka sailaab aanay doonga. tab vah tumhen apna doodh pila kar uthaaay phiregee, tumhen god men bitha kar piyaar karegee. 13main tumhen maan kee see tasallee doonga, aur tum yarooshalam ko dekh kar tasallee paaogay. 14in baaton ka mushaahada karkay tumhaara dil khush hoga aur tum taaza hariyaalee kee tarah phalo phoologay.”
us vaqt zaahir ho jaaega ki rabb ka haath us kay khaadimon kay saath hai jabki us kay dushman us kay ghazab ka nishaana banengay. 15rabb aag kee soorat men a raha hai, aandhee jaisay rathon kay saath naazil ho raha hai taaki dahektay koilon say apna ghussa thanda karay aur sholaaafshaan aag say malaamat karay. 16kyoonki rabb aag aur apnee talvaar kay zareeay tamaam insaanon kee adaalat karkay apnay haath say mut’addid logon ko halaak karega.
17rabb farmaata hai, “jo apnay aap ko buton kay baaghon kay liyay makhsoos aur paak-saaf kartay hain aur darmiyaan kay raahanuma kee pairvee karkay sooar, choohay aur deegar ghinaunee cheezen khaatay hain vah mil kar halaak ho jaaengay.
deegar aqvaam bhee rabb kee parastish karengee
18chunaanchay main jo un kay aamaal aur khayaalaat say vaaqif hoon tamaam aqvaam aur alag alag zabaanen bolnay vaalon ko jama karnay kay liyay naazil ho raha hoon. tab vah a kar meray jalaal ka mushaahada karengay. 19main un kay darmiyaan ilaahee nishaan qaaim karkay bachay huon men say kuchh deegar aqvaam kay paas bhej doonga. vah tarsees, libiya, teer chalaanay kee maahir qaum ludiya, toobal, yoonaan aur un doordaraaz jazeeron kay paas jaaengay jinhon nay na meray baaray men suna, na meray jalaal ka mushaahada kiya hai. in aqvaam men vah meray jalaal ka elaan karengay.
20phir vah tamaam aqvaam men rahenay vaalay tumhaaray bhaaiyon ko ghodon, rathon, gaadiyon, khachcharon aur oonton par savaar karkay yarooshalam lay aaengay. yahaan meray muqaddas pahaad par vah unhen ghalla kee nazar kay taur par pesh karengay. kyoonki rabb farmaata hai ki jis tarah israaeelee apnee ghalla kee nazren paak bartanon men rakh kar rabb kay ghar men lay aatay hain usee tarah vah tumhaaray israaeelee bhaaiyon ko yahaan pesh karengay. 21un men say main baaz ko imaam aur laavee ka uhda doonga.” yah rabb ka farmaan hai.
22rabb farmaata hai, “jitnay yaqeen kay saath mera banaaya hua naya aasmaan aur naee zameen meray saamnay qaaim rahega utnay yaqeen kay saath tumhaaree nasal aur tumhaara naam abad tak qaaim rahega. 23us vaqt tamaam insaan meray paas a kar mujhay sijda karengay. har naay chaand aur har sabat ko vah baaqaaidagee say aatay rahengay.” yah rabb ka farmaan hai. 24“tab vah shaher say nikal kar un kee laashon par nazar daalengay jo mujh say sarkash huay thay. kyoonki na unhen khaanay vaalay keeday kabhee marengay, na unhen jalaanay vaalee aag kabhee bujhegee. tamaam insaan un say ghin khaaengay.”