Yashaayaah 63
allaah apnee qaum kee adaalat karta hai
1yah kaun hai jo adom say a raha hai, jo surkh surkh kapday pahenay busra shaher say pahunch raha hai? yah kaun hai jo rob say mulabbas badee taaqat kay saath aagay badh raha hai? “main hee hoon, vah jo insaaf say bolta, jo badee qudrat say tujhay bachaata hai.”
2teray kapday kyoon itnay laal hain? lagta hai ki tera libaas hauz men angoor kuchalnay say surkh ho gaya hai.
3“main angooron ko akela hee kuchalta raha hoon, aqvaam men say koee meray saath naheen tha. main nay ghussay men a kar unhen kuchla, taish men unhen raunda. un kay khoon kee chheenten meray kapdon par pad gaeen, mera saara libaas aalooda hua. 4kyoonki mera dil intiqaam lenay par tula hua tha, apnee qaum ka ivzaana denay ka saal a gaya tha. 5main nay apnay ird-gird nazar daudaaee, lekin koee naheen tha jo meree madad karta. main hairaan tha ki kisee nay bhee mera saath na diya. chunaanchay meray apnay baazoo nay meree madad kee, aur meray taish nay mujhay sahaara diya. 6ghussay men a kar main nay aqvaam ko paamaal kiya, taish men unhen madahosh karkay un ka khoon zameen par gira diya.”
rabb kee tamjeed
7main rabb kee meharbaaniyaan sunaaoonga, us kay qaabil-ay-taareef kaamon kee tamjeed karoonga. jo kuchh rabb nay hamaaray liyay kiya, jo mut’addid bhalaaiyaan us nay apnay rahem aur baday fazl say israaeel ko dikhaaee hain un kee sitaaish karoonga.
8us nay farmaaya, “yaqeenan yah meree qaum kay hain, aisay farzand jo bevafa naheen hongay.” yah kah kar vah un ka najaatadihanda ban gaya, 9vah un kee tamaam museebat men shareek hua, aur us kay huzoor kay farishtay nay unhen chhutkaara diya. vah unhen piyaar karta, un par taras khaata tha, is liyay us nay ivzaana day kar unhen chhudaaya. haan, qadeem zamaanay say aaj tak vah unhen uthaaay phirta raha.
10lekin vah sarkash huay, unhon nay us kay quddoos rooh ko dukh pahunchaaya. tab vah mud kar un ka dushman ban gaya. khud vah un say ladnay laga.
11phir us kee qaum ko vah qadeem zamaana yaad aaya jab moosa apnee qaum kay darmiyaan tha, aur vah pukaar uthay, “vah kahaan hai jo apnee bhed-bakriyon ko un kay gallaabaanon samet samundar men say nikaal laaya? vah kahaan hai jis nay apnay rooh-ul-quds ko un kay darmiyaan naazil kiya, 12jis kee jalaalee qudrat moosa kay daaen haath haazir rahee taaki us ko sahaara day? vah kahaan hai jis nay paanee ko israaeeliyon kay saamnay taqseem karkay apnay liyay abdee shuharat paida kee 13aur unhen gaheraaiyon men say guzarnay diya? us vaqt vah khulay maidaan men chalnay vaalay ghoday kee tarah aaraam say guzray aur kaheen bhee thokar na khaaee. 14jis tarah gaay-bail aaraam kay liyay vaadee men utartay hain usee tarah unhen rabb kay rooh say aaraam aur sukoon haasil hua.”
isee tarah too nay apnee qaum kee raahanumaaee kee taaki teray naam ko jalaal milay.
tauba kee duaa
15ai allaah, aasmaan say ham par nazar daal, bulandiyon par apnee muqaddas aur shaandaar sukoonatgaah say dekh! is vaqt teree ghairat aur qudrat kahaan hai? ham teree narmee aur meharbaaniyon say maheroom rah gaay hain! 16too to hamaara baap hai. kyoonki ibraaheem hamen naheen jaanta aur israaeel hamen naheen pahechaanata, lekin too, rabb hamaara baap hai, qadeem zamaanay say hee tera naam ‘hamaara chhudaanay vaala’ hai. 17ai rabb, too hamen apnee raahon say kyoon bhataknay deta hai? too nay hamaaray dilon ko itna sakht kyoon kar diya ki ham tera khauf naheen maan saktay? hamaaree khaatir vaapas a! kyoonki ham teray khaadim, teree mauroosee milkiyat kay qabeelay hain. 18tera maqdis thodee hee der kay liyay teree qaum kee milkiyat raha, lekin ab hamaaray mukhaalifon nay usay paaon talay raund daala hai. 19lagta hai ki ham kabhee teree hukoomat kay tahet naheen rahay, ki ham par kabhee teray naam ka thappa naheen laga tha.