Yashaayaah 64

¹kaash too aasmaan ko phaad kar utar aaay, ki pahaad teray saamnay tharatharaaen. ²kaash too daaliyon ko bhadka denay vaalee aag ya paanee ko ek dam ubaalnay vaalee aatish kee tarah naazil ho taaki teray dushman tera naam jaan len aur qaumen teray saamnay laraz uthen! ³kyoonki qadeem zamaanay men jab too khaufnaak aur ghairmutvaqqay kaam kiya karta tha to yoon hee naazil hua, aur pahaadiyon hee teray saamnay kaampnay lagay. ⁴qadeem zamaanay say hee kisee nay teray siva kisee aur khuda ko na dekha na suna hai. sirf too hee aisa khuda hai jo un kee madad karta hai jo teray intizaar men rahetay hain.

⁵too un say milta hai jo khushee say raast kaam kartay, jo teree raahon par chaltay huay tujhay yaad kartay hain! afsos, too ham say naaraaz hua, kyoonki ham shuroo say tera gunaah karkay tujh say bevafa rahay hain. to phir ham kis tarah bach jaaengay? ⁶ham sab naapaak ho gaay hain, hamaaray tamaam naam-nihaad raast kaam ganday cheethdon kee maanind hain. ham sab patton kee tarah murjha gaay hain, aur hamaaray gunaah hamen hava kay jhonkon kee tarah uda kar lay ja rahay hain.

⁷koee naheen jo tera naam pukaaray ya tujh say lipatnay kee koshish karay. kyoonki too nay apna chihara ham say chhupa kar hamen hamaaray qusooron kay havaalay chhod diya hai.

⁸ai rabb, taaham too hee hamaara baap, hamaara kumhaar hai. ham sab mittee hee hain jisay teray haath nay tashkeel diya hai. ⁹ai rabb, hadd say ziyaada ham say naaraaz na ho! hamaaray gunaah tujhay hamesha tak yaad na rahen. zara is ka lihaaz kar ki ham sab teree qaum hain. ¹⁰teray muqaddas shaher veeraan ho gaay hain, yahaan tak ki siyyoon bhee biyaabaan hee hai, yarooshalam veeraan-o-sunsaan hai. ¹¹hamaara muqaddas aur shaandaar ghar jahaan hamaaray baapdaada teree sitaaish kartay thay nazar-ay-aatish ho gaya hai, jo kuchh bhee ham azeez rakhtay thay vah khandar ban gaya hai.

¹²ai rabb, kya too in vaaqiaat kay baavujood bhee apnay aap ko ham say door rakhega? kya too khaamosh rah kar hamen hadd say ziyaada past honay dega?.