Yashaayaah 61
maatam ka vaqt khatm hai
1rabb qaadir-ay-mutlaq ka rooh mujh par hai, kyoonki rabb nay mujhay tel say masah karkay ghareebon ko khushkhabaree sunaanay ka ikhtiyaar diya hai. us nay mujhay shikastaadilon kee marham-pattee karnay kay liyay aur yah elaan karnay kay liyay bheja hai ki qaidiyon ko rihaaee milegee aur zanjeeron men jakday huay aazaad ho jaaengay, 2ki bahaalee ka saal aur hamaaray khuda kay intiqaam ka din a gaya hai. us nay mujhay bheja hai ki main tamaam maatam karnay vaalon ko tasallee doon 3aur siyyoon kay sogvaaron ko dilaasa day kar raakh kay bajaay shaandaar taaj, maatam kay bajaay khushee ka tel aur shikasta rooh kay bajaay hamd-o-sana ka libaas muhayya karoon.
tab vah ‘raastee kay darakht’ kahelaaengay, aisay pauday jo rabb nay apna jalaal zaahir karnay kay liyay lagaaay hain. 4vah qadeem khandaraat ko az sar-ay-nau taameer karkay der say barbaad huay maqaamon ko bahaal karengay. vah un tabaahashuda shaheron ko dubaara qaaim karengay jo nasal-dar-nasal veeraan-o-sunsaan rahay hain. 5ghairmulkee khaday ho kar tumhaaree bhed-bakriyon kee gallaabaanee karengay, pardesee tumhaaray kheton aur baaghon men kaam karengay. 6us vaqt tum ‘rabb kay imaam’ kahelaaogay, log tumhen ‘hamaaray khuda kay khaadim’ qaraar dengay.
tum aqvaam kee daulat say lutf’andoz hogay, un kee shaan-o-shaukat apna kar us par fakhar karogay. 7tumhaaree sharmindagee naheen rahegee balki tum izzat ka dugna hissa paaogay, tumhaaree rusvaaee naheen rahegee balki tum shaandaar hissa milnay kay baais shaadiyaana bajaaogay. kyoonki tumhen vatan men dugna hissa milega, aur abdee khushee tumhaaree meeraas hogee.
8kyoonki rabb farmaata hai, “mujhay insaaf pasand hai. main ghaaratagaree aur kajarvee say nafrat rakhta hoon. main apnay logon ko vafaadaaree say un ka ajr doonga, main un kay saath abdee ahd baandhoonga. 9un kee nasal aqvaam men aur un kee aulaad deegar ummaton men mashhoor hogee. jo bhee unhen dekhay vah jaan lega ki rabb nay unhen barkat dee hai.”
10main rabb say nihaayat hee shaadmaan hoon, meree jaan apnay khuda kee taareef men khushee kay geet gaatee hai. kyoonki jis tarah doolha apna sar imaam kee see pagdee say sajaata aur dulhan apnay aap ko apnay zevraat say aaraasta kartee hai usee tarah allaah nay mujhay najaat ka libaas pahena kar raastee kee chaadar men lapeta hai. 11kyoonki jis tarah zameen apnee hariyaalee ko nikalnay detee aur baagh apnay beejon ko phootnay deta hai usee tarah rabb qaadir-ay-mutlaq aqvaam kay saamnay apnee raastee aur sitaaish phootnay dega.