Yashaayaah 57
rabb bedeenon kee adaalat karta hai
1raastbaaz halaak ho jaata hai, lekin kisee ko parva naheen. diyaanatdaar duniya say chheen liyay jaatay hain, lekin koee dhyaan naheen deta. koee naheen samajhta ki raastbaaz ko buraaee say bachnay kay liyay chheen liya jaata hai. 2kyoonki us kee manzil-ay-maqsood salaamatee hai. seedhee raah par chalnay vaalay martay vaqt paaon phaila kar aaraam kartay hain.
3“lekin ai jaadoogaranee kee aulaad, zinaakaar aur fahhaashee kay bachcho, idhar aao! 4tum kis ka mazaaq uda rahay ho, kis par zabaan chala kar munh chadhaatay ho? tum mujrimon aur dhokebaazon kay hee bachchay ho!
5tum baloot balki har ghanay darakht kay saay men mastee men a jaatay ho, vaadiyon aur chataanon kay shigaafon men apnay bachchon ko zabah kartay ho. 6vaadiyon kay ragday huay patthar tera hissa aur tera muqaddar ban gaay hain. kyoonki un hee ko too nay mai aur ghalla kee nazren pesh keen. is kay madd-ay-nazar main apna faisla kyoon badlon? 7too nay apna bistar oonchay pahaad par lagaaya, us par chadh kar apnee qurbaaniyaan pesh keen. 8apnay ghar kay darvaazay aur chaukhat kay peechhay too nay apnee butparastee kay nishaan lagaaay. mujhay tark karkay too apna bistar bichha kar us par let gaee. too nay usay itna bada bana diya ki doosray bhee us par let saken. phir too nay ismatafaroshee kay paisay muqarrar kiay. un kee sohbat tujhay kitnee piyaaree thee, un kee barahenagee say too kitna lutf uthaatee thee! 9too kasrat ka tel aur khushboodaar kreem lay kar malik devta kay paas gaee. too nay apnay qaasidon ko door door balki paataal tak bhej diya. 10go too safar kartay kartay bahut thak gaee to bhee too nay kabhee na kaha, ‘fuzool hai!’ ab tak tujhay taqviyat miltee rahee, is liyay too nidhaal na huee.
11tujhay kis say itna khauf-o-hiraas tha ki too nay jhoot bol kar na mujhay yaad kiya, na parva kee? aisa hee hai na, too is liyay mera khauf naheen maantee ki main khaamosh aur chhupa raha.
12lekin main logon par teree naam-nihaad raastbaazee aur teray kaam zaahir karoonga. yaqeenan yah teray liyay mufeed naheen hongay. 13a, madad kay liyay aavaaz day! dekhtay hain ki teray buton ka majmooa tujhay bacha sakega ki naheen. lekin aisa naheen hoga balki unhen hava utha lay jaaegee, ek phoonk unhen uda degee.
lekin jo mujh par bharosa rakhay vah mulk ko meeraas men paaega, muqaddas pahaad us kee mauroosee milkiyat banega.”
rabb apnee qaum kee madad karegaa
14allaah farmaata hai, “raasta banaao, raasta banaao! usay saaf-suthra karkay har rukaavat door karo taaki meree qaum a sakay.” 15kyoonki jo azeem aur sarbuland hai, jo abad tak takhtnasheen aur jis ka naam quddoos hai vah farmaata hai, “main na sirf bulandiyon kay maqdis men balki shikastaahaal aur farotan rooh kay saath bhee sukoonat karta hoon taaki farotan kee rooh aur shikastaahaal kay dil ko naee zindagee bakhshoon. 16kyoonki main hamesha tak un kay saath naheen jhagdoonga, abad tak naaraaz naheen rahoonga. varna un kee rooh meray huzoor nidhaal ho jaatee, un logon kee jaan jinhen main nay khud khalaq kiya. 17main israaeel ka naajaaiz manaafay dekh kar taish men aaya aur usay saza day kar apna munh chhupaaay rakha. to bhee vah apnay dil kee bargashta raahon par chalta raha. 18lekin go main us kay chaal-chalan say vaaqif hoon main usay phir bhee shifa doonga, us kee raahanumaaee karkay usay dubaara tasallee doonga. aur us kay jitnay log maatam kar rahay hain 19un kay liyay main honton ka phal paida karoonga.” kyoonki rabb farmaata hai, “un kee salaamatee ho jo door hain aur un kee jo qareeb hain. main hee unhen shifa doonga.”
20lekin bedeen mutlaatim samundar kee maanind hain jo tham naheen sakta aur jis kee laheren gand aur keechad uchhaaltee rahetee hain. 21mera khuda farmaata hai, “bedeen salaamatee naheen paaengay.