Yashaayaah 62

yarooshalam kee bahaalee

¹siyyoon kee khaatir main khaamosh naheen rahoonga, yarooshalam kee khaatir tab tak aaraam naheen karoonga jab tak us kee raastee tuloo-ay-subah kee tarah na chamkay aur us kee najaat mash’al kee tarah na bhadkay.

²aqvaam teree raastee dekhengee, tamaam baadshaah teree shaan-o-shaukat ka mushaahada karengay. us vaqt tujhay naya naam milega, aisa naam jo rabb ka apna munh mut’ayyin karega. ³too rabb kay haath men shaandaar taaj aur apnay khuda kay haath men shaahee kulaah hogee. ⁴aainda log tujhay na kabhee ‘matrooka’ na teray mulk ko ‘veeraan-o-sunsaan’ qaraar dengay balki too mera lutf aur tera mulk byaahee kahelaaega. kyoonki rabb tujh say lutf’andoz hoga, aur tera mulk shaadeeshuda hoga. ⁵jis tarah javaan aadmee kunvaaree say shaadee karta hai usee tarah teray farzand tujhay byaah lengay. aur jis tarah doolha dulhan kay baais khushee manaata hai usee tarah tera khuda teray sabab say khushee manaaega.

⁶ai yarooshalam, main nay teree faseel par paheredaar lagaaay hain jo din raat aavaaz den. unhen ek lamhay kay liyay bhee khaamosh rahenay kee ijaazat naheen hai. ai rabb ko yaad dilaanay vaalo, us vaqt tak na khud aaraam karo, ⁷na rabb ko aaraam karnay do jab tak vah yarooshalam ko az sar-ay-nau qaaim na kar lay. jab pooree duniya shaher kee taareef karegee tab hee tum sukoon ka saans lay saktay ho. ⁸rabb nay apnay daaen haath aur zoraavar baazoo kee qasam kha kar vaada kiya hai, “aainda na main tera ghalla teray dushmanon ko khilaaoonga, na badee mehanat say banaaee gaee teree mai ko ajnabiyon ko pilaaoonga. ⁹kyoonki aainda fasal kee kataaee karnay vaalay hee rabb kee sitaaish kartay huay usay khaaengay, aur angoor chunnay vaalay hee meray maqdis kay sahenon men a kar un ka ras piengay.”

¹⁰daakhil ho jaao, shaher kay darvaazon men daakhil ho jaao! qaum kay liyay raasta tayyaar karo! raasta banaao, raasta banaao! usay pattharon say saaf karo! tamaam aqvaam kay oopar jhanda gaad do!

¹¹kyoonki rabb nay duniya kee intiha tak elaan kiya hai, “siyyoon betee ko bataao ki dekh, teree najaat aanay vaalee hai. dekh, us ka ajr us kay paas hai, us ka in’aam us kay aagay aagay chal raha hai.” ¹²tab vah ‘muqaddas qaum’ aur ‘vah qaum jisay rabb nay ivzaana day kar chhudaaya hai’ kahelaaengay. ai yarooshalam betee, too ‘marghoob’ aur ‘ghairmatrooka shaher’ kahelaaegee.