Yashaayaah 50

tum apnay zaatee gunaahon kee saza bhugat rahay ho

¹rabb farmaata hai, “aao, mujhay vah talaaqnaama dikhaao jo main nay day kar tumhaaree maan ko chhod diya tha. vah kahaan hai? ya mujhay vah qarzakhwaah dikhaao jis kay havaalay main nay tumhen apna qarz utaarnay kay liyay kiya. vah kahaan hai? dekho, tumhen apnay hee gunaahon kay sabab say farokht kiya gaya, tumhaaray apnay hee gunaahon kay sabab say tumhaaree maan ko faarigh kar diya gaya.

²jab main aaya to koee naheen tha. kya vajah? jab main nay aavaaz dee to javaab denay vaala koee naheen tha. kyoon? kya main fidya day kar tumhen chhudaanay kay qaabil na tha? kya meree itnee taaqat naheen ki tumhen bacha sakoon? meree to ek hee dhamkee say samundar khushk ho jaata aur darya registaan ban jaatay hain. tab un kee machhliyaan paanee say maheroom ho kar gal jaatee hain, aur un kee badboo chaaron taraf phail jaatee hai. ³main hee aasmaan ko taareekee ka jaama pahenaata, main hee usay taat kay maatmee libaas men lapet deta hoon.”

rabb kay paighambar kee rusvaaee

⁴rabb qaadir-ay-mutlaq nay mujhay shaagird kee see zabaan ata kee taaki main vah kalaam jaan loon jis say thakaamaanda taqviyat paaay. subah-ba-subah vah meray kaan ko jaga deta hai taaki main shaagird kee tarah sun sakoon. ⁵rabb qaadir-ay-mutlaq nay meray kaan ko khol diya, aur na main sarkash hua, na peechhay hat gaya. ⁶main nay maarnay vaalon ko apnee peeth aur baal nochnay vaalon ko apnay gaal pesh kiay. main nay apna chihara un kee gaaliyon aur thook say na chhupaaya.

⁷lekin rabb qaadir-ay-mutlaq meree madad karta hai, is liyay meree rusvaaee naheen hogee. chunaanchay main nay apna munh chaqmaaq kee tarah sakht kar liya hai, kyoonki main jaanta hoon ki main sharminda naheen ho jaaoonga. ⁸jo mujhay raast thaheraata hai vah qareeb hee hai. to phir kaun meray saath jhagdega? aao, ham mil kar adaalat men khaday ho jaaen. kaun mujh par ilzaam lagaanay kee jur’at karega? vah a kar mera saamna karay! ⁹rabb qaadir-ay-mutlaq hee meree madad karta hai. to phir kaun mujhay mujrim thaheraaega? yah to sab puraanay kapday kee tarah ghis kar phatengay, keeday unhen kha jaaengay.

¹⁰tum men say kaun rabb ka khauf maanta aur us kay khaadim kee sunta hai? jab usay raushnee kay baghair andheray men chalna paday to vah rabb kay naam par bharosa rakhay aur apnay khuda par inhisaar karay. ¹¹lekin tum baaqee log jo aag laga kar apnay aap ko jaltay huay teeron say les kartay ho, apnee hee aag kay sholon men chalay jaao! khud un teeron kee zad men aao jo tum nay doosron kay liyay jalaaay hain! meray haath say tumhen yahee ajr milega, tum sakht aziyat ka shikaar ho kar zameen par tadaptay rahogay.