Yashaayaah 5
bephal angoor ka baagh
1aao, main apnay mahboob kay liyay geet gaaoon, ek geet jo us kay angoor kay baagh kay baaray men hai.
meray piyaaray ka baagh tha. angoor ka yah baagh zarkhez pahaadee par tha. 2us nay godee kartay kartay us men say tamaam patthar nikaal diay, phir behtareen angoor kee qalmen lagaaeen. beech men us nay meenaar khada kiya taaki us kee saheeh chaukeedaaree kar sakay. saath saath us nay angoor ka ras nikaalnay kay liyay patthar men hauz taraash liya. phir vah pahelee fasal ka intizaar karnay laga. badee ummeed thee ki achchhay meethay angoor milengay. lekin afsos! jab fasal pak gaee to chhotay aur khattay angoor hee niklay thay.
3“ai yarooshalam aur yahoodaah kay baashindo, ab khud faisla karo ki main us baagh kay saath kya karoon. 4kya main nay baagh kay liyay har mumkin koshish naheen kee thee? kya munaasib naheen tha ki main achchhee fasal kee ummeed rakhoon? kya vajah hai ki sirf chhotay aur khattay angoor niklay?
5pata hai ki main apnay baagh kay saath kya karoonga? main us kee kaantedaar baad ko khatm karoonga aur us kee chaardeevaaree gira doonga. us men jaanvar ghus aaengay aur char kar sab kuchh tabaah karengay, sab kuchh paaon talay raund daalengay!
6main us kee zameen banjar bana doonga. na us kee belon kee kaant-chhaant hogee, na godee kee jaaegee. vahaan kaantedaar aur khudrau pauday ugengay. na sirf yah balki main baadlon ko bhee us par barasnay say rok doonga.”
7suno, israaeelee qaum angoor ka baagh hai jis ka maalik rabb-ul-afwaaj hai. yahoodaah kay log us kay lagaaay huay pauday hain jin say vah lutf’andoz hona chaahata hai. vah ummeed rakhta tha ki insaaf kee fasal paida hogee, lekin afsos! unhon nay ghairqaanoonee harkaten keen. raastee kee tavaqqo thee, lekin mazloomon kee cheekhen hee sunaaee deen.
logon kee ghairqaanoonee harkaten
8tum par afsos jo yakay baad deegray gharon aur kheton ko apnaatay ja rahay ho. aakhirkaar deegar tamaam logon ko nikalna padega aur tum mulk men akelay hee rahogay. 9rabb-ul-afwaaj nay meree maujoodgee men hee qasam khaaee hai, “yaqeenan yah mut’addid makaan veeraan-o-sunsaan ho jaaengay, in baday aur aaleeshaan gharon men koee naheen basega. 10das ekad [a] lafzee matlab : jitnee zameen par bailon kee das jodiyaan ek din men hal chala saktee hain. zameen kay angooron say mai kay sirf 22 litar banengay, aur beej kay 160 kilograam say ghalla kay sirf 16 kilograam paida hongay.”
11tum par afsos jo subah-saveray uth kar sharaab kay peechhay pad jaatay aur raat bhar mai pee pee kar mast ho jaatay ho. 12tumhaaree ziyaafaton men kitnee raunaq hotee hai! tumhaaray mehamaan mai pee pee kar sarod, sitaar, daf aur baansree kee sureelee aavaazon say apna dil bahelaatay hain. lekin afsos, tumhen khayaal tak naheen aata ki rabb kya kar raha hai. jo kuchh rabb kay haathon ho raha hai us ka tum lihaaz hee naheen kartay. 13isee liyay meree qaum jilaavatan ho jaaegee, kyoonki vah samajh say khaalee hai. us kay baday afsar bhookon marengay, aur avaam piyaas kay maaray sookh jaaengay. 14paataal nay apna munh phaad kar khola hai taaki qaum kee tamaam shaan-o-shaukat, shor-sharaaba, hangaama aur shaadmaan afraad us kay galay men utar jaaen. 15insaan ko zer karkay khaak men milaaya jaaega, aur maghroor kee aankhen neechee ho jaaengee.
16lekin rabb-ul-afwaaj kee adaalat us kee azmat dikhaaegee, aur quddoos khuda kee raastee zaahir karegee ki vah quddoos hai. 17un dinon men lelay aur motee-taazee bheden jilaavatanon kay khandaraat men yoon charengee jis tarah apnee charaagaahon men.
18tum par afsos jo apnay qusoor ko dhokebaaz rasson kay saath apnay peechhay khainchtay aur apnay gunaah ko bailgaadee kee tarah apnay peechhay ghaseettay ho. 19tum kahetay ho, “allaah jaldee jaldee apna kaam niptaaay taaki ham is ka muaaina karen. jo mansooba israaeel ka quddoos rakhta hai vah jaldee saamnay aaay taaki ham usay jaan len.”
20tum par afsos jo buraaee ko bhula aur bhalaaee ko bura qaraar detay ho, jo kahetay ho ki taareekee raushnee aur raushnee taareekee hai, ki kadavaahat meethee aur mithaas kadvee hai.
21tum par afsos jo apnee nazar men daanishmand ho aur apnay aap ko hoshyaar samajhtay ho.
22tum par afsos jo mai peenay men pahelavaan ho aur sharaab milaanay men apnee bahaaduree dikhaatay ho.
23tum rishvat kha kar mujrimon ko baree kartay aur bequsooron kay huqooq maartay ho. 24ab tumhen is kee saza bhugatnee padegee. jis tarah bhoosa aag kee lapet men a kar raakh ho jaata aur sookhee ghaas aag kay sholay men churmur ho jaatee hai usee tarah tum khatm ho jaaogay. tumhaaree jaden sad jaaengee aur tumhaaray phool gard kee tarah ud jaaengay, kyoonki tum nay rabb-ul-afwaaj kee shareeat ko radd kiya hai, tum nay israaeel kay quddoos ka farmaan haqeer jaana hai.
asooree fauj ka hamlaa
25yahee vajah hai ki rabb ka ghazab us kee qaum par naazil hua hai, ki us nay apna haath badha kar un par hamla kiya hai. pahaad laraz rahay aur galiyon men laashen kachray kee tarah bikhree huee hain. taaham us ka ghussa thanda naheen hoga balki us ka haath maarnay kay liyay utha hee rahega.
26vah ek doordaraaz qaum kay liyay faujee jhanda gaad kar usay apnee qaum kay khilaaf khada karega, vah seetee baja kar usay duniya kee intiha say bulaaega. vah dekho, dushman bhaagtay huay a rahay hain! 27un men say koee naheen jo thakaamaanda ho ya ladakhda kar chalay. koee naheen oonghta ya soya hua hai. kisee ka bhee patka dheela naheen, kisee ka bhee tasma toota naheen. 28un kay teer tez aur kamaan tanay huay hain. un kay ghodon kay khur chaqmaaq jaisay, un kay rathon kay pahiay aandhee jaisay hain. 29vah shernee kee tarah garajtay hain balki javaan sherbabar kee tarah dahaadatay aur ghurraatay huay apna shikaar chheen kar vahaan lay jaatay hain jahaan usay koee naheen bacha sakta.
30us din dushman ghurraatay aur mutlaatim samundar ka sa shor machaatay huay israaeel par toot padengay. jahaan bhee dekho vahaan andhera hee andhera aur museebat hee museebat. baadal chha jaanay kay sabab say raushnee taareek ho jaaegee.