Yashaayaah 60
aqvaam yarooshalam kay noor kay paas aaengee
1“uth, khadee ho kar chamak uth! kyoonki tera noor a gaya hai, aur rabb ka jalaal tujh par tuloo hua hai. 2kyoonki go zameen par taareekee chhaaee huee hai aur aqvaam ghanay andheray men rahetee hain, lekin tujh par rabb ka noor tuloo ho raha hai, aur us ka jalaal tujh par zaahir ho raha hai. 3aqvaam teray noor kay paas aur baadshaah us chamaktee damaktee raushnee kay paas aaengay jo tujh par tuloo hogee.
4apnee nazar utha kar chaaron taraf dekh! sab kay sab jama ho kar teray paas a rahay hain. teray betay door door say pahunch rahay hain, aur teree betiyon ko god men utha kar qareeb laaya ja raha hai. 5us vaqt too yah dekh kar chamak uthegee. tera dil khushee kay maaray tezee say dhadaknay lagega aur kushaada ho jaaega. kyoonki samundar kay khazaanay teray paas laaay jaaengay, aqvaam kee daulat teray paas pahunchegee. 6oonton ka ghol balki midiyaan aur aifa kay javaan oont teray mulk ko dhaamp dengay. vah sonay aur bakhoor say laday huay aur rabb kee hamd-o-sana kartay huay mulk-ay-saba say aaengay. 7qeedaar kee tamaam bhed-bakriyaan teray havaalay kee jaaengee, aur nabaayot kay mendhay teree khidmat kay liyay haazir hongay. unhen meree qurbaangaah par chadhaaya jaaega aur main unhen pasand karoonga. yoon main apnay jalaal kay ghar ko shaan-o-shaukat say aaraasta karoonga.
8yah kaun hain jo baadlon kee tarah aur kaabuk kay paas vaapas aanay vaalay kabootaron kee maanind ud kar a rahay hain? 9yah tarsees kay zabardast baheree jahaaz hain jo teray paas pahunch rahay hain. kyoonki jazeeray mujh say ummeed rakhtay hain. yah jahaaz teray beton ko un kee sonay-chaandee samet doordaraaz ilaaqon say lay kar a rahay hain. yoon rabb teray khuda kay naam aur israaeel kay quddoos kee taazeem hogee jis nay tujhay shaan-o-shaukat say navaaza hai.
10pardesee teree deevaaren az sar-ay-nau taameer karengay, aur un kay baadshaah teree khidmat karengay. kyoonki go main nay apnay ghazab men tujhay saza dee, lekin ab main apnay fazl say tujh par rahem karoonga. 11teree faseel kay darvaazay hamesha khulay rahengay. unhen na din ko band kiya jaaega, na raat ko taaki aqvaam ka maal-o-daulat aur un kay giriftaar kiay gaay baadshaahon ko shaher kay andar laaya ja sakay. 12kyoonki jo qaum ya saltanat teree khidmat karnay say inkaar karay vah barbaad ho jaaegee, usay pooray taur par tabaah kiya jaaega.
13lubnaan kee shaan-o-shaukat teray saamnay haazir hogee. jooneepar, sanobar aur sarv kay darakht mil kar teray paas aaengay taaki meray maqdis ko aaraasta karen. yoon main apnay paaon kee chaukee ko jalaal doonga. 14tujh par zulm karnay vaalon kay betay jhuk jhuk kar teray huzoor aaengay, teree tahqeer karnay vaalay teray paaon kay saamnay aundhay munh ho jaaengay. vah tujhay ‘rabb ka shaher’ aur ‘israaeel kay quddoos ka siyyoon’ qaraar dengay. 15pahelay tujhay tark kiya gaya tha, log tujh say nafrat rakhtay thay, aur tujh men say koee naheen guzarta tha. lekin ab main tujhay abdee fakhar ka baais bana doonga, aur tamaam naslen tujhay dekh kar khush hongee.
16too aqvaam ka doodh piegee, aur baadshaah tujhay doodh pilaaengay. tab too jaan legee ki main rabb tera najaatadihanda hoon, ki main jo yaaqoob ka zabardast soorma hoon tera chhudaanay vaala hoon.
17main teray peetal ko sonay men, teray lohay ko chaandee men, teree lakdee ko peetal men aur teray patthar ko lohay men badloonga. main salaamatee ko teree muhaafiz aur raastee ko teree nigraan banaaoonga. 18ab say teray mulk men na tashaddud ka zikr hoga, na barbaadee-o-tabaahee ka. ab say teree chaardeevaaree ‘najaat’ aur teray darvaazay ‘hamd-o-sana’ kahelaaengay.
19aainda tujhay na din kay vaqt sooraj, na raat kay vaqt chaand kee zaroorat hogee, kyoonki rabb hee teree abdee raushnee hoga, tera khuda hee teree aab-o-taab hoga. 20aainda tera sooraj kabhee ghuroob naheen hoga, tera chaand kabhee naheen ghatega. kyoonki rabb tera abdee noor hoga, aur maatam kay teray din khatm ho jaaengay.
21tab teree qaum kay tamaam afraad raastbaaz hongay, aur mulk hamesha tak un kee milkiyat rahega. kyoonki vah meray haath say lagaaee huee paneeree hongay, meray haath ka kaam jis say main apna jalaal zaahir karoonga. 22tab sab say chhotay khaandaan kee taadaad badh kar hazaar afraad par mushtamil hogee, sab say kamzor kumba taaqatvar qaum banega. muqarrara vaqt par main, rabb yah sab kuchh tezee say anjaam doonga.”