Yashaayaah 56
har shakhs allaah kee qaum men shaamil ho sakta hai
1rabb farmaata hai, “insaaf ko qaaim rakho aur vah kuchh kiya karo jo raast hai, kyoonki meree najaat qareeb hee hai, aur meree raastee zaahir honay ko hai. 2mubaarak hai vah jo yoon raastee say lipta rahay. mubaarak hai vah jo sabat kay din kee behuramtee na karay balki usay manaaay, jo har buray kaam say gurez karay.”
3jo pardesee rabb ka pairokaar ho gaya hai vah na kahay ki beshak rabb mujhay apnee qaum say alag kar rakhega. khwaajaasara bhee na sochay ki haay, main sookha hua darakht hee hoon!
4kyoonki rabb farmaata hai, “jo khwaajaasara meray sabat kay din manaaen, aisay qadam uthaaen jo mujhay pasand hon aur meray ahd kay saath liptay rahen vah befikr rahen. 5kyoonki main unhen apnay ghar aur us kee chaardeevaaree men aisee yaadgaar aur aisa naam ata karoonga jo betay-betiyaan milnay say kaheen behatar hoga. aur jo naam main unhen doonga vah abdee hoga, vah kabhee naheen mitnay ka.
6vah pardesee bhee befikr rahen jo rabb kay pairokaar ban kar us kee khidmat karna chaahatay, jo rabb ka naam azeez rakh kar us kee ibaadat kartay, jo sabat kay din kee behuramtee naheen kartay balki usay manaatay aur jo meray ahd kay saath liptay rahetay hain. 7kyoonki main unhen apnay muqaddas pahaad kay paas la kar apnay dua kay ghar men khushee dilaaoonga. jab vah meree qurbaangaah par apnee bhasm honay vaalee aur zabah kee qurbaaniyaan chadhaaengay to vah mujhay pasand aaengee . kyoonki mera ghar tamaam qaumon kay liyay dua ka ghar kahelaaega.”
8rabb qaadir-ay-mutlaq jo israaeel kee bikhree huee qaum jama kar raha hai farmaata hai, “un men jo ikatthay ho chukay hain main aur bhee jama kar doonga.”
qaum kay raahanuma sust aur laalchee kuttay hain
9ai maidaan kay tamaam haivaano, aao! ai jangal kay tamaam jaanavro, a kar khaao! 10israaeel kay paheredaar andhay hain, sab kay sab kuchh bhee naheen jaantay. sab kay sab baheray kuttay hain jo bhaunk hee naheen saktay. farsh par letay huay vah achchhay achchhay khwaab dekhtay rahetay hain. oonghna unhen kitna pasand hai! 11lekin yah kuttay laalchee bhee hain aur kabhee ser naheen hotay, haalaanki gallaabaan kahelaatay hain. vah samajh say khaalee hain, aur har ek apnee apnee raah par dhyaan day kar apnay hee nafa kee talaash men raheta hai. 12har ek aavaaz deta hai, “aao, main mai lay aata hoon! aao, ham jee bhar kar sharaab pee len. aur kal bhee aaj kee tarah ho balki is say bhee ziyaada raunaq ho!”