Yashaayaah 6
yasaayaah kee bulaahat
1jis saal uzziyaah baadshaah nay vafaat paaee us saal main nay rabb ko aala aur jalaalee takht par baithay dekha. us kay libaas kay daaman say rabb ka ghar bhar gaya. 2saraafeem farishtay us kay oopar khaday thay. har ek kay chhah par thay. do say vah apnay munh ko aur do say apnay paaon ko dhaamp letay thay jabki do say vah udtay thay. 3buland aavaaz say vah ek doosray ko pukaar rahay thay, “quddoos, quddoos, quddoos hai rabb-ul-afwaaj. tamaam duniya us kay jalaal say maamoor hai.”
4un kee aavaazon say daheleezen [a] lafzee matlab : daheleezon men ghoomnay vaalee darvaazon kee choolen. hil gaeen aur rabb ka ghar dhuen say bhar gaya. 5main chilla utha, “mujh par afsos, main barbaad ho gaya hoon! kyoonki go meray hont naapaak hain, aur jis qaum kay darmiyaan raheta hoon us kay hont bhee najis hain to bhee main nay apnee aankhon say baadshaah rabb-ul-afwaaj ko dekha hai.”
6tab saraafeem farishton men say ek udta hua meray paas aaya. us kay haath men damakta koila tha jo us nay chimtay say qurbaangaah say liya tha. 7is say us nay meray munh ko chhoo kar farmaaya, “dekh, koilay nay teray honton ko chhoo diya hai. ab tera qusoor door ho gaya, teray gunaah ka kaffaara diya gaya hai.”
8phir main nay rabb kee aavaaz sunee. us nay poochha, “main kis ko bhejoon? kaun hamaaree taraf say jaaay?” main bola, “main haazir hoon. mujhay hee bhej day.” 9tab rabb nay farmaaya, “ja, is qaum ko bata, ‘apnay kaanon say suno magar kuchh na samajhna. apnee aankhon say dekho, magar kuchh na jaanna!’ 10is qaum kay dil ko behiss kar day, un kay kaanon aur aankhon ko band kar. aisa na ho ki vah apnee aankhon say dekhen, apnay kaanon say sunen, meree taraf rujoo karen aur shifa paaen.”
11main nay savaal kiya, “ai rabb, kab tak?” us nay javaab diya, “us vaqt tak ki mulk kay shaher veeraan-o-sunsaan, us kay ghar ghair’aabaad aur us kay khet banjar na hon. 12pahelay laazim hai ki rabb logon ko door door tak bhaga day, ki poora mulk tan-ay-tanaha aur bekas rah jaaay. 13agar qaum ka dasvaan hissa mulk men baaqee bhee rahay lekin usay bhee jala diya jaaega. vah kisee baloot ya deegar lambay-chauday darakht kee tarah yoon kat jaaega ki mudh hee baaqee rahega. taaham yah mudh ek muqaddas beej hoga jis say naay siray say zindagee phoot niklegee.”