Yashaayaah 65

rabb ka ghazab qaum par naazil hogaa

¹“jo meray baaray men darayaaft naheen kartay thay unhen main nay mujhay dhoondnay ka mauqa diya. jo mujhay talaash naheen kartay thay unhen main nay mujhay paanay ka mauqa diya. main bola, ‘main haazir hoon, main haazir hoon!’ haalaanki jis qaum say main mukhaatib hua vah mera naam naheen pukaartee thee.

²din bhar main nay apnay haath phailaaay rakhay taaki ek sarkash qaum ka istiqbaal karoon, haalaanki yah log ghalat raah par chaltay aur apnay kajrau khayaalaat kay peechhay paday rahetay hain. ³yah mutvaatir aur meray roo-ba-roo hee mujhay naaraaz kartay hain. kyoonki yah baaghon men qurbaaniyaan chadha kar eenton kee qurbaanagaahon par bakhoor jalaatay hain. ⁴yah qabristaan men baith kar khufiya ghaaron men raat guzaartay hain. yah sooar ka gosht khaatay hain, un kee degon men qaabil-ay-ghin shorba hota hai. ⁵saath saath yah ek doosray say kahetay hain, ‘mujh say door raho, qareeb mat aana! kyoonki main teree nisbat kaheen ziyaada muqaddas hoon.’

is qism kay log meree naak men dhuen kee maanind hain, ek aag jo din bhar jaltee rahetee hai. ⁶dekho, yah baat meray saamnay hee qalamband huee hai ki main khaamosh naheen rahoonga balki poora poora ajr doonga. main un kee jholee un kay ajr say bhar doonga.” ⁷rabb farmaata hai, “unhen na sirf un kay apnay gunaahon kee saza milegee balki baapdaada kay gunaahon kee bhee. choonki unhon nay pahaadon par bakhoor kee qurbaaniyaan chadha kar meree tahqeer kee is liyay main un kee jholee un kee harkaton kay muaavazay say bhar doonga.”

maut na chuno balki hayaat!

⁸rabb farmaata hai, “jab tak angoor men thoda sa ras baaqee ho log kahetay hain, ‘usay zaaay mat karna, kyoonki ab tak us men kuchh na kuchh hai jo barkat ka baais hai.’ main israaeel kay saath bhee aisa hee karoonga. kyoonki apnay khaadimon kee khaatir main sab ko nest naheen karoonga. ⁹main yaaqoob aur yahoodaah ko aisee aulaad bakhsh doonga jo meray pahaadon ko meeraas men paaegee. tab pahaad meray baragazeedon kee milkiyat hongay, aur meray khaadim un par basengay. ¹⁰vaadee-ay-shaaroon men bhed-bakriyaan charengee, vaadee-ay-akoor men gaay-bail aaraam karengay. yah sab kuchh meree us qaum ko dastayaab hoga jo meree taalib rahegee.

¹¹lekin tum jo rabb ko tark karkay meray muqaddas pahaad ko bhool gaay ho, khabardaar! go is vaqt tum khushqisamtee kay devta jad kay liyay mez bichhaatay aur taqdeer kay devta manaat kay liyay mai ka bartan bhar detay ho, ¹²lekin tumhaaree taqdeer aur hai. main nay tumhaaray liyay talvaar kee taqdeer muqarrar kee hai. tum sab ko qasaaee kay saamnay jhukna padega, kyoonki jab main nay tumhen bulaaya to tum nay javaab na diya. jab main tum say hamkalaam hua to tum nay na suna balki vah kuchh kiya jo mujhay bura laga. tum nay vah kuchh ikhtiyaar kiya jo mujhay naapsand hai.”

¹³is liyay rabb qaadir-ay-mutlaq farmaata hai, “meray khaadim khaana khaaengay, lekin tum bhookay rahogay. meray khaadim paanee piengay, lekin tum piyaasay rahogay. meray khaadim masroor hongay, lekin tum sharmasaar hogay. ¹⁴meray khaadim khushee kay maaray shaadiyaana bajaaengay, lekin tum ranjeeda ho kar ro padogay, tum maayoos ho kar vaavaila karogay. ¹⁵aakhirkaar tumhaara naam hee meray baragazeedon kay paas baaqee rahega, aur vah bhee sirf laanat kay taur par istemaal hoga. qasam khaatay vaqt vah kahengay, ‘rabb qaadir-ay-mutlaq tumhen isee tarah qatl karay.’ lekin meray khaadimon ka ek aur naam rakha jaaega. ¹⁶mulk men jo bhee apnay liyay barkat maangay ya qasam khaaay vah vafaadaar khuda ka naam lega. kyoonki guzree museebaton kee yaaden mit jaaengee, vah meree aankhon say chhup jaaengee.

naay zamaanay ka aaghaaz

¹⁷kyoonki main naya aasmaan aur naee zameen khalaq karoonga. tab guzree cheezen yaad naheen aaengee, un ka khayaal tak naheen aaega.

¹⁸chunaanchay khush-o-khurram ho! jo kuchh main khalaq karoonga us kee hamesha tak khushee manaao! kyoonki dekho, main yarooshalam ko shaadmaanee ka baais aur us kay baashindon ko khushee ka sabab banaaoonga. ¹⁹main khud bhee yarooshalam kee khushee manaaoonga aur apnee qaum say lutf’andoz hoonga.

aainda us men rona aur vaavaila sunaaee naheen dega. ²⁰vahaan koee bhee paidaaish kay thoday dinon baad faut naheen hoga, koee bhee vaqt say pahelay naheen marega. jo sau saal ka hoga usay javaan samjha jaaega, aur jo sau saal kee umr say pahelay hee faut ho jaaay usay malaoon samjha jaaega.

²¹log ghar bana kar un men basengay, vah angoor kay baagh laga kar un ka phal khaaengay. ²²aainda aisa naheen hoga ki ghar banaanay kay baad koee aur us men basay, ki baagh lagaanay kay baad koee aur us ka phal khaaay. kyoonki meree qaum kee umr darakhton jaisee daraaz hogee, aur meray barguzeeda apnay haathon kay kaam say lutf’andoz hongay. ²³na un kee mehanat-mashaqqat raaygaan jaaegee, na un kay bachchay achaanak tashaddud ka nishaana ban kar marengay. kyoonki vah rabb kee mubaarak nasal hongay, vah khud aur un kee aulaad bhee. ²⁴is say pahelay ki vah aavaaz den men javaab doonga, vah abhee bol rahay hongay ki main un kee sunoonga.”

²⁵rabb farmaata hai, “bhediya aur lela mil kar charengay, sherbabar bail kee tarah bhoosa khaaega, aur saamp kee khuraak khaak hee hogee. meray pooray muqaddas pahaad par na ghalat kaam kiya jaaega, na kisee ko nuqsaan pahunchega.”