Yashaayaah 59

tumhaaray qusoor nay tumhen rabb say door kar diya hai

¹yaqeenan rabb ka baazoo chhota naheen ki vah bacha na sakay, us ka kaan bahera naheen ki sun na sakay. ²haqeeqat men tumhaaray buray kaamon nay tumhen us say alag kar diya, tumhaaray gunaahon nay us ka chihara tum say chhupaaay rakha, is liyay vah tumhaaree naheen sunta. ³kyoonki tumhaaray haath khoon’aalooda, tumhaaree ungaliyaan gunaah say naapaak hain. tumhaaray hont jhoot boltay aur tumhaaree zabaan shareer baaten phusaphusaatee hai. ⁴adaalat men koee munsifaana muqaddma naheen chalaata, koee sachchay dalaail pesh naheen karta. log sachchaaee say khaalee baaton par etibaar karkay jhoot boltay hain, vah badkaaree say haamila ho kar bedeenee ko janm detay hain. ^5-6 vah zahereelay saampon kay andon par baith jaatay hain taaki bachchay niklen. jo un kay anday khaaay vah mar jaata hai, aur agar un kay anday dabaaay to zahereela saamp nikal aata hai. yah log makdee kay jaalay taan letay hain, aisa kapda jo pahennay kay liyay bekaar hai. apnay haathon kay banaaay huay is kapday say vah apnay aap ko dhaamp naheen saktay. un kay aamaal buray hee hain, un kay haath tashaddud hee kartay hain. ⁷jahaan bhee ghalat kaam karnay ka mauqa milay vahaan un kay paaon bhaag kar pahunch jaatay hain. vah bequsoor ko qatl karnay kay liyay tayyaar rahetay hain. un kay khayaalaat shareer hee hain, apnay peechhay vah tabaahee-o-barbaadee chhod jaatay hain. ⁸na vah salaamatee kee raah jaantay hain, na un kay raaston men insaaf paaya jaata hai. kyoonki unhon nay unhen tedha-medha bana rakha hai, aur jo bhee un par chalay vah salaamatee ko naheen jaanta.

tauba kee duaa

⁹isee liyay insaaf ham say door hai, raastee ham tak pahunchtee naheen. ham raushnee kay intizaar men rahetay hain, lekin afsos, andhera hee andhera nazar aata hai. ham aab-o-taab kee ummeed rakhtay hain, lekin afsos, jahaan bhee chaltay hain vahaan ghanee taareekee chhaaee rahetee hai. ¹⁰ham andhon kee tarah deevaar ko haath say chhoo chhoo kar raasta maaloom kartay hain, aankhon say maheroom logon kee tarah tatol tatol kar aagay badhtay hain. dopaher kay vaqt bhee ham thokar kha kha kar yoon phirtay hain jaisay dhundalka ho. go ham tan’aavar logon kay darmiyaan rahetay hain, lekin khud murdon kee maanind hain. ¹¹ham sab nidhaal haalat men reechhon kee tarah ghurraatay, kabootaron kee maanind ghoon ghoon kartay hain. ham insaaf kay intizaar men rahetay hain, lekin besood. ham najaat kee ummeed rakhtay hain, lekin vah ham say door hee rahetee hai.

¹²kyoonki hamaaray mut’addid jaraaim teray saamnay hain, aur hamaaray gunaah hamaaray khilaaf gavaahee detay hain. hamen mutvaatir apnay jaraaim ka ihsaas hai, ham apnay gunaahon say khoob vaaqif hain. ¹³ham maantay hain ki rabb say bevafa rahay balki us ka inkaar bhee kiya hai. ham nay apna munh apnay khuda say pher kar zulm aur dhokay kee baaten phailaaee hain. hamaaray dilon men jhoot ka beej badhtay badhtay munh men say nikla. ¹⁴nateejay men insaaf peechhay hat gaya, aur raastee door khadee rahetee hai. sachchaaee chauk men thokar kha kar gir gaee hai, aur diyaanatdaaree daakhil hee naheen ho saktee. ¹⁵chunaanchay sachchaaee kaheen bhee paaee naheen jaatee, aur ghalat kaam say gurez karnay vaalay ko loota jaata hai.

rabb ka javaab

yah sab kuchh rabb ko nazar aaya, aur vah naakhush tha ki insaaf naheen hai. ¹⁶us nay dekha ki koee naheen hai, vah hairaan hua ki mudaakhalat karnay vaala koee naheen hai. tab us kay zoraavar baazoo nay us kee madad kee, aur us kee raastee nay us ko sahaara diya. ¹⁷raastee kay ziraabaktar say mulabbas ho kar us nay sar par najaat ka khod rakha, intiqaam ka libaas pahen kar us nay ghairat kee chaadar odh lee. ¹⁸har ek ko vah us ka munaasib muaavaza dega. vah mukhaalifon par apna ghazab naazil karega aur dushmanon say badla lega balki jazeeron ko bhee un kee harkaton ka ajr dega. ¹⁹tab insaan maghrib men rabb kay naam ka khauf maanengay aur mashriq men usay jalaal dengay. kyoonki vah rabb kee phoonk say chalaaay huay zordaar sailaab kee tarah un par toot padega.

²⁰rabb farmaata hai, “chhudaanay vaala koh-ay-siyyoon par aaega. vah yaaqoob kay un farzandon kay paas aaega jo apnay gunaahon ko chhod kar vaapas aaengay.”

²¹rabb farmaata hai, “jahaan tak mera taalluq hai, un kay saath mera yah ahd hai : mera rooh jo tujh par thahera hua hai aur meray alfaaz jo main nay teray munh men daalay hain vah ab say abad tak na teray munh say, na teree aulaad kay munh say aur na teree aulaad kee aulaad say hatengay.” yah rabb ka farmaan hai.