Yashaayaah 58

rabb ko pasandeeda rozaa

¹gala phaad kar aavaaz day, ruk ruk kar baat na kar! narsingay kee see buland aavaaz kay saath meree qaum ko us kee sarkashee suna, yaaqoob kay gharaanay ko us kay gunaahon kee faherist bayaan kar. ²roz-ba-roz vah meree marzee darayaaft kartay hain, kyoonki vah meree raahon ko jaannay kay shauqeen hain. un kay aamaal say lagta hai ki qaum nay apnay khuda kay ahkaam ko tark naheen kiya balki raastbaaz hai. chunaanchay vah mujh say munsifaana faislay maang kar zaahiran allaah kee qurbat say lutf’andoz hotay hain. ³vah shikaayat kartay hain, ‘jab ham roza rakhtay hain to too tavajjuh kyoon naheen deta? jab ham apnay aap ko khaaksaar bana kar inkisaaree ka izhaar kartay hain to too dhyaan kyoon naheen deta?’

suno! roza rakhtay vaqt tum apna kaarobaar maamool kay mutaabiq chala kar apnay mazdooron ko dabaaay rakhtay ho. ⁴na sirf yah balki tum roza rakhnay kay saath saath jhagadtay aur ladtay bhee ho. tum ek doosray ko sharaarat kay mukkay maarnay say bhee naheen chooktay. yah kaisee baat hai? agar tum yoon roza rakho to is kee tavaqqo naheen kar saktay ki tumhaaree baat aasmaan tak pahunchay. ⁵kya mujhay is qism ka roza pasand hai? kya yah kaafee hai ki banda apnay aap ko kuchh der kay liyay khaaksaar bana kar inkisaaree ka izhaar karay? ki vah apnay sar ko aabee narsal kee tarah jhuka kar taat aur raakh men let jaaay? kya tum vaaqaee samajhtay ho ki yah roza hai, ki aisa vaqt rabb ko pasand hai?

⁶yah kis tarah ho sakta hai? jo roza main pasand karta hoon vah farq hai. haqeeqee roza yah hai ki too beinsaafee kee zanjeeron men jakday huon ko riha karay, mazloomon ka jooa hataaay, kuchlay huon ko aazaad karay, har jooay ko today, ⁷bhookay ko apnay khaanay men shareek karay, beghar museebatzada ko panaah day, barahena ko kapday pahenaaay aur apnay rishtedaar kee madad karnay say gurez na karay!

⁸agar too aisa karay to too subah kee pahelee kirnon kee tarah chamak uthega, aur teray zakhm jald hee bharengay. tab teree raastbaazee teray aagay aagay chalegee, aur rabb ka jalaal teray peechhay teree hifaazat karega. ⁹tab too faryaad karega aur rabb javaab dega. jab too madad kay liyay pukaarega to vah faramaaega, ‘main haazir hoon.’

apnay darmiyaan doosron par jooa daalnay, ungaliyaan uthaanay aur doosron kee badnaamee karnay ka silsila khatm kar! ¹⁰bhookay ko apnee rotee day aur mazloomon kee zarooriyaat pooree kar! phir teree raushnee andheray men chamak uthegee aur teree raat dopaher kee tarah raushan hogee. ¹¹rabb hamesha teree qiyaadat karega, vah jhulastay huay ilaaqon men bhee teree jaan kee zarooriyaat pooree karega aur teray aaza ko taqviyat dega. tab too seraab baagh kee maanind hoga, us chashmay kee maanind jis ka paanee kabhee khatm naheen hota. ¹²teray log qadeem khandaraat ko naay siray say taameer karengay. jo bunyaaden guzree naslon nay rakhee theen unhen too dubaara rakhega. tab too ‘rakhnay ko band karnay vaala’ aur ‘galiyon ko dubaara rahenay kay qaabil banaanay vaala’ kahelaaega.

¹³sabat kay din apnay pairon ko kaam karnay say rok. meray muqaddas din kay dauraan kaarobaar mat karna balki usay ‘raahatabakhsh’ aur ‘muazzaz’ qaraar day. us din na maamool kee raahon par chal, na apnay kaarobaar chala, na khaalee gappen haank. yoon too sabat ka saheeh ehatiraam karega. ¹⁴tab rabb teree raahat ka mamba hoga, aur main tujhay rath men bitha kar mulk kee bulandiyon par say guzarnay doonga, tujhay teray baap yaaqoob kee meeraas men say ser karoonga.” rabb kay munh nay yah farmaaya hai.